Süsakiraka anain wayuu
¿Shiache neʼe nekaka na israelitakana tü kanüliakat maná otta codorniz chaa isashiipaʼa?
Soʼunnaa tü 40 juya chajanakalü oʼu na israelitakana chaa isashiipaʼa shia nekaka maʼin tü kanüliakat maná (Éx. 16:35). Otta piantua naapüin Jehová namüin tü wüchii kanüliakat codorniz süpüla neküin shia (Éx. 16:12, 13; Núm. 11:31). Eepejeʼe waneirua kasa nekaka soʼu tia, shiajaʼa neʼe nnojoluin wainmain shia napüla.
Jamüshijaʼa Jehová nuʼunirüin naya eemüinjanale neemeraain. Shiasaʼa nantapa chamüin, eesü napüla wüin jee waneirua kasa eeka süpüla neküin (Núm. 10:33). Nuʼunirüin naya eemüin tü kanüliakat oasis de Elim, eejatü chayaa 12 eejeere süparalüin wüin otta 70 palmera, eesüjaʼa shiale tü palmera datilera münakat (Éx. 15:27). Süküjain tü karaloʼutakat Plants of the Bible eein tü palmera datilera münakat «suluʼu wainma mma, [...] shia tü wunuʼu ekünakat maʼin achon isashiipaʼa. Wainma wayuu ekaka tia, nayuʼluin seita sünainjee otta anasü maʼin seemioushi.
Eeshiijaʼa nantüle na israelitakana süpüla neemeraain suluʼu wanee oasis müleʼu, Farán münüsü tia maaʼulu. Chajatü suluʼu tü wadi de Farán münakat (tü wadi münakat shia tü nasapüshii münakat wayuunaikiruʼu).a Saashin tü karaloʼutakat Discovering the World of the Bible, «130 kiloometüro sajaʼapüin tia nasapüshiikat, müleʼu maʼin, anasü maʼin otta shia tü eʼraajünakat maʼin chaa Sinaí». Saashin tia karaloʼutakat, sajaʼttiamüin tia nasapüshiikat eesü tü kanüliakat oasis de Farán eejeere süparalüin wüin otta eesü wainma palmera. 4,8 kiloometüro sajaʼapüin tia oasiskat otta yaletüsü shia suulia tü palaakat maʼaka 610 meetüro. Kakaliairü maʼin awaraijaanüin aaʼu tia mmakat sutuma eein wainma palmera datilera chayaa.
Tü palmera datilera münakat eeka suluʼu oasis de Farán
Nojuʼitapa na israelitakana Egiptojee nalüʼüjain ariina, iita eere saainjünüin tü ariinakat, eeshiijaʼa nalüʼüjale süchon pünajüt otta seita. Ajaʼttamaatapejeʼe tia noulia. Alüʼüjashiʼiya naya anneerü otta paaʼa (Éx. 12:34-39). Eesüjaʼa outule wainma namüʼlüin sünainjee chain naya isashiipaʼa, eesüjaʼa noʼutule saaʼin namüʼlüin süpüla neküin shia otta süpüla naʼajüin shia nümüin Maleiwa otta eesüjaʼa naʼajüle shia sümüin namaleiwase (Aluw. 7:39-43).b Watüjaapejeʼe saaʼu kamüʼlüin na israelitakana anneerü otta paaʼa chaa isashiipaʼa sünainjee tü nümakat Jehová namüin wanaa sümaa neʼrüliijaain wayumüin. Nüküjain namüin narülejeenain nachonnii namüʼlüin soʼunnaa 40 juya chaa isashiipaʼa (Núm. 14:33). Müsüjeseʼe eein süpüla nasüin leechi otta neküin asalaa. Palitpejeʼe shia süpüla neküin na apünüinkana miyoone israelita soʼunnaa 40 juya.c
¿Jalasüche eere napüla tü wüinkat jee tü shiküinjatkat namüʼlüin?d Eesüjaʼa shiʼitüle maʼin juya soʼu tia chaa isashiipaʼa, müsüjeseʼe eein süpüla eein mojuui chayaa. Saashin tü karaloʼutakat Perspicacia para comprender las Escrituras, volumen 1, alatüitpa suulia 3.500 juya süchikijee joutpuʼuin wüin chaa Arabia, nnojotsü müin aka saaʼin sukuwaʼipa maaʼulu. Sutuma tü nasapüshii eekat chayaa, watüjaa aaʼu sülatapuʼuin süchi pasanainpünaa sünain. Wayaawatakalaka saaʼu shiʼitüin maʼin juya soʼu tia. Mayaainjeʼe müin tia, ayatüsia keemain sümaa jaʼin maʼin chi Kaʼikai chayaa isashiipaʼa (Deut. 8:14-16). Outushiijeʼe na israelitakana sümaa namüʼlüin nnojorüleje naapüin Jehová wüin namüin (Éx. 15:22-25; 17:1-6; Núm. 20:2, 11).
Nüküjain Moisés namüin na israelitakana naapüin Jehová namüin maná süpüla nayaawatüin saaʼu nnojoluin shiain neʼe katüin atuma soʼu wanee wayuu tü eküütkat, shia kataka atuma soʼu tü Nünüikikat Jehová (Deut. 8:3).
a Paashajeʼera Aapiria Wayuu ojuʼitaka maayoʼu 1 soʼu 1992, süpana 24 otta 25 (alijunaikiruʼusü).
b Aashajaasü tü Bibliakat süchiki piantuain nakua na israelitakana naʼajüin mürüt nümüin Jehová chaa isashiipaʼa. Tü palajatkat nakua shia wanaa sümaa nüneeküin Jehová na sacerdoteinjanakana otta tü wane shia wanaa sümaa saainjünüin tü miʼiraa kanüliakat Pascua. Naaʼinrüin tia soʼu tü juyakat 1512 süpülapünaa wakalia maʼaka wanee juya süchikijee nojuʼitüin Egiptojee (Lev. 8:14–9:24; Núm. 9:1-5).
c Sajaʼttiamüin tü 40 juya chajanakana oʼu na israelitakana isashiipaʼa, nasütüin noulia naʼünüü watta saalii mürüt (Núm. 31:32-34). Ayatapejeʼe neküin maná waneʼereeya nekerotapa suluʼumüin tü Mma Aapünakat namüin (Jos. 5:10-12).
d Wayaawata aaʼu nnojoluin shiküin mürüt tü kanüliakat maná süka nüküjain Jehová namüin na israelitakana nakotchojüinjatüin tü neküinjatkat waneʼewai nakua (Éx. 16:15, 16).