ZASEŊƆ 49
Yehowa Wan Lebese Mam Zusega?
‘Ho wan yi mam ge wa’ana zusɛ mam ti n kelese ho.’—YER. 29:12.
YUUNƐ 41 Please Hear My Prayer (Soso Kelese N Zusega Wa)
YELEKPINAa
1-2. Beni n sɔi ti to ta’an ni ti’isa ti Yehowa ka lebeseri to zusega?
‘TARA pupeelum la Yehowa ge a wan bo ho, ho suure n boti sɛla.’ (Ym. 37:4) Bisɛ lan de yelesonɛ se’em! Ge la nari ti to ɛɛra ti Yehowa bo to sɛla woo ti to bɔta bilam bilam? Beni n sɔi ti to sɔkera yele wa? Geele yele ana wa bisɛ. Mabipɔka n nan ka ele n zusɛ Yehowa ti eŋa boti la a keŋɛ Na’am Mɔɔlegɔdoma Sukuu. Ge yuuma zo’e zo’e n tole ti a kelum ka nyɛ yɔ’ɔ ti a keŋɛ. Mabia n de budibila n zusɛ Yehowa ti a soŋɛ en ti a bã’a basɛ ti a ta’an tuna zo’e zo’e tansugere la poan ge a bã’a la ka baseri. Dɔɣereba n zuseri ti ba bia kɔ’ɔn bɔna yelemɛŋɛrɛ la poan ge bia la basɛ Yehowa pu’usegɔ mɛ.
2 Daanse’ere hon me zusɛ Yehowa mɛ ɛɛra ti a eŋɛ sɛla bo ho ge ho nan ka nyɛ hon boti sɛla la. Bala la, ho ta’an ti’isa ti Yehowa keleseri la basɛba zusega ge a ka keleseri hon zusega. Bii ho ta’an ti’isa ti ho tum la be’em. Mabipɔka ayima yu’urɛ n de Janiceb me yuun ti’iseri la bala. Eŋa la a sira yuun zusɛ la Yehowa ti a soŋɛ ba ti ba ta’an keŋɛ ta tuna Betel. A yeti: “Mam yuun ti’iseri ti la kan yue to wan keŋɛ Betel.” Ge yuuma zo’e zo’e pooren ba yuun kelum ka nyɛ yɔ’ɔ keŋɛ Betel. Janice yeti: “Mam suure n yuun sa’am ti mam ana bura. Mam yuun pɔsɛ ti’isa ti daanse’ere n eŋɛ la sɛla ti Yehowa puurɛ ka pee. Mam yuun zusɛ Yehowa mɛ sugumnɔɔrɛ zo’e zo’e ti n keŋɛ Betel. Beni n sɔi ti a ka kelese mam zusega?”
3. To wan sɔsɛ la bem zaseŋɔ wa poan?
3 Saŋa ase’a to ta’an ni ti’isa ti Yehowa ka keleseri to zusega. Hali diimi nɛreba n yuun tari sakerɛ me yuun ti’iseri la bala. (Yob 30:20; Ym. 22:2; Hab. 1:2) Beni n basɛ ti hon tara suure lua ti Yehowa wan kelese ho zusega? (Ym. 65:2) To wan deŋɛ nɛŋa sɔsɛ sokere atã wa ti la soŋɛ tɔ ti to nyɛ sokere wa lebesego: (1) Tomam boti Yehowa eŋɛ la bem? (2) Yehowa me boti tomam eŋɛ la bem? (3) Beni n sɔi ti la nara ti to tee zusɛ sɛla?
TOMAM BOTI YEHOWA EŊƐ LA BEM?
4. Wuu Yeremia 29:12 n pa’alɛ se’em la, Yehowa pu’ulum biŋe ti a eŋɛ la bem?
4 Yehowa yeti A wan kelese to zusega la. (Kaalɛ Yeremia 29:12.) To Naayinɛ la nɔŋɛ a yamesi mɛ, bala a kan zaɣesɛ ba zusega. (Ym. 10:17; 37:28) Ge bala ka pa’alɛ ti a wan eŋɛ sɛla woo ti to bɔta la bo to. La ta’an dɛna ti to gura ta paɛ tinpaalega la poan ge nyaa ta nyɛ sɛla ti to bɔta la.
5. Yehowa ni geele la bem ge nyaa lebese to zusega? Tɔɣɛ pa’alɛ.
5 Yehowa ni lebese to zusega ti la makɛ la a puti’irɛ n boti sɛla. (Isa. 55:8, 9) A puti’irɛ ayima dela, tingɔŋɔ wa za’a kɔ’ɔn pirɛ la nɛreba n nani en ti eŋa n de bisegadaana. Ge Sitaana parum ti asaala wan ta’an bisera bamea soŋa. (Pin. 3:1-5) Yehowa bo la yɔ’ɔ ti asaala bisera bamea ti la pa’alɛ ti Kolekpabɛ’a la dela pumpɔrema. Ge asaala bisega n ta’asɛ ti yeledaaŋɔ zo’e zo’e paara tɔ zina beere wa. (Pa. 8:9) To mi ti Yehowa kan yese yelese’a woo n paari to la basɛ nananawa. A san eŋɛ bala, nɛreba basɛba wan ti’isa ti asaala bisega n ani soŋa ge wan ta’an maalɛ ba yeledaaŋɔ.
6. Beni n sɔi ti la nara ti to tara suure lua ti Yehowa wan doose nɔŋerɛ la tontɔɔ sore poan lebese to zusega?
6 Yehowa ta’an lebese zusega ana taaba sarɔtɔ zo’e zo’e poan. Makerɛ, Naba Hezekia yuun bɛ̃’ɛri mɛ paa ge zusɛ Yehowa ti a tibɛ en. Yehowa yuun kelese mɛ ge tibɛ en. (2 Na. 20:1-6) Ge tuuntuna Paul n yuun zusɛ Yehowa ti a yese ‘gũ’a n boi a poan’ n yuun ta’an dɛna bã’a n daani en la, Yehowa yuun ka tibɛ en. (2 Ko. 12:7-9) To le geele ya tuuntuneba Yames la Peter yele la bisɛ. Naba Herod yuun boti la a ku ba. Mabiisi la yuun zusɛ bo Peter mɛ ge me yuun ta’an zusɛ bo Yames. Ge ba yuun ku la Yames ge ti maleka faaɛ Peter basɛ. (Tm. 12:1-11) To ta’an ti’isa ti, ‘Beni n sɔi ti Yehowa yuun faaɛ Peter ge basɛ Yames?’ Baabule la ka pa’alɛ.c Ge ton mi sɛla dela Yehowa ka tuni ‘ŋmɛlema tuuma.’ (Tɛɛ. 32:4) To me mi ti Yehowa yuun nɔŋɛ Peter la Yames mɛ. (Lil. 21:14) Saŋa ase’a, Yehowa ta’an kan lebese to zusega wuu ton boti ni se’em la. Ge ton tari sakerɛ ti Yehowa doli la tontɔɔ la nɔŋerɛ sore poan lɛbesa to zusega la zuo, to kan nyɔ̃na a san ka lebese to zusega wuu ton boti ni se’em la.—Yob 33:13.
7. Bem ti la ka nara ti to ti’isa ge beni n sɔi?
7 La ka nari ti to tara to bɔŋa makera la basɛba. Makerɛ, to ta’an zusɛ Yehowa ɛɛra ti a eŋɛ sɛla bo to ge ka nyɛ. Pooren ti to ta baŋɛ ti mabia me n zusɛ ɛɛra sɛla ti Yehowa eŋɛ bo en. Bala n paɛ mabipɔka ayima yu’urɛ n de Anna. A sira Matthew n yuun tari ɔberega bã’a ti a zusɛ ti la basɛ. Sankaŋa mea nɔɔ ti mabipɔɣesi siyi n kuregɛ ti ɔberega bã’a me tara ba. Anna yuun zusɛ mɛ paa bo Matthew la mabipɔɣesi la. Ge mabipɔɣesi wa bã’a la yuun basɛ mɛ ge ti Matthew ki. Pɔsega la Anna yuun ti’iseri ti Yehowa n soŋɛ ti mabipɔɣesi la bã’a basɛ. La yi san dɛna bala, beni n sɔi ti Yehowa ka kelese a zusega la ti a sira bã’a la me basɛ? Yelemɛŋɛrɛ la dela, to ka mi lan eŋɛ se’em ti mabipɔɣesi la bã’a la basɛ. Ge ton mi sɛla dela Yehowa wan ta yese namesegɔ woo basɛ ge me isige to nɛresɛba n ki la.—Yob 14:15.
8. (a) Wuu Isaiah 43:2 n pa’alɛ se’em la, Yehowa soŋeri to la wani? (b) Zusega wan ta’an soŋɛ to la wani yɛla san paara tɔ? (Bisɛ vidiyo la zuo n de Zusega Soŋeri To Mɛ Ti To Ŋmibera.)
8 Yehowa wan soŋera tɔ saŋa woo. Yehowa n de to nɔŋerɛ Sɔ la, a ka boti to namesa. (Isa. 63:9) Ge a ka gu’uri yelese’a n wan paɛ to la, n ta’an ana wuu ko’om bii bugum la. (Kaalɛ Isaiah 43:2.) A yeti a wan soŋɛ tɔ ti to ta’an ‘doose bim tole.’ A me kan bo yɔ’ɔ ti yelese’a n paari to la pɔɣelum tɔ. Yehowa le tara la a zilam vo’osum la soŋera tɔ. (Lu. 11:13; Flp. 4:13) Bala zuo la, to wan ta’an tara suure lua ti a wan bo to yelese’a n pakɛ tɔ ti to ta’an ŋmibera ge tara sakerɛ pu’usa en.d
YEHOWA BOTI TO ITA LA BEM?
9. Wuu Yames 1:6, 7 n pa’alɛ se’em la, beni n sɔi ti la nara ti to tara sakerɛ ti Yehowa wan soŋɛ tɔ?
9 Yehowa boti la to dekɛ tomea delum en. (Heb. 11:6) Saŋa ase’a, to yeledaaŋɔ la ni basɛ ti la kpe’em bo to ti to ŋmibe. To ta’an ni pɔsɛ ti’isa ti Yehowa kan soŋɛ tɔ. Ge Baabule la basɛ ti to tara suure lua ti Naayinɛ wan dekɛ a paŋa la soŋɛ tɔ ti to ta’an zɔɛ ‘sɛla n beŋeri to la.’ (Ym. 18:29) La ka nari ti to tara puti’ira ayi ayi ge to tuɣum tara sakerɛ ti to san zusɛ, Yehowa wan kelese to zusega la.—Kaalɛ Yames 1:6, 7.
10. Bo makerɛ pa’alɛ ton wan tuna ti la makɛ la to zusega se’em.
10 Yehowa boti la to san zusa ɛɛra sɛla, to tuna bala. Makerɛ, mabia ta’an zusɛ ɛɛra sore tuuma zɛ’an ti a keŋɛ laɣesegɔ. Yehowa wan lebese zusega wa la wani? A ta’an bo mabia wa sukpe’ene ti a tɔɣɛ bo a kpɛ’ɛma la. Ge la dela mabia la kelum keŋɛ ta yele a kpɛ’ɛma la. La ta’an dɛna ti a eŋɛ bala sugumnɔɔrɛ zo’e zo’e. Daanse’ere la wan nara ti eŋa la a tuuntuna tadaana teesum tuuma dabesa bii a ta’an vi tuuma ti ba da yɔ en.
11. Beni n sɔi ti la nara ti to zusa tabela?
11 Yehowa boti la to zusa tabela ɛɛra yelese’a n pakɛ to la. (1 Tes. 5:17) Yezu yuun pa’alɛ ti yelese’a ti to bɔta la to kan nyɛ a bilam bilam. (Lu. 11:9) Bala la da gɛ̃ basɛ! Kɔ’ɔn mɔ’ɛ nini zusa tabela. (Lu. 18:1-7) To san kɔ’ɔn zusa ɛɛra sɛla, to boti la Yehowa baŋɛ ti ton zuseri ɛɛra sɛla la dela ninmɔ’ɔrɛ bɔ’ɔra tɔ. To me iti pa’ala ti to tari sakerɛ ti a wan soŋɛ tɔ.
BENI N SƆI TI LA TA’AN DƐNA TI TO TEE TON ZUSERI ƐƐRA YELESE’A LA?
12. (a) To san zusɛ ɛɛra sɛla, to wan ta’an soke tomea la bem sokere ge bem zuo? (b) To wan eŋɛ la wani pa’alɛ ti to tari gilema bɔ’ɔra Yehowa to zusega poan? (Bisɛ daka la zuo n de “Mam N Zuseri Ɛɛra Sɛla La Pa’ali Ti N Tari Gilema Bɔ’ɔra Yehowa?”)
12 To san ka nyɛ to zusega lebesego to ta’an soke tomea soke ana atã wa. Yia sokere la dela, ‘Mam n zuseri ɛɛra sɛla la nari?’ Saŋa zo’e zo’e to ta’an ni ti’isa ti tomam mi yelese’a n nari tɔ. Ge yelese’a ti to zusa ɛɛra la ta’an kan soŋɛ tɔ. To san zusɛ Yehowa ti a maalɛ to yele hali eŋa n ni maalɛ yele la se’em la gani ton ti’iseri se’em la mɛ. Yelese’a ti to zusa ɛɛra la basɛba ta’an kan makɛ la Yehowa n boti sɛla la. (1 Yo. 5:14) Makerɛ, geele dɔɣereba la ti to puɣum tɔɣɛ ba yele la bisɛ. Ba zusɛ la Yehowa ti a basɛ ti ba bia kɔ’ɔn bɔna yelemɛŋɛrɛ la poan. Ba zusega la ani soŋa ge Yehowa ka pɛregerɛ to se’em sa’am ti to pu’usa en. A boti la tomam la kɔma la za’a, loe ti to pu’usa en. (Tɛɛ. 10:12, 13; 30:19, 20) Bala la, la nari ti dɔɣereba la tuɣum zusɛ ni Yehowa ti a soŋɛ ba ti ba ta’an pa’ala ba bia la ti a nɔŋɛ Yehowa ge dɛna A zɔ.—Mag. 22:6; Ep. 6:4.
13. Wuu Hebru 4:16 n pa’alɛ se’em la, sankani ti Yehowa wan soŋɛ tɔ? Tɔɣɛ pa’alɛ.
13 N yi’i sokere la dela, ‘Yehowa saŋa paɛ ya ti a lebese n zusega la?’ To ta’an bɔta ti a lebese to zusega la kalam. Yelemɛŋɛrɛ la dela Yehowa n mi sansɛka n nari ti a soŋɛ tɔ. (Kaalɛ Hebru 4:16.) A san ka lebese to zusega bilam bilam to ta’an ti’isa ti Yehowa zaɣesɛ mɛ. Ge a lebesego la dela ‘saŋa la nan ka paɛ.’ Makerɛ, le ti’isɛ bisɛ mabia la n zusɛ yeti Yehowa tibɛ a bã’a la yele. Yehowa san doose ni yelekirega sore poan tibɛ en, Sitaana ta’an yeti, mabia la kelum pu’usa Yehowa la eŋa n tibɛ en la zuo. (Yob 1:9-11; 2:4) Leyɛ’ɛsa, Yehowa puɣum pa’alɛ sansɛka ti a wan tibɛ bã’asi woo mɛ. (Isa. 33:24; Lil. 21:3, 4) Ge sankaŋa n nan ka paɛ la, to da ɛɛra ti Yehowa doose yelekiriga sore poan tibɛ tɔ. Ge mabia la ta’an zusɛ ni Yehowa ti a tuɣum bo en paŋa la suma’asum ti a ta’an ŋmibe a bã’a la poan ge kelum tara sakerɛ pu’usa En.—Ym. 29:11.
14. To zamesɛ la bem Janice yele la poan?
14 Tɛ̃ra Janice n yuun zusɛ ɛɛra ti a ta tum Betel la yele. Yuuma anuu n tole ti a yuun bɔkɛ Yehowa n lebese a zusega la se’em. A yeti: “Yehowa yuun dekɛ la sankaŋa pa’ala ge kumesa mam. La yuun nari ti n tara sakerɛ zo’e zo’e bɔ’ɔra en. La me yuun nari ti n zamesa Baabule la soŋa. La yuun nari ti n baŋɛ ti n wan ta’an tara pupeelum la ka pakɛ la zɛsɛka woo ti n pu’usa Yehowa.” Pooren, ba yuun basɛ ti Janice la a sira keŋɛ ta tuna la kaarɛ tuuma la. Janice nyaa yeti: “Yehowa yuun kelese mam zusega la mɛ ge daɣɛ mam n boti se’em la. La yuun yue mɛ ge ti mam nyaa bɔkɛ ti Yehowa n lebese mam zusega se’em la ani soŋa me paa. Mam puurɛ me pee mɛ la eŋa n tari nɔŋerɛ la itisoŋɔ se’em bɔ’ɔra mam la.”
Ho san ti’isɛ ti Yehowa ka lebese ho zusega, tee zusɛ yɛla ase’a (Bisɛ kaalegɔ zɛ’an 15)f
15. Beni n sɔi ti la ka nara ti to zusa ɛɛra yele yinɛ ma’a? (Bisɛ fɔɔra la.)
15 N tã’a sokere la dela, ‘N tee mam n zuseri ɛɛra sɛla la?’ La boi bim ti la nari ti to zusa ɛɛra sɛla wana mɔpi ge saŋa ase’a la wan eŋɛ se’em ti to ta’an baŋɛ Yehowa n boti sɛla la, la ka nari ti to zusa yele yinɛ ma’a. Geele mabipɔka la n nan ka ele la n zusɛ ɛɛra ti a keŋɛ Na’am Mɔɔlegɔdoma Sukuu la yele bisɛ. A boti la a keŋɛ sukuu wa la wan eŋɛ se’em ti a ta’an keŋɛ zɛ’an n eeri soŋerɛ. Eŋa n kelum zusa ɛɛra ti a keŋɛ sukuu la, a ta’an zusɛ ni Yehowa ti a soŋɛ en ti a bisɛ eŋa n wan eŋɛ se’em nyɛ yɔ’ɔ ase’a yalegɛ a na’am mɔɔlegɔ tuuma la. (Tm. 16:9, 10) A nyaa ta’an soke gingilega kaarɛ bisegadaana baŋɛ tansuga se’a n eeri sore ŋmɛ’adoma soŋerɛ. Bii a gulesɛ bo tigere yile la soke baŋɛ zɛ’an ti ba ɛɛra Na’am mɔɔlegɔdoma.e
16. To tari suure lua la bem poan?
16 Wuu ton zamesɛ baŋɛ se’em la, to wan ta’an tara suure lua ti Yehowa wan doose nɔŋerɛ la tontɔɔ sore poan lebese to zusega la. (Ym. 4:3; Isa. 30:18) Saŋa ase’a a ta’an kan lebese to wuu tomam n boti se’em la. Ge Yehowa kan malum zaɣesɛ to zusega la. A nɔŋɛ to mɛ paa. (Ym. 9:10) Bala la ‘dekɛ homea delum en saŋa woo’ ge tɔɣɛ sɛla n boi ho suuren bo en.—Ym. 62:8.
YUUNƐ 43 A Prayer of Thanks (Yuum Pɛɣɛ Yehowa)
a Zaseŋɔ wa wan soŋɛ tɔ ti to tara suure lua ti Yehowa doli la nɔŋerɛ la tontɔɔ sore poan lɛbesa to zusega.
b Ba tee yu’ura ase’a mɛ.
c Bisɛ zaseŋɔ yele la zuo n de “Do You Trust in Jehovah’s Way of Doing Things?” (Hon Dekɛ Homea Delum Yehowa N Iti A Yɛla Se’em La?) n boi February 2022 The Watchtower la poan gɔn. 3-6.
d Ho san bɔta ti ho baŋɛ Yehowa n soŋeri to se’em ti to ŋmibera yeledaaŋɔ poan bisɛ vidiyo la zuo n de Zusega Soŋeri To Mɛ Ti To Ŋmibera n boi jw.org.
e Ho san bɔta ti ho tum satiŋa ayima poan, bisɛ Organized to Do Jehovah’s Will, zuo. 10, kz. 6-9.
f FOOTE LA VUURƐ: Mabipɔɣesi bayi n zusɛ ge nyaa gulesɛ Na’am Mɔɔlegɔdoma Sukuu gɔŋɔ tisɛ. Pooren, ba yi la ayima ge basɛ ayima. Se’em ti ba ka yi la n wan basɛ ni ti a giila kɔ’ɔsɛ la, a zusɛ la Yehowa ti a soŋɛ en ti a dekɛ yɔ’ɔ seko woo ti a wan nyɛ yalegɛ a na’am tuuma la. A nyaa gulesɛ la gɔŋɔ ta bo tigere yile la ɛɛra ti a keŋɛ zɛ’an n eeri soŋerɛ ta mɔɔlɛ.