¿Deponü meta Jesús?

Bajayatakujinae ayaibitsaütomonae Jesús yabarakuaikuaijai. Itsiata wünüyapütae ata, kaejiwibeje saya yapütane bajaraponükuene, itsamonae pijinia najamatabüj̈aina itsakueneliwaisi Jesús yabara. ¿Depaliwaisi nakayapütaeyaej̈ana Dioso Pejumeliwaisi bajaraponü yabara?

1. ¿Deponü meta Jesús?

Jesús ángelenü ayaijamatabükuene raja, ponapona atjübütatsia. Jehová ej̈anatsi daj̈itakuene peitsiwajünaeya. Bajaraj̈uata Bibliabaj̈uto yapütaeyaej̈ana bajaraponü kopiayanü Dioso Pej̈ünato (Colosenses 1:​15). Bibliabaj̈uto Jesús yabarajumaitsi Dioso “pepo caenë pexënato”, tsipaji pekobeta ej̈anatsi Jehová (Juan 3:​16). Bajayatami Jehová yajawanakueneba Jesús pekobenaej̈anaenej̈a daj̈itakuenejawanü (lebare Juan 1:​2, 3). Ajenata naasiwaya najuaponaponabeje. Jesús ‘Liwaisi Pekaponaenüʼ, tsipaji Paj̈a Dioso Pejumeliwaisi yapütaeyaej̈ana (Juan 1:​14).

2. ¿Dej̈uanej̈a Jesús runaika irajawabetsika?

Bajayatami bejamatabükuene 2.000 pawaibeje, Jehová pesaüta ayaikuenejawa ej̈ana. Jehová itorobikatsi bajarapaángelenü irabetsika. María wekuanaej̈anatsi bejiwitonükuenia. Bajarapamatakabita bajarapowa abaj̈ü apokenetsiataetsi pebi (lebare Lucas 1:​34, 35). Bajaraponü patsika irabetsika pejumekapanepaenej̈a Paj̈a Peitapetsinükuenetsi, pekapanepaenej̈anua jiwi.a Daj̈ita pewajunupaebiliwaisijawanü Bibliabaj̈uto najumekapanepa bajaraponüjawabelia. Bajaraj̈ua nej̈ata yapütaeyaej̈ana jiwi bajaraponü Cristonükuene, ‘Dioso piasaëtsaponaponaenë Pexënatoʼ (Mateo 16:16).

3. ¿Dejota Jesús ponapona aekonoj̈aeta?

Petüpaekujinae baja, Jesús matakotatsi beángelenükuenia peponaponaenej̈a ikatsia atjübütatsia. Bajarabetsia “caponatsi athëbëabetsia peecaenexa paxa Diosojavatatsia” (Filipenses 2:9). Ajena aekonoj̈aeta baja Jesús ayaijamatabükuenenü; itsiata Jehová matatoj̈enetsia wekuaj̈aina pesaü.

4. Jesús raja apoDioso

Jesús bitso j̈ainae ata pesaü atjübütatsia, itsiata Bibliabaj̈uto nakayapütaeyaej̈ana pejumekowünütsijawa Paj̈a Jehová. ¿Depakuenia yapütanetsi? Pataema VIDEOJAWA paneyapütaenej̈a pewekuaayaijamatabükuenejawa Dioso, Jesucristowekua.

VIDEOJAWA: ¿Jesucristo raja Dioso? (3:​22)

¿Depatsa nej̈ata Jehová?, ¿depatsa nej̈ata Jesús? Paliwaisijawanüje nakayapütaeyaej̈anaena ponübejekuene. Palebare kaeliwaisi kanakujitsia, panelebikujinae panabarükuaikuaijamü tsane paliwaisianü yabaraje:

Palebare Lucas 1:​30-32.

• Pakuenia ángelenü tsipaeba, Jehová raja “PinijiDioso, athëbëtatsia peecaenë”, ¿deponü nej̈ata Jesús?

Palebare Mateo 3:​16, 17.

• ¿Dej̈ua jumaitsi atjübüwetsika pakujinae nabautisaba Jesús?

• ¿Depatsa nej̈ata pejume?

Palebare Juan 14:28.

• ¿Depatsa ayaijamatabükuenenü: pej̈i pej̈ainaenü, itsa jume, pej̈ünato meta?

• Pakujinae Jesús jumaitsi ‘Taj̈aʼ Jehovájawabelia, ¿dej̈ua yabarajumaitsijitsia?

Palebare Juan 12:49.

• ¿Jesúsnej̈a meta bajaraponü, Paj̈abeje kaenü? ¿J̈amünej̈a Jehová, Jesúsbeje kaenü?

5. Jesús Pitapetsinütsi Dioso

VIDEOJAWA: Paliwaisijawanü najumekapanepa Jesúsjawabelia (3:​03)

Palebare papewajunupaebiliwaisijawanü rubena Bibliabaj̈utota, panelebikujinae panabarükuaikuaijamü tsane paliwaisianü yabaraje:

Palebare Miqueas 5:2 paneyapütaenej̈a patomarata naej̈anaejitsipa Dioso Pitapetsinü.b

• Pakujinae naej̈ana Jesús, ¿najumekapanepa bajarapaliwaisi? (Mateo 2:1).

Palebare Salmo 34:20; Zacarías 12:10 paneyapütaenej̈a papewajunupaebiliwaisijawanü Jesús petüpaejawa yabara.

• ¿Papewajunupaebiliwaisijawanü meta najumekapanepa? (Juan 19:​33-​37).

• ¿Papewajunupaebiliwaisijawanü meta Jesucristo itotjiana penajumekapanepaenej̈a?

• ¿Dej̈ua kayapütaeyaej̈ana bajarapaliwaisi Jesús yabara?

PALIWAISI BAJA YAPÜTANETSI

Jesús piasaübeje ángelenü, Dioso Pej̈ünato, Pitapetsinütsinua.

Najamatabünapire

• ¿Dej̈uajitsia Jesús wünürubatsi “kopiayanü Dioso Pej̈ünato”?

• ¿Dej̈ua baitsi tsabiabi Jesús pitorobiwajünaeyatsi irajabetsika?

• ¿Depakuenia yapütanetsi Jesús Dioso Pitapetsinükueniatsi?

YAPÜTAENAME ITSALIWAISI

Taema itsaliwaisianü neyapütaenej̈a Jesús pepakuene Dioso Pitapetsinütsi.

“¿Papewajunupaebiliwaisijawanü rubena Bibliabaj̈utota nakatsitajüta Jesús, Dioso Pitapetsinükueniatsi?” (Ruka Internet-jawata jw.org)

Bibliabaj̈uto yapütaeyaej̈ana pakuenia Jesús, Dioso Pej̈ünatokuene, ¿itsiata meta ewetabiabatsi pakuenia pej̈i pej̈ainaewi ewetabiaba?

“¿Dej̈uajitsia najumaitsi tsabiabi: Dioso Pej̈ünato Jesús?” (Ruka Internet-jawata jw.org)

Yapütaema pakuenia Dioso Pejumeliwaisi apoyapütaeyaej̈anae trinidad peliwaisi.

“¿Dioso raja Jesús?” (Peyajiwitaebo, 1 de abril, 2009)

Lebare pakuenia petiriwa najamatabükuenepünüyorota peyapütaekujinae pej̈aniajailiwaisi Bibliabaj̈utota Jesús yabara.

“Judíowa jumej̈aniatane pejanaliwaisi” (¡Naükore!, mayo de 2013)