Report sang mga Manugbantala sang Ginharian
Pagbaton sa Maayong Balita sa Belgium
“SIN-O ang nakakita sing mga butang kaangay sini?” siling sang sanga talatapan sang mga Saksi ni Jehova sa Belgium. (Ipaanggid ang Isaias 66:8.) Ining matahom nga pungsod nagareport sing kataason nga 24,464 ka manugbantala para sa 1989 nga tuig sang pag-alagad. Nag-uswag man sing 4-porsiento ang promedyo nga kadamuon sang mga nagapakigbahin sa pagbantala nga hilikuton kada bulan.
◻ Ang maayong balita nga ginawali sang mga Saksi ni Jehova ginkilala sang isa ka Katoliko nga pari nga sa Misa sang isa ka Domingo nagsiling sia sa iya mga parokya: “Kon magkadto ang mga Saksi ni Jehova sa inyo puwertahan, buksi ini. Dala nila ang kamatuoran!” Amo gid sini ang ginhimo sang isa ka babayi. Sang mag-abot ang mga Saksi, ginbuksan niya ang iya puwertahan kag nagbaton sing libro nga Life—How Did It Get Here? By Evolution or by Creation? Sang ulihi nangabay pa sia sing libro nga You Can Live Forever in Paradise on Earth. Ginsugdan ang pagtuon sa Biblia upod sa iya, apang wala magbuylog ang iya bana. Gani ginteleponohan sang isa ka utod ang bana kag ginpamangkot sia kon bala luyag niya magpuyo upod sa iya asawa sa isa ka mas maayo nga kalibutan? Subong resulta, nagbuylog sia sa pagtuon. Ang duha nagapuyuay nga wala makasal, apang ginlegalisar nila ang ila paghiusa kag wala madugay nagpabawtismo.
◻ Ginpabag-o sang kamatuoran ang kabuhi sang isa ka lin-ay. Wala pa sia mag-14 anyos, sang sia nagaisahanon na lamang. May nakilala sia nga isa ka pamatan-on nga lalaki kag nagpuyuay sila sa kalibutan sang punk, nagadroga kag nagapakita sing masingki nga espiritu. Nian naaksidete sa motorsiklo ang pamatan-on nga lalaki kag napatay. Bangod sini, nagbuangbuang ang babayi, kag nagplano sia sa paghikog. ‘Sa diin ako makakita sing solusyon sa akon mga problema?’ palibog niya. May nakilala sia nga espiritista nga nagpapati sa iya nga sarang niya makontak ang iya napatay nga kaupod. Gin-eksperimentohan nila ang paglupay kag extrasensory perception. Wala makita sa sini ang ginapaabot nga paglipay, naglukmat ang iya daku gna kapung-aw. Sa sulod sang pila ka bulan ginpain niya sing bug-os ang iya kaugalingon. Nian nakilala sia sang isa sa mga Saksi ni Jehova kag gintinguhaan niya nga buligan sia sa espirituwal. Sang primero ginhimo ini paagi sa sulat, kag sang ulihi naareglo ang mga butang sa tapos sang daku nga panikasog kag kaisog sa iya bahin. Karon nahilway na sia gikan sa impluwensia sang demonyo, gikan sa bisyo nga pagpanigarilyo, kag gikan sa mabaskog nga pagbatyag sing sala. Samtang nagaligad ang tion, ang dugang pa nga ihibalo sa Biblia kag ang espiritu ni Jehova nakabulig sa iya sing daku. Napalig-on man sia sang mga miting, kay hanuot nga nagahanda sia para sa sini. Karon bawtismado na sia kag may espiritu sa pagpayunir. Nagadumala na sia sing mga pagtuon sa Biblia, ang isa sini upod sa iya iloy, nga nagatambong sa pila ka miting. Sa pagkamatuod, ginbuligan sia ni Jehova!
◻ Ang mga nagahimulos sang mga kahigayunan sa eskwelahan nagaagom sing matahom nga kadalag-an sa pagpalapnag sing maayong balita. Ang isa ka pamatan-on nga utod nga babayi nga nagaeskwela sa Belgium gin-asayn nga maghatag sing pamulongpulong tuhoy sa tema nga pilion niya. Namat-od sia nga maghambal nahanungod sa mga Saksi ni Jehova kag sa ila mga pagtuluohan, nga ginapasad ang iya materyal sa brosyur nga Jehovah’s Witnesses in the 20th Century. Nahamuot ang iya propesor. Sa tapos niya ini mapresentar sa klase, gintugutan ang mga estudyante sa pagpamangkot. Sa tapos sini, namangkot ang pila ka estudyante kon ano ang ila himuon agod mabuhi sila sa Paraiso sang Dios nga ginsambit sa iya pamulongpulong. Madamo, lakip ang propesor, ang nangabay sing mga kopya sang nanuhaytuhay nga brosyur nga dala sang utod nga babayi. Ang iban man nga klase nangabay sing mga brosyur kag sing dugang pa nga impormasyon, kag gin-usisa sang propesor sa relihion ang mga brosyur kag ginrekomendar ini sa iya klase.
Ang maisugon nga ginbuhat sang utod nga babayi ginpakamaayo. Duha ka pulog-tatlo ka brosyur ang napahamtang sa duha ka propesor kag sa madamo nga estudyante; ang isa ka estudyante, sa tapos mabatian ang tuhoy sa pamulongpulong, nangabay nga ipaathag ang hilikuton sang mga Saksi ni Jehova sa iya klase.
Madamo ang nagabaton sang maayong balita sa Belgium. Ginabaton nila ang Pulong sang Dios, “indi subong pulong sang mga tawo, kundi, subong nga amo gid sa kamatuoran, ang pulong sang Dios, nga nagapanghikot man sa inyo nga mga tumuluo.”—1 Tesalonica 2:13.