Jehobah Yana Yi wa Masu Son Bayarwa Albarka

MAHALICCINMU ya ba ’yan Adam ’yancin yin abin da suke so. Duk da haka, yana albarkar waɗanda suke amfani da ’yancinsu don su ɗaukaka bauta ta gaskiya da kuma waɗanda suke iya ƙoƙarinsu don su tsarkake sunansa kuma su yi nufinsa. Jehobah ba ya so mu yi masa biyayya don muna gudun horo ko don ana matsa mana. Maimakon haka, Jehobah yana son mutum ya bauta masa don ƙauna da kuma godiya.

Alal misali, sa’ad da Isra’ilawa suke jejin Sinai, Jehobah ya umurce su su gina wurin bauta. Ya ce: “Ku ɗauki hadaya daga wurinku ku kai wa Ubangiji: dukan wanda ya yi niyya, bari shi kawo, hadayar Ubangiji ke nan.” (Fit. 35:5) Kowane Ba’isar’ila yana iya ba da abin da zai iya bayarwa da yardar rai, ko da mene ne ko da nawa ne ake bukata don a yi nufin Allah. Shin mene ne suka yi?

‘Dukan wanda zuciyarsa ta sa shi, da dukan wanda ruhunsa’ ya motsa shi ya ba da hadaya daga ‘zuciyarsa.’ Maza da mata da yardar rai sun kawo wani abu don aikin Jehobah kamar su liwalai da ’yan kunne da zobe da zinariya da azurfa da janganci da shuɗi da shunaiya da mulufi da lilin mai taushi da gashin akuya da fatun raguna jajaye da fatun seal da itacen maje da duwatsun ado da balsam da kuma mai. Saboda haka, “kayan da ke wurinsu ya isa da za a yi dukan aiki, har ya yi yawa.”—Fit. 35:21-24, 27-29; 36:7.

Jehobah ya yi farin ciki da gudummawan mutanen amma yadda suka yi hakan da son rai don su tallafa wa bauta ta gaskiya ne ya fi faranta masa rai. Ƙari ga haka, sun ba da lokacinsu da kuzarinsu don aikin. Labarin ya ce: “Dukan mata kuma masu-hikima ga zuciya suka yi kaɗi da hannuwansu.” Hakika, “dukan mata kuma waɗanda zuciyarsu ta zuga su cikin hikima suka yi kaɗin gashin akuya.” Ƙari ga haka, Jehobah ya ba wa Bezalel ‘hikima da fahimi da ilimi da kowace irin sana’ar’ da ake bukata don yin aikin. Hakika, Allah ya ba wa Bezalel da Oholiab basira don su yi aikin da aka ce a yi.—Fit. 35:25, 26, 30-35.

Sa’ad da Jehobah ya ce wa Isra’ilawa su ba da gudummawa, ya tabbata cewa “dukan wanda ya yi niyya” zai tallafa wa bauta ta gaskiya. A sakamakon haka, Jehobah ya albarkace su da ja-gora mai kyau da farin ciki don wannan halin da suka nuna. Ta hakan, Jehobah ya nuna cewa sa’ad da ya albarkaci bayinsa da suke bayarwa da son rai, zai tanadar da masu aiki da kuma dukan abubuwan da ake bukata don a cim ma nufinsa. (Zab. 34:9) Ka tabbata cewa Jehobah zai albarkace ka don yadda kake bayarwa don a cim ma nufinsa.

HANYOYIN DA WASU SUKE BA DA GUDUMMAWA DON WA’AZI

A yau, kamar a zamanin manzo Bulus, mutane da yawa suna yin “ajiya” ko kuma su ajiye wani kuɗi da za su riƙa sakawa a cikin akwatunan gudummawa da ke cikin ikilisiya da aka rubuta “Aiki na Dukan Duniya.” (1 Kor. 16:2) Kowane wata, ikilisiyoyi suna tura waɗannan gudummawan zuwa ofishin Shaidun Jehobah da ke ƙasarsu. Kana iya aika gudummawarka kai tsaye zuwa ofishin Shaidun Jehobah da ke ƙasarku. Idan kana son ka san sunan da Shaidun Jehobah suke amfani da shi a ƙasarku, ka tuntuɓi ofishinsu da ke ƙasarku. Kana iya samun adireshin ofishin Shaidun Jehobah a dandalin www.pr418.com/ha. Ga irin gudummawar da za ka iya aikawa kai tsaye:

KYAUTA

Gudummawa ta hanyar tura kuɗi ta banki ko kuma wajen amfani da katin ATM. A wasu ofisoshin Shaidun Jehobah, ana iya yin hakan ta jw.org ko kuma wani dandalin da aka umurta a yi amfani da shi.
Kuɗi ko kayan ado kamar gwalagwalai ko kuma wasu kaya masu daraja. A haɗa da wasiƙar da ke nuna cewa kuɗin ko kuma kayayyakin kyauta ne.

RANCE

Ba da kuɗi rance, za a iya mai da wa mai shi kuɗin duk lokacin da yake bukata.
A haɗa da wasiƙar da ke nuna cewa kuɗin rance ne.

WASU HANYOYIN BA DA GUDUMMAWA

Ƙari ga ba da kyautar kuɗi da kaya masu amfani, akwai wasu hanyoyin ba da kyauta da za su amfane hidimar Mulki a dukan duniya. Kafin ka zaɓa wata hanyar ba da gudummawa, ka fara tuntuɓar ofishin Shaidun Jehobah da ke ƙasarku don neman bayani game da tsarin da ya dace a ƙasarku. Tun da yake dokokin sun dangana ga ƙasarku, yana da muhimmanci ka fara tuntuɓar lauya kafin ka tsai da shawara a kan yadda za ka ba da gudummawa. An jera waɗannan hanyoyin a ƙasa.

Inshora: Kana iya rubuta sunan “Watch Tower” a matsayin wanda zai karɓi inshorar rai ko na murabus daga aiki ko kuma fansho.

Ajiyar Banki: Kana iya ba da kuɗin da kake da shi a banki, ko wanda ka ajiye na ƙayyadadden lokaci (fixed deposit), ko kuma kuɗin da aka ba ka bayan ka yi murabus daga aiki da ka ajiye a banki ga “Watch Tower” don su yi amfani da shi. Kana kuma iya ce a ba su kuɗin bayan ka rasu, bisa ga dokokin bankin.

Hannayen Jari: Ana iya ba “Watch Tower” kyautar hannayen jari ko kuma a yi yarjejeniya cewa za a ba su bayan mai shi ya rasu (Transfer on Death).

Fegi da Gida: Kana iya yi wa “Watch Tower” kyautar fegin da za a iya sayarwa, idan kuma gida ne da mutum yake ciki, yana iya ci gaba da zama a ciki yayin da yake da rai.

Wasiyya da Ajiya: Ana iya ba “Watch Tower” dukiya ko kuɗi a matsayin gādo bayan mutuwa, ta hanyar rubuta takardar da aka saka hannu bisa doka, ko kuma a rubuta “Watch Tower” a matsayin wanda zai ci moriyar ajiyar.

Ya dace a yi shiri da kyau don ba da irin waɗannan gudummawa da aka ambata.

Don ƙarin bayani, kana iya tuntuɓar ofishin Shaidun Jehobah da ke ƙasarku.