TITIRAKI AIKA KAEKAAKI MAN TE BAIBARA

Iai te kantaninga ibukia maate?

Titeboo te matu ma te mate ike a aikoa namakinaaba iai ao a aki kona naba ni karaoa te bwai teuana. Ma e ngae n anne, e kona te tia Karikiriki ni kaoki maiuia maate rinanoni kautakia. Ibukini kakoauaan anne, e anganaki te mwaaka Iesu iroun te Atua bwa e na kautiia tabeman man te mate.​—Wareka Te Minita 9:5; Ioane 11:​11, 43, 44.

E a tia ni beritanna te Atua bwa a na kautaki maate ake e uringia nakon te maiu n te waaki ae boou i aon te aba ae raoiroi. A teimatoa ni mate te koraki ake a na kautaki ni karokoa e a manga kautiia te Atua. E ingainga te Atua ae Moan te Mwaaka ni manga kaoki maiuia maate.​—Wareka Iobi 14:​14, 15.

E na tera aron te mangauti?

Ngkana e kautiia aomata te Atua, a na boni kona ni kinaia i bon irouia, raoraoia ao aia utu naba. E ngae naba ngkana e a tia ni mka rabwatan te aomata, ma e kona te Atua ni kauta te aomata anne ma rabwatana ae boou.​—Wareka 1 I-Korinto 15:​35, 38.

Ma tii tabeman aika a na kautaki nako karawa. (Te Kaotioti 20:6) A na kautaki angiia aomata nakon te aonnaba are e na onikaki nakon te bwaretaiti. A na anganaki te koraki aei maiuia ae boou ao kantaningaan te maiu n aki toki.​—Wareka Taian Areru 37:29; Mwakuri 24:15.