Jehova Mhojea Magnneancho Zobab Ditolo Kai?

1-2. Jehova amchea magnneancho zobab dina oxem amkam kiteak disot?

JEHOVAN aplea Utrant amkam ekdom bori bhas dilea. Thoim sanglam: “Sorvespora sovem asum sogllo tuzo sontos: tujem kalliz axeta titlem-i To tuka ditolo.” (St. 37:4) Punn him utram vachun, ami magtat tem soglem Jehova amkam rokddoch ditolo mhunn ami opekxa korunk zata kai? Ami amkanch ho prosn vicharop khub mhotvachem zaun asa. Kiteak? Sokol dilolea poristhiti vixim chintat. Ek ankvar bhoinn, tika Raj-porgottnnarank Korsa pasot apounnem mellom mhunn Jehova lagim magnnem korta. Punn zaitim vorsam soron voitat ani torui tika apounnem mellona. Ek tornnatto bhav sobhent anikui vavr korunk sodhta dekhun, apleak aslolem gombhir duens kaddun udoi mhunn to Jehova lagim magta. Punn tachi bholaiki bori zaina. Ani ek Kristi avoi-bapui, tanchea bhurgeak kednanch sot soddun vochonk dium naka mhunn Jehova lagim magtat. Punn to bhurgo Jehovak soddun voita.

² Ghoddie ami pasun Jehova lagim kitem tori maglam astolem, punn tem azunui amkam mellonk na zait. Hea karonnak lagon, Jehova dusreanchea magnneank zobab dita, punn amchea magnneank zobab dina oxem amkam disot. Vo ami Jehovak dukhoita toxem kitem tori kelam oxem ami chintit. Janiceb nanvache eke bhoinnik oxench dislem. Ti ani ticho ghov Bethel-ant seva korunk sodhtalim. Tor tankam thoim apounnem mellom mhunn tannim Jehova lagim magnnem kelem. Bhoinn sangta: “Amkam rokddinch Bethel-ant apoitolim mhunn mhaka khatri asli.” Punn zaite mhoine gele, vorsam gelim, torui tankam apounnem mellonk na. Ti mhunntta: “Hanv ekdom niraxi zalem. Hanvem Jehovak dukhoita toxem kitem kelam kai, mhunn hanv chintunk laglem. Bethel-ant seva korchea vixim hanvem tache lagim bhorpur magnnim kelʼlim. Tor tannem mhojea magnneacho zobab kiteak diunk na?”

3. Hea lekhant amkam kitem kollon ietolem?

³ Jehova amchim magnnim aikota tori kai, oxem thodde pavtt amkam disot. Adlea thoddea visvaxi sevokank pasun oxench dislem. (Job 30:20; St. 22:2; Hab. 1:2) Tor Jehova amchea magnneank kan bhero korcho na, punn tim aikotolo ani tancho zobab ditolo mhunn ami kiteak khatri dovrunk zata? (St. 65:2) Hea prosnacho zobab zannam zaunk ami poilim hacher dhean dium-ia: (1) Ami Jehova thaun kitem opekxa korunk zata? (2) Jehova amchea thaun kitem opekxa korta? (3) Ami jem magtat tantunt thodde pavtti amkam kiteak bodol korunk poddot?

AMI JEHOVA THAUN KITEM OPEKXA KORUNK ZATA?

4. Jeremias 29:12 pormonnem, Jehova amkam kitem bhas dita?

⁴ Jehova amchim magnnim aikotolo mhunn tannem bhas dilea. (Jeremias 29:12 vachat.) Ami visvaxiponnan Jehovachi seva kortat dekhun to amcho khub mog korta. Tor to amchea magnneank kan bhere korcho na. (St. 10:17; 37:28) Punn hacho orth oso nhoi ki ami jem kitem magtat tem soglem to amkam ditolo. Ami magloleo thoddeo vostu ghoddie amkam novea sonvsarantuch mellot.

5. Amchim magnnim aikotana Jehova kitem monant dovorta? Somzaiat.

⁵ Amchim magnnim aikotana Jehova aplo udʼdhex monant dovorta. (Iz. 55:8, 9) Hea udʼdhexant prithumer aslolea soglea munxamnim apleak raza mhunn manlolo, ani tachi seva ekvottan ani khuxalkaien keloli hem pasun mellon asa. Punn munis apunn zaun bore toren raz cholounk xokta oxem Soitan sangonk sodhtalo. (Ut. 3:1-5) Hem fott mhunn dakhoun diunk Jehovan munxank toxem korunk soddun dilem. Ani aiz munis raz choloita dekhun, amkam zaitea trasancho fuddo korcho poddtta tem ami pollounk xoktat. (Up. 8:9) Jehova he sogle tras atanch kaddun uddouncho na mhunn ami zannant. Karonn to oxem korta zalear, munis bore toren raz cholounk xokta oxem Devak maninant te lok chintunk xoktat.

6. Jehova korta tem soglem mogan ani nitin korta mhunn ami kiteak khatri dovrunk zata?

⁶ Ek-sarkeach magnneank Jehova veg-veglle toren zobab diunk xokta. Hem somzonk, Raza Hezekiah ani apostl Pauluk kitem ghoddlem tacher dhean diat. Raza Hezekiah ekdom duent poddlo tednam, tannem Jehova lagim roddon apleak boro kor mhunn vinoti keli. Ani Jehovan taka boro kelo. (2 Raz. 20:1-6) Punn dusrea vatten, apostl Paulun aplea ‘kuddint toplolo kantto,’ tem mhunnttlear ghoddie taka asloli ek pidda, kaddun uddoi mhunn Jehova lagim vinoti keli tednam, Jehovan tem kaddun uddounk na. (2 Kor. 12:7-9) Toxench apostl Jakob ani Pedruk kitem ghoddlem tea vixim chintat. Raza Herod tankam dogainkui jivexim marunk sodhtalo. Tea vellar sobhechea bhav-bhoinnamnim Pedru pasot, ani chodd korun Jakoba pasotui khub magnnim kelim. Punn Jakobak jivexim marlo ani Pedruk Jehovan ojapache ritin vanchoilo. (D.I. 12:1-11) Tor ‘Jehovan Pedruk kiteak vanchoilo, ani Jakobak kiteak moronk dilo’ oxem ami chintunk xoktat. Bible-ant hea vixim sangonk na.c Punn Jehova jem kitem korta tem soglem ‘nitin’ korta mhunn ami khatri dovrunk zata. Hacho orth to kednanch onʼneai korina. (D.S. 32:4) Ani Pedru toxench Jakobak Jehovachi maniotai asli mhunn ami ugddas dovrunk zai. (Prok. 21:14) Tor thodde pavtti, amchea magnneank amkam zai toslo zobab Jehova ghoddie diuncho na. Punn to korta tem soglem mogan ani nitin korta mhunn amkam khatri asa dekhun, to khoinchea toren zobab dita tacher ami kednanch dubhavchim nant.—Job 33:13.

7. Ami kitem korunk proitn korcho nhoi, ani kiteak?

⁷ Ami amchi poristhiti dusream sangata sor korunk proitn korcho nhoi. Punn thodde pavtti ami oxem korunk xoktat. Udharonnak, umke eke toren amkam modot kor mhunn ami Jehova lagim maglem astolem. Punn toxem zaunk na zait. Magir amkam kollon ieta ki eka bhavan vo bhoinnin amcheach sarkem magnnem kelʼlem, ani Jehovan tachem magnnem aikolem. Bhoinn Anna sangata oxench ghoddlem. Ticho ghov Matthew-ak cancer zalʼlo, ani taka boro kor mhunn tinnem Jehova lagim magnnem kelʼlem. Teach vellar don zannttea bhoinnankui cancer aslo. Tor bhoinn Anna-n, tichea ghova pasot ani tea don bhoinnam pasot Jehova lagim khub vinoti keli. Teo bhoinno boreo zaleo, punn Matthew bhair poddlo. Tor survatek Anna-n oxem chintlem: ‘Tea bhoinnank Jehovan borim kelim kai? Toxem zalear, Jehovan mhojea ghovak kiteak boro korunk na?’ Teo bhoinno kiteak lagon boreo zaleo tem ami nokllo. Punn ami itlem zannant ki fuddarak Jehova sogle dukh-tras sasnak kaddun uddoitolo, ani moron gelʼlea aplea ixttank jivont korunk to axeta.—Job 14:15, NW.

8. (a) Izaias 43:2-a pormonnem, Jehova amkam koso modot korta? (b) Trasancho fuddo kortana, magnnea vorvim amkam koxi modot zaunk xokta? (Magnnem Amkam Tras Sosunk Modot Korta, ho video polloiat.)

⁸ Jehova amkam sodanch modot kortolo. Amcho bapui Jehova, amcho khub mog korta ani ami tras soslole taka naka. (Iz. 63:9) Punn hacho orth, amcher ietat te sogle tras to addaita oxem nhoi. Thodde pavtti, amkam nodi ani ujea sarkea trasancho fuddo korunk poddtta. (Izaias 43:2 vachat.) Punn ‘tantuntlean vochonk vo te sosunk’ to amkam modot kortolo mhunn tannem bhas dilea. Ani ami atam koslea-i trasancho fuddo korum, aplea sangata sodanch amchi ixttagot ghott samballunk, to amkam goroz tem soglem diun modot kortolo. Itlench nhoi, amche tras sosunk to amkam apli bollixtt povitr xokti pasun ditolo. (Luk. 11:13; Filp. 4:13) Hea vorvim ami sodanch taka visvaxi ravonk pavtolim.d

JEHOVA AMCHEA THAUN KITEM OPEKXA KORTA?

9. Jakob 1:6, 7-a pormonnem, Jehova amkam modot kortolo mhunn ami kiteak visvas dovrunk zata?

⁹ Ami Jehovacher visvas dovorlolo taka zai. (Heb. 11:6) Amcher ietat tea trasancho ami fuddo korunkuch xokchimnant, oxem amkam thodde pavtti disonk xokta. Itlench nhoi, Jehova amkam modot kortolo kai na mhunn pasun ami dubhavunk xoktat. Punn Bible amkam khatri dita ki Jehovachea povitr xokten ami ‘kott’ttachim durgam choddonk’ xoktat. (St. 18:29) Tor Jehovacher dubhavchea bodlek, to amchim magnnim aikotolo ani zobab ditolo mhunn ami ghott bhavarthan magonk zai.—Jakob 1:6, 7 vachat.

10. Ami amchea magnneam pormonnem kam kortat mhunn koxem dakhounk zata tem somzaiat.

¹⁰ Amchea magnneam pormonnem ami kam kelʼlem Jehovak zai. Chintat, ek bhav odhivexonak vochonk apnnak sutti mellonk Jehova lagim magnnem korta. Tor Jehova tachea magnneacho zobab koso diunk xokta? To taka tachea patranva lagim ulounk dhir diunk xokta. Punn tea bhavan aplea patranva lagim vochon ulounk poddttolem. Taka ghoddie oxem zaite pavtti korunk poddot. Ani tea disa bodlek, to dusrea khoinchea-i disak kam kortolo, oxem-i to patranvak sangonk xokta. Toxench goroz poddlear, tea disacho pagar dina zalear pasun cholta mhunn tannem taka sangonk zata.

11. Ami amchea uskeam vixim porot-porot kiteak magnnem korunk zai?

¹¹ Ami amchea uskeam vixim porot-porot magnnem kelʼlem Jehovak zai. (1 Tes. 5:17) Jezuchea utrantlean amkam kollon ieta ki amkam thoddea magnneancho zobab rokddoch mellchona. (Luk. 11:9) Tor ami soddun diunchem nhoi, punn kallzant thaun ani porot-porot Jehova lagim magnnem korunk zai. (Luk. 18:1-7) Oxem korun, ami jem maglam tem bexttem magonk na, punn amkam khoreaninch tachi goroz asa, ani Jehova amkam modot korunk xokta mhunn amkam bhavarth asa oxem ami dakhoun ditat.

AMI JEM MAGTAT TANTUNT THODDE PAVTTI AMKAM KITEAK BODOL KORUNK PODDOT?

12. (a) Amchea magnneam vixim ami amkanch koslo prosn vicharunk zai, ani kiteak? (b) Amchim magnnim Jehovak man ditat toxim asat, mhunn ami koxi khatri korunk zata? (“Mhojim Magnnim Jehovak Man Ditat Toxim Asat Kai?” hem boks polloiat.)

¹² Amkam amchea magnneacho zobab mellona zalear, ami amkanch tin prosn vicharunk zatat. Poilo, ‘Hanv Jehova lagim jem magtam tem sarkem asa kai?’ Choddxe pavtti, amkam kitem borem tem amkam khobor asa, oxem ami chintʼtat. Punn tem amkam ghoddie fuddarak faideak poddchem na zait. Thodde pavtti, amchi oddchonn umkech toren suttavi kor mhunn ami Jehova lagim magtat astolim. Punn tachea lagim ti suttavi korunk anikui bori vatt asa zait. Toxench, thodde pavtti ami jem magtat tem Jehovachea khuxe pormonnem na astolem. (1 Ju. 5:14) Udharonnak, ami poilea peregrafant uloilʼlea avoi-bapai vixim chintum-ia. Aplo bhurgo sotant urom mhunn tannim Jehova lagim magnnem kelʼlem. Ani hem magop sarkem oxem disonk xokta. Punn apli seva korunk Jehova konnacheruch dobhav ghalchona mhunn ami ugddas dovrunk zai. Ami sogleamnim, hoi amchea bhurgeamnim pasun tachi seva korunk vinchun kaddlolem taka zai. (D.S. 10:12, 13; 30:19, 20) Tor aplea bhurgeak ap-khuxen tuzo mog korunk, ani tuzo ixtt zaunk amkam tachea kallzant sot rigounk modot kor mhunn tea avoi-bapaimnim magonk zatalem.—Mho. 22:6; Ef. 6:4.

13. Hebrevank 4:16 pormonnem, Jehova amchea magnneacho zobab kednam ditolo? Somzaiat.

¹³ Ami amkanch vicharunk zata to dusro prosn mhunnttlear, ‘Mhojea magnneacho zobab diupacho ho Jehovacho sarko vell kai?’ Amchea magnneacho Jehovan rokddoch zobab diunk zai oxem amkam disot. Punn to zobab diupacho sarko vell Jehova bore toren zannam. (Hebrevank 4:16 vachat.) Amkam rokddoch amchea magnneacho zobab mellona tednam, ami maglam tem Jehova dina oxem amkam disot. Punn ghoddie to amkam oxem mhunnonk sodhta: ‘Hanv tuka atam nhoi punn magir ditolo.’ Ami poilea peregrafant uloilʼlim tea tornnattea bhavacho ugddas korat. Apleak aslolem gombhir duens kaddun uddoi mhunn tannem Jehova lagim maglolem. Punn Jehovan vizmit korun taka boro kelʼlo zalear, Soitan Jehovak oso mhunn tomnno martolo aslo: ‘Tunvem taka boro kelo dekhunuch to tuji seva korit asa.’ (Job 1:9-11; 2:5) Toxench, Jehovan soglim duensam kaddun uddounk ek vell tharaila mhunn ami ugddas dovrunk zai. (Iz. 33:24; Prok. 21:3, 4) Ani to vell ieta meren, Jehova vizmitam korun amkam aslolim duensam kaddun uddoitolo mhunn ami opekxa korunk zaina. Tor tea bhavan, apleak visvaxiponnan tuji seva korit ravonk modot kor, ani tem duens sosunk apleak ghottai ani monachi xanti di mhunn Jehova lagim magonk zatalem.—St. 29:11.

14. Janice-achea onnbhovantlean tumi kitem xiklim?

¹⁴ Ami porot bhoinn Janice-achea udharonnacher dhean dium-ia. Tinnem Jehova lagim, apleak Bethel-ant vochonk apounnem mellom mhunn magnnem kelʼlem. Punn panch vorsam uprant tika kollon ailem ki Jehovan tichea magnneacho zobab tika zai toso nhoi, punn veglle toren dilʼlo. Ti mhunntta: “Jehovan mhaka tea vellar zaitem xikoilem, ani bore Kristi gunn vaddounk modot keli. Hanvem Jehovacher visvas vaddouncho ani Bible-acho anik bariksannen obheas korchi goroz asli mhunn mhaka kollon ailem. Toxench, hanv khoinsorui Jehovachi seva korun khuxal asonk xokta mhunn hanv zannam zalem.” Uprant tika ani tichea ghovak, sorkittachem kam korunk apounnem mellʼllem. Tinnem jem onnbhovlem tea vixim ti oxem mhunntta: “Mhaka zai tea toren Jehovan mhojea magnneacho zobab diunk na tem khorem, punn tannem zobab dilo. Ani tannem to ekdom bore toren dilo. Mhaka Jehovacho mog ani tachi doia onnbhovunk mellʼlli mhunn hanv tache khub upkari!”

15. Thodde pavtti, umkench kitem zai mhunn ami magonant tednam kitem zata? (Chitram pasun polloiat.)

¹⁵ Ami amkanch vicharunk zata to tisro prosn mhunnttlear, ‘Hanv Jehova lagim jem magtam tantunt hanvem bodol korunk zai kai?’ Jehova lagim amkam umkench kitem zai mhunn magop borem. Punn thodde pavtti ami toxem korinant tednam, amche pasot Jehovachi khuxi kitem asa tem ami ghoddie zannam zaunk pavtolim. Ami poilea peregrafant uloilʼlea ankvar bhoinnichea udharonnacher dhean dium-ia. Tika porgottnnarachim chodd goroz asa thoim vochon seva korunk zai asli dekhun, tika Raj-porgottnnarank Korsa pasot apounnem mellʼllom mhunn tinnem Jehova lagim magnnem kelʼlem. Tor ti hea vixim Jehova lagim magnnem korit asli tea mhunnosor, tinnem khoinchea vattamnim apli porgottnni vaddounk zata tem zannam zaunk apleak modot kor mhunn pasun magonk zatalem. (D.I. 16:9, 10) Ani uprant aplea magnneam pormonnem kam korunk, khoinchea-i lagxilʼlea sobhent pioneer-anchi goroz asa kai mhunn sorkittachi dekhrekh korpeak vicharunk zatalem. Vo tinnem xakha ofisak, khoinchea zagear porgottnnaranchi chodd goroz asa mhunn vicharunk chitt borounk zatali.e

16. Ami kosli khatri dovrunk zata?

¹⁶ Ami hea lekhant xiklim toxim, ami khatri dovrunk zata ki Jehova sodanch, mogan amchea magnneacho zobab ditolo ani kednach onʼneai korcho na. (St. 4:3; Iz. 30:18) Thodde pavtti amkam zai tea toren to amchea magnneank zobab dina. Punn to amchea magnneank kednanch kan bhere korcho na. Karonn to amcho khub mog korta ani to amkam kednanch sanddchona. (St. 9:10) Tor ami ‘sodanch tacher visvas dovrum-ia,’ ani amchea kallzant asa tem soglem taka magnneant sangom-ia.—St. 62:8.