Hanyoyin Kyautata Yadda Muke Wa’azi—Yadda Za Mu Bi da Maigidan da Ya Hasala

Muhimmancinsa: Mutane da yawa da muke haɗuwa da su a lokacin da muke wa’azi suna da ladabi. Amma Yesu ya annabta cewa wasu za su ƙi mu. (Yoh. 17:14) Saboda wannan, kada mu yi mamaki idan wasu magidanta suka yi fushi da mu sosai. Idan hakan ya faru, zai dace mu bi da yanayin a hanyar da za ta faranta wa Jehobah rai, da yake shi ne muke wakilta. (Rom. 12:17-21; 1 Bit. 3:15) Mai yiwuwa idan muka yi hakan, yanayin ba zai daɗa muni ba. Ƙari ga haka, halinmu zai zama shaida ga magidantan da kuma masu kallo, kuma hakan yana iya sa su saurari Shaidun Jehobah a nan gaba.—2 Kor. 6:3.

Yadda Za Mu Cim ma Hakan:

Ku kasance da fara’a da kuma natsuwa don hakan zai iya sanyaya zuciyar maigidan. Kada ku ɗauka cewa maigidan yana fushi da ku kanku ne. (M. Wa. 7:9) Wataƙila matsalolin da yake fama da su ne ke sa shi fushi ko kuma kun zo ne a lokacin da bai dace da shi ba. Ko da saƙonmu ne ke sa shi fushi, hakan yana iya zama domin an yaudare shi ne.—2 Kor. 4:4.
Ku yi magana mai daɗin ji. (Mis. 15:1) Shin kun tashe shi ne daga barci ko kun katse masa hanzari? Ba za mu ce wa mutum ya yi haƙuri domin mun zo masa wa’azi ba, amma za mu iya roƙon gafara domin mun zo a lokacin da bai dace da shi ba. A wani yanayi kuma, shin yana fushi ne saboda wata jita-jitar ƙarya da ake yaɗawa game da mu? Idan haka ne, za ku iya ce masa: “Na fahimci dalilin da ya sa kake fushi. Amma abin da ka ji game da mu ba gaskiya ba ne. Za ka so in yi maka bayani a kan batun?” Shin, yana fushi ne da mu a kan batun yankan zumunci ko kuma ƙarin jini? Idan haka ne, za ku iya ce masa: “Na fahimce ka. Wasu ma sun gaya mana hakan. Amma za ka so in nuna maka daga Littafi Mai Tsarki dalilin da ya sa muka yi imani da wannan koyarwar?”
Idan mutumin yana fushi sosai, zai dace mu bar wurin ba tare da mun tanka ba. Idan ya ce kada Shaidun Jehobah su sake zuwa gidansa, ku gaya masa cewa za mu bi umurninsa.

Ku Bi Shawarar Nan a Wannan Watan:

Ku yi gwaji a kan wannan batun sa’ad da kuke ibada ta iyali.
Bayan kun bar wani maigidan da ya hasala, ku tambayi wanda kuke wa’azi tare yadda yake ganin zai fi dacewa ku bi da yanayin.