Buokiia Aomata Bwa A na Ongeaba Iroun te Atua
1. Baikara boroutia ake a otinako n te Bwabwaro ae “E Bia Roko Ana Tautaeka n Uea te Atua!”, ao a kanga n riki bwa bwaai ni mwakuri aika manena?
1 N te Bwabwaro ae “E Bia Roko Ana Tautaeka n Uea te Atua!” ao iai uoua boroutia ake a otinako bwa Ongeaba Iroun te Atua ao Ko na Maiu n Aki Toki, ao kakimototoana n te aro ae mataata ae Ongeaba Iroun te Atua. A bebete taekaia ao e baitii rairakia ibukina bwa a rangi ni kimototo kaongora iai. Ni koauana, ngke e moan otinako te boroutia ae Ongeaba Iroun te Atua ao Ko na Maiu n Aki Toki ao e kariaiakaki bwa e na rairaki n taetae aika 431.
2. Antai aika a na buokaki ni boroutia aikai?
2 Antai aika a na buokaki ni boroutia aikai? Iangoi baika taabangaki rikia ni katobibia te aonnaba aika oti i nano:
• Te tia uarongorongo ae maroro ma kaain te auti tao ni moan rokona ke ni manga okina, ae e a ataia bwa e babanga ni wareware kaain te auti ke e aki bati n rabakau ni wareware.
• Te tia uarongorongo ae tataekina te rongorongo nakoia aomata aika taetae n te taetae ae e a tia n rairaki iai ara boki ke ae tuai. Ke angiina n te aono anne a babanga ni wareware n te taetae are bon oin aia taetae.
• Te tia uarongorongo ae kabongana te taetae n te bai, n uarongorongo nakoia bonotaninga n ana aono.
• Te karo ae tangiria n reiakina natina ae uarereke taekan te koaua, ae natina anne e tuai rabakau raoi ni wareware.
3. Tera ae ko noria n te boroutia ae Ongeaba Iroun te Atua?
3 Aroni Baireani Kaongora ni Boroutia Aikai: E rangi n uarereke te kaongora n te boroutia ae Ongeaba Iroun te Atua, bwa tii te kibuntaeka ae uarereke ao kibun te Baibara ae oti i nano n iteranibaana nako, ake a kamataatai reirei aika kakawaki. N te aro raa? Iangoia bwa iai ae anganiko te boroutia ae koreaki n te taetae ae ko aki kona ni warekia, bwa tao a koreaki n taeka aika tiaki oin am taetae. Ko na kani warekia, e ngae ngke a kantara taamnei aika i nanona? Ko bae n aki. N aron anne, a kai bwara nanoia aomata ake a babanga ni wareware ni wareki booki aika koreaki iai rongorongo aika bati. Ma a katauraoaki taamnei aika mwaiti n iteranibaana nako, ni kainikoto aika kaira te maroro man te taamnei teuana nakon are imwina.
4. Tera ae ko noria n te boroutia ae Ongeaba Iroun te Atua ao Ko na Maiu n Aki Toki?
4 Titeboo taamnei n te boroutia ae Ongeaba Iroun te Atua ao Ko na Maiu n Aki Toki ma te boroutia ae Ongeaba Iroun te Atua. E katauraoaki te boroutia ae Ongeaba Iroun te Atua ao Ko na Maiu n Aki Toki, ibukia te koraki aika e uarereke aia konabwai ni wareware ke aika reireinia ni wareware. E kona naba te aomata ae kaira te reirei n te Baibara ni kabongana te boroutia aei ma ana aomata, e ngae ngke te aomata anne e reirei naba n te boroutia ae Ongeaba Iroun te Atua. N te angamaing i eta n iteraniba aika uoua, ao e oti iai te titiraki ae iai kaekaana n iteraniba akanne. Tiaki tii taian taamnei aika kona n noraki i nanona, ma iai naba kibun te Baibara ao kabwarabwaraaia. Iai te bwaoki ae karanaki ae oti i nano n angiin iteranibaana, aika kaotii reirei tabeua aika kakawaki ao kibun te Baibara aika kona ni maroroakinaki, ni kaineti ma ana konabwai te aomata ae reirei n te Baibara.
5. N ningai ao ti na kanga n tibwai boroutia aikai?
5 Arom ni Kabonganai: Tao ko na bae n tibwaa te boroutia n am tai ni mwakuri ni minita man te auti teuana ma teuana ngkana e na manena karaoana, e ngae naba ngkana tiaki tain tibwaakin te boroutia n te namwakaina anne. (Nora te bwaoki ae “Aron Tibwaakia.”) Ko kona n anga te boroutia ni manga okim nakon te aomata ae kan ongora, n tuangnga bwa iai te bwai ae ko kani kaotia nakoina ao imwina ko a anganna naba te boroutia.
6. Ti na kanga ni kamanenai boroutia aikai ni kaira iai te reirei n te Baibara?
6 Kioina ngkai akea titiraki n te boroutia ae Ongeaba Iroun te Atua, e na aki karaoaki te maroro bwa te titiraki ma kaekaana n aron ae ko taneiai ni kakaraoia ngkana ko kaira te reirei n te boki ae Ana Reirei te Baibara. A kan ongoraei karaki angiia aomata n aaba nako. Mangaia are kabonganai taamnei ni karakin iai rongorongo aika kakaongora man te Baibara. Kabwarabwarai taamnei aika i nanona. Kaota ingaingam ni karaoa anne. Tuanga te aomata ae ko reirei ma ngaia te bae noria n te boroutia ao ana iango iai. Wareki kiibu ake i nano ao maroroakini kanoani kiibu akanne ma ngaia. Tabeki titiraki nakoina bwa kam aonga ni kaai ni maroro, ao ni kakoauaa raoi bwa e ota. Ngkana ko reirei ma ngaia n te boroutia ae Ongeaba Iroun te Atua ao Ko na Maiu n Aki Toki, wareka kanoan te boroutia ao kiibu ma ngaia ngkana kam maroroakin taamnei.
7. Ti na kanga ni buoka te aomata ae ti reirei ma ngaia n te Baibara bwa e na rikirake?
7 Buokia Bwa E na Rikirake: Te kantaninga bwa am maroro ma te aomata ae ko reirei ma ngaia n te Baibara, e na kaungaaki iai nanona ni karekea rabakauna ni wareware n te aro are e a kona ni karekea i bon irouna te atatai ibukin Iehova. (Mat. 5:3; Ioa. 17:3) Ma ngkana ko maroro ma ngaia n te boroutia ae Ongeaba Iroun te Atua, ma ko a ataia bwa e a rabakau ni wareware, kam a kona n reirei n te boroutia ae Ongeaba Iroun te Atua ao Ko na Maiu n Aki Toki. N aki ongeia bwa te boroutia raa ae ko kabongana, ma e tuai moa tauraoi ni bwabetitoaki te aomata ae ko reirei ma ngaia ngkana e a bane n rinanoaki kanoan te boroutia anne. Ko riai ni manga reirei ma ngaia n te boki ae Ana Reirei te Baibara ke te boki teuana ae na rikirake riki iai otana n te Baibara.
8. Bukin tera bwa ti kakaitau ibukini bwaai ni mwakuri aika boou aikai ibukin te mwakuri ni minita?
8 A riai n ongeaba aomata iroun te tia Tautaeka i aoni bwaai ni kabane, ngkana a kani karekea te maiu are aki toki. (Ita. 55:3) E kantaningaiia Iehova “aeka n aomata nako,” n ikotaki naba ma te koraki ake a babanga ni wareware bwa a na reiakina aroia n ongeaba irouna. (1 Tim. 2:3, 4) Ai kakaitaura ngaira ibukini bwaai ni mwakuri aika boou aikai ake ti kona ni kamanenai n reiakinia iai aomata aroia n ongeaba iroun te Atua!
[Kabwarabwaraan te taamnei interaniba 3]
Aron Tibwaakia
Kaotia nakoni kaain te auti, iteraniba 2-3 ao taekina ae kangai: “Ko kani maeka n te aonnaba ae aron aei? [Kariaia te kaeka.] E beritanaki ni kibun te Baibara [ke e beritanaki n te boki ae tabu aei] bwa e a kaan ana tai te Atua ni bita te aonnaba aei nakon te tabo ae tamaroa ao n rau, ike akea iai te maiu ni kainnano ke te aoraki. Nora te bwai ae ti riai ni karaoia bwa ti aonga n roko iai. [Wareka Itaia 55:3, ae kaotaki mai eta n iteraniba 3.] Ti tuangaki n te kibu aei bwa ti na ‘katanimai taningara’ nakon te Atua ao n ‘ongeaba’ irouna. Ma ti na kanga n ongeaba iroun te Atua?” Rairia nakon iteraniba 4-5 ao maroroakina kaekaan te titiraki anne ma ngaia. Ngkana e tabetabe te aomata, katuka te boroutia irouna ao bairea manga okim ni maroroakina kaekaan te titiraki.