E Tarataraiko Te Atua

BUKIN NANOKOKORAKIA TABEMAN: N te kakaae are e a tibwa tia ni karaoaki, tao iai kanoan ara nna n itoi taiani buraneti ae e aki kee mwaitiia i aan 100 te birion. A bati aomata aika titiraki ibukin abwakin ara iuniweeti ae rangi ni bubura: ‘Bukin tera ngkai e na taratarai aia mwakuri aomata aika mangori n aia buraneti ae rangi n uarereke te tia Karikiriki ae moan te mwaaka?’

TE REIREI MAN ANA TAEKA TE ATUA: E aki tii anganira te Atua te Baibara ao imwina e aikoa tabeakinira. Ma e karaunanora Iehova ni kangai: “N na reireiko ma n tuangko te kawai ae ko na nakonako iai.”—Taian Areru 32:8, BG.

Iangoa Aka are ainen Aikubita n te ka-20 tienture B.C.E. Bon ana tia mwakuri Tarai ae aki karinerine Aka, mangaia are e a kamaamaeaki iroun ana toka ao e birinako nakon te rereua. E aki tabeakinaki Aka iroun te Atua ngkai e a tia ni karaoa ae bure? E taekinaki n te Baibara ni kangai: “E reke neierei iroun aneran Iehova.” E karauaki nanon Aka iroun te anera anne ni kangai: “E ongo rawawatam Iehova.” E taetae Aka nakon Iehova imwina ni kangai: “Te Atua ae Ko matairiki Ngkoe.”—Karikani Bwaai 16:4-13, BG.

E tarataraiko te ‘Atua ae matairiki.’ Ni kabwarabwaraana: E tarataraiia riki natina aika uarereke te tina ae tatangira, kioina ngkai e kainnanoa riki mwannanoana te ataei ae uarereke riki iroun ana karo. N aron naba anne, e tarataraira riki te Atua kioina ngkai ti mangori ao ni mamaara. E kangai Iehova: “I maeka n te tabo are rietata are tabu . . . ba N na manga kamaiui tamneiia akana nanorinano, ma ni kamaiui nanoia akana raraoma.”—Itaia 57:15, BG.

Ma ko kona n iango ni kangai: ‘Tera aron taraakiu iroun te Atua? E motika taekau n taraakiu ke e nora ae raba ao ni kinaai raoi?’