Ko Ataia?
Bukin tera bwa e aranaki Ninewe rimoa bwa “te kawa ae kakatutu raraa”?
Boni kautun te Embwaea n Aturia, Ninewe. Bon te kaawa ae rangi ni bubura ma baareti ao tembora iai aika rangi ni kantara, a raababa kawaina ao a ririeta ooia. Ma e taekinna te burabeti ae te I-Ebera ae Naum bwa “te kawa ae kakatutu raraa.”—Naum 3:1, BG.
E kakoauaaki n te taamnei are e koreaki i aon oon ana baareti Tennakeriba bwa a rangi n tiritiri kaain Aturia. E kaotaki naba n te taamnei teuana aroia ni kammaraka te taenikai are e tauraki ni katikaanako newena ni karokoa matena. E kaotaki naba n te koroboki teuana i aon te oo, bwa a kaiririia aia taenikai ni katekean te matau i bwairiia ke riaia. A kairoroiia naba mataniwi n taabo ake a taenikai bwa a na mwaenia n atun aia uea, kaanga te mwae ae kakunnainga.
E kabwarabwaraa te katuturaraa imwini buakanakin te kaawa, te tia rabakau ibukin rongorongoia kaain Aturia ae Henry Sayce ni kangai: “A kanikinaea kawaia ni kabwarikoan atuia aomata ake a konaaki, a kabuekia ataeinimwaane ao ataeinnaine aika maiu ke ni bwainikirinia tabeman n te aro ae kakaiaki riki, a tauraki mwaane, a taeki kunia aomata, a kamatakia, ke a korei naba baia ma waeia, taningaia ao bwairiia.”
Tera te kantaninga ni katean oon taubukin aia auti I-Iutaia ae rinano?
E tua ae kangai te Atua nakoia I-Iutaia: “Ngkana ko katea am auti ae bou, ao ko na katea on buian aona. E aonga n aki baka te aomata mai iai.” (Te Tua-Kaua 22:8, BK) E kakawaki te tua ibukin te kamanomano aei irouia utu nako aika I-Iutaia bwa a riai ni katea ooni bwian aona, ngkai a rangi ni kakamanena taubukin aia auti n taai ake a karakinaki n te Baibara.
A borababaua taubukin aia auti angiia I-Iteraera. E rangi n raoiroi taubukin te auti ibukin aia tabo aomata ni kaabueia n te riringa, ni kaukiang, ke ni karaoi tabeia tabeua iai. E rangi ni kamwengaraoi te matu iai n tain te kabuebue. (1 Tamuera 9:26) E kamanena naba taubukin te auti te tia ribana n taawaa iai ana uita imwain ikakina ke n taawai iai ana biiku ao ana kureebe aika mwau.
E kamanenaaki naba te taubuki ibukin te taromauri ae koaua ao taromauriani boua. (Neemia 8:16-18; Ieremia 19:13) E tamwarake te abotoro Betero nako taubukin te auti n tataro n te tawanou. (Mwakuri 10:9-16) E kona naba n riki bwa te tabo ni kamaangang ae raoiroi ngkana e kanuuaki n aroka aika kureebe ke baani baam.
E taekinaki n te boki ae The Land and the Book ibukin aia auti I-Iteraera bwa iai aia kaintamwarake nako taubukina, “i tinanikun te auti, ma bon i nanon naba abaia.” Ngaia are e kona n nako mai taubukin te auti te aomata n aki rin n te auti. Tao e mataata n aei ana kauring Iesu ibukin te aki tabwarabwara ni birinako man te kaawa ae e nang kamaunaaki ngke e kangai: “Ane mena i taubukin te auti, e na aki ruo n anai ana bwai n ana auti.”—Mataio 24:17.