Püchajaa süchiki pütchi jalouijeetka pümüin suluʼujee tü Bibliakat

Waashajeʼerapa tü Bibliakat wekirajaa sooʼomüin süpüla wayaawatüin saaʼu tü pütchi anakat maʼin. ¿Kasa waaʼinrajatka süpüla anain wakuwaʼipa sünainjee?

Wekirajaa maʼin süchiirua kasain maʼin alatüin sünain wanee aküjalaa. Eesü süpüla pikirajaain sünain jaralin kashajalain tia pütchikat, jarat kamüinjatka shia, joujatüin süshajünüin, kasain alatüin süpülapünaa tia jee kasain alatüin süchikijee.

Jülüja paaʼin tü pütüjakat sünainjee. Wekirajaapa anasü wasakirüle waaʼin sünain tüü: «¿Jamüsü naaʼin na wayuu aashajaanakana achiki suluʼu tia wetsiikulokot? ¿Kasa anaka sünain nakuwaʼipa? ¿Jamüsü tashatüinjatka shia? ¿Kasa mojuka natuma? ¿Jamüsü eejüinjatka taaʼin suulia sülatüin tamüin tia?».

Waaʼinra tü wekirajaakalü anain. Waküjapa pütchi jee namaapa waya na waneinnua, waaʼinra tü wekirajaakalü anain. Waaʼinrüle tia, oonooshii waya sümaa tü sümakat Salmo 107:43 tü makat: «Chi eekai kekiin maʼin, jülüjeerü naaʼin tia kasakalüirua».

• Eeka süpüla paaʼinrüin: Anasü püshatüle sukuwaʼipa tü aainjünakat sünain tü outkajawaakat Wakuwaʼipa otta Waʼyataain nümüin Maleiwa, tü kanüliakat «Korolo kojutusü suluʼuka tü Bibliakat». Yala, ekirajaana anainrü tü pütchi jalouikat wamüin, eesü pütchi wasakireʼerüinjatka anain waaʼin jee müsia ayaakuaa wekirajaainjatka anain.