Por onde empezar?

Que podes facer para desfrutar da lectura da Biblia e sacar o máximo proveito dela? Imos ver cinco ideas que lles funcionaron a moitas persoas.

Escolle ben o momento e o lugar. Busca un sitio tranquilo. Se reduces as distraccións e tes unha boa iluminación e ventilación, concentraraste máis na lectura.

Le cunha mente aberta. A Biblia é un agasallo do noso Pai celestial. Para sacar o máximo proveito de lela, faino coa mesma actitude que tería un neno que quere aprender de seu pai. Deixa de lado calquera idea negativa ou prexuízo que teñas dela, e permite que Deus che ensine (Salmo 25:4).

Ora antes de empezar. A Biblia vén de Deus, así que é lóxico que precisemos a súa axuda para entendela. El promete que lles dará “Espírito Santo ós que llo pidan” (Lucas 11:13). O espírito santo pode axudarche a entender o xeito de pensar do Creador. E co tempo, chegarás a entender “mesmo as profundidades de Deus”(1 Corintios 2:10).

Pensa no que les. Non leas por ler. Máis ben, pensa no que vas lendo e pregúntate: “Que calidades demostrou o protagonista deste relato? Como podo levar á práctica o que estou aprendendo?”.

Ponte obxectivos concretos. Para desfrutar de ler a Biblia, esfórzate por aprender algo que che axude a mellorar a túa vida. Podes poñerte obxectivos como coñecer mellor a Deus ou ser mellor persoa, mellor marido ou muller. Despois, escolle partes da Biblia que che axuden a alcanzar estes obxectivos.a

Estas cinco suxestións poden axudarche a empezar. Pero, que podes facer para que a lectura da Biblia sexa máis interesante? No seguinte artigo vas atopar máis ideas.