ખાસ આમંત્રણ

૧. મહાસંમેલનની આમંત્રણ પત્રિકાની ઝુંબેશ ક્યારથી શરૂ કરીશું?

^૧ કલ્પના કરો કે, તમે કુટુંબ કે મિત્રોને જમવા બોલાવવાના છો. એ ઘણો ખર્ચો અને મહેનત માંગી લે છે. એ આમંત્રણ આપવા તમે કેટલા ઉત્સાહી હશો! એવી જ રીતે, આવનાર મહાસંમેલન અને આંતરરાષ્ટ્રીય સંમેલનમાં, યહોવા તરફથી આપણને ભરપૂર જ્ઞાન મળે એ માટે ખૂબ જ મહેનત કરવામાં આવી છે. સંમેલનના ત્રણ અઠવાડિયાં પહેલાં એનું આમંત્રણ આપવાનો આપણને લહાવો છે. ઉત્સાહથી એ આમંત્રણ આપવા આપણને શું મદદ કરશે?

૨. આ ઝુંબેશમાં પૂરા ઉત્સાહથી ભાગ લેવા આપણને શું મદદ કરશે?

^૨ યહોવા આપણને સંમેલન દ્વારા ભરપૂર જ્ઞાન આપવાના છે. એનાથી મળતા લાભ વિશે વિચારીશું તો, ઝુંબેશમાં પૂરા ઉત્સાહથી ભાગ લેવા આપણને ઉત્તેજન મળશે. (યશા. ૬૫:૧૩, ૧૪) યાદ રાખીએ કે દર વર્ષે રાખવામાં આવતી ઝુંબેશથી સારાં પરિણામો આવે છે. (“સારાં પરિણામો મળે છે” બૉક્સ જુઓ.) આમંત્રણ આપ્યું છે એમાંના અમુક લોકો સંમેલનમાં આવશે. લોકો આવે કે ન આવે, તોપણ, ઝુંબેશમાં જે મહેનત કરીશું એનાથી યહોવાને મહિમા મળશે. તેમ જ, તેમની ઉદારતા દેખાઈ આવશે.—ગીત. ૧૪૫:૩, ૭; પ્રકટી. ૨૨:૧૭.

૩. આમંત્રણ પત્રિકાનું વિતરણ કઈ રીતે કરવામાં આવશે?

^૩ દરેક મંડળના વડીલો નક્કી કરશે કે પત્રિકાનું વિતરણ કઈ રીતે વધારે કરી શકાય, ઘર બંધ હોય ત્યાં પત્રિકા મૂકવી કે નહિ. તેમ જ, જાહેરમાં પ્રચાર કરતી વખતે પત્રિકા આપવી કે નહિ. શનિ-રવિવારે યોગ્ય હોય તો આમંત્રણની સાથે મૅગેઝિન પણ આપી શકીએ. ઝુંબેશ પૂરી થાય ત્યારે એ જાણીને કેટલા ખુશ હોઈશું કે, આપણે પૂરા ઉત્સાહથી એમાં ભાગ લીધો હતો. તેમ જ, યહોવા તરફથી મળતું જ્ઞાન લેવા બને એટલા લોકોને આમંત્રણ આપ્યું છે!

સારાં પરિણામો મળે છે

વર્ષો પહેલાં એક બહેનને થયેલા અનુભવનો વિચાર કરો. આમંત્રણ પત્રિકાની ઝુંબેશમાં ભાગ લેતી વખતે તેમને લાગ્યું કે, શું આ બધી મહેનત કરવાથી કોઈ ફાયદો થશે. તે વિચારતાં, ‘શું લોકો આમંત્રણ સ્વીકારશે અને સંમેલનમાં આવશે?’ સંમેલનમાં શનિવાર સવારે નજીકમાં બેઠેલા એક શીખ વ્યક્તિને જોઈને તે તેમની સાથે વાત કરવા ગયા. વાતવાતમાં તેમને જાણવા મળ્યું કે કોઈકે તેમને આમંત્રણ આપ્યું છે. તે વ્યક્તિને ઘણા સવાલો હતા અને બહેને સારી રીતે એના જવાબો આપ્યા. તે વ્યક્તિએ જણાવ્યું કે તેમને કાર્યક્રમમાં ઘણી મજા આવી રહી છે. તેમ જ, ત્યાંના લોકોના સારાં વાણી-વર્તન અને પહેરવેશ તેમના દિલને સ્પર્શી ગયા છે. એ જ દિવસે, પછીથી સંમેલનમાં તેમણે પોતાની બાજુમાં બેઠેલા એક યુગલ સાથે વાત કરી. તેઓને પણ આમંત્રણ પત્રિકા મળી હતી. અને તેઓ સંમેલનમાં બસમાં આવ્યા હતા. તેઓ સંમેલનનો આનંદ માણી રહ્યા હતા અને તેઓએ રવિવારે પણ આવવાનું નક્કી કર્યું હતું. આ અનુભવ પરથી, આપણા બહેન જાણી શક્યા કે વાર્ષિક ઝુંબેશ કેટલી મહત્ત્વની છે.
હાલમાં થયેલા સંમેલનમાં નિયમિત પાયોનિયર પતિ-પત્નીએ એક વૃદ્ધ યુગલ સાથે વાત કરી. યુગલે તેઓને જણાવ્યું કે, તેઓ પહેલી વાર આ સંમેલનમાં આવ્યા છે. પાયોનિયરે તેઓને પૂછ્યું, “તમને કોણે આમંત્રણ આપ્યું?” તેઓએ કહ્યું, “એક દિવસે અમે ઘરે આવ્યા ત્યારે દરવાજા નીચે આમંત્રણ પત્રિકા પડી હતી.” તેઓએ એ આમંત્રણ પત્રિકા વાંચી અને પાછલા પાને આપેલી કુપન પણ ભરી દીધી. સંમેલનમાં આવેલાં બીજાં ભાઈ-બહેનોએ પોતાનું જમવાનું એ યુગલ સાથે વહેંચીને ખાધું. તેઓને એ કાર્યક્રમમાં એટલી મજા આવી કે તેમણે બીજા દિવસે પણ આવવાનું નક્કી કર્યું. તેઓનો રસ જાળવી રાખવા ફરી મુલાકાતની ગોઠવણ કરવામાં આવી.