Sikuli Namona Tanobada Hegegemadai

HARI sikuli be davana bada praivete sikulina lasi o haida mo idia lao henia diba iunivesitina mai ena ladana bada lasi. Lasi, hari sikuli be mai davana lasi. Reana emu ruma kahirakahira dekenai idia karaia noho. Ena ladana be Haroro Sikuli, bona Iehova ena Witness taudia edia hebou rumadia ai idia karaia. Tanobada hegegemadai taunimanima milioni ima bamona idia lao henia loulou.

Reana oi henanadai, ‘Daidia be stiuden ai idia lao diba? Dahaka idia hadibalaidia? Edena bamona idia karaia? Ena namo taunimanima dekenai be dahaka?’

Ena Taravatu

Ena be taunimanima iboudiai be Haroro Sikuli dekenai idia lao diba, to sikuli ena buka badana, Baibel, ena hereva idia abia dae bona ena taravatu idia badinaia taudia sibodia mo be stiuden ai idia lao diba. Sihari kava taudia, henao taudia, inuinu kekero taudia, heudahanai taudia, kuku o buatau ania taudia, bona unai bamona taudia be stiuden taudia ai idia lao diba lasi.​—1 Korinto 6:​9-11.

Hari inai negai sikuli momo ese dabua taravatudia idia negea vadaeni, to Haroro Sikuli ena stiuden taudia idia hagania, dabua goevadia bona namodia do idia atoa. (1 Timoteo 2:​9, 10) Hari sikuli lalonai ta ena mauri laganidia edia momo be herevana. Maragidia, lagani hani o ima taudia, idia duahiduahi diba taudia unai, be idia gaukara loulou, bona lagani 90 mai kahana taudia, tatau bona hahine, danu ese.

Ena Oromana

Haroro Sikuli lao henia dalana haharagaia totona, gabu momo ai pura ena ihuana adorahina ta ai idia karaia. Ena lata be miniti 45. Sikuli naria tauna ese hebou taudia ia hanamoa murinai, hereva karaia tauna ginigunana ese sikuli ena buka ta ena hereva ta be miniti 10 o 15 lalonai ia herevalaia. Bena, nega momo, miniti toi o ima lalonai unai hereva ia riviulaia.

Unai murinai, tisa ta mai ena diba ese Baibel ena karoa rua o toi o hani edia hereva badadia ia gwauraia, sikuli ena sediual hegeregerena unai pura ai idia duahia karoadia unai. Miniti 6 lalonai ia gwauraia. Pura ta ta ai unai sediual be edia ruma ai idia badinaia taudia ese Baibel ibounai do idia duahia ore.

Baibel ena hereva badadia murinai, stiuden toi ese hereva idia karaia, ta ta edia lata be miniti ima. Sediual hegeregerena idia duahia Baibel siridia haida be ta ese ia duahia hedinarai. Ma hereva rua be sikuli ena buka ta ena hereva amo; stiuden iboudiai idia hagoadaia unai do idia duahia guna, klas totona do idia hegaegae totona. Stiuden ta ta edia hereva murinai, sikuli naria tauna ese ia hanamodia, bona, nega momo, ia sisiba henidia danu.

Sikuli naria tauna ena sisiba be Haroro School Ena Buka amo. Stiuden iboudiai ese idia stadilaia namonamo be namo. Stiuden ta be gaukara gabena totona ena hereva dalana ta do ia hanamoa totona, reana sikuli naria tauna ese ia hamaoroa unai buka ena karoa ta do ia duahia lou be namo. Unai karoa haida edia kwaradia be inai: “Hebou Taudia Vaira Henidia Karana Bona Pepa Dekenai Torea Herevadia Gaukaralaia Karana,” “Hereva Hegeregeredia Maorodia,” “Hereva Badadia Gwauraidia Lou Bona Imana Gaukaralaia,” bona “Gadona Ena Regena Haidaua.”

Tano haida ai, Haroro Sikuli ena klas ma ta lalonai duahiduahi idia hahedibalaia. Unai klas lalodiai taunimanima tausen momo idia hadibaia vadaeni dainai, idia duahiduahi namonamo diba. Hegeregere, Mexico ai, lagani 1946 ela bona 1994, taunimanima 127,000 mai kahana be unai bamona idia durudia.

Milioni Momo Ia Durua

Tanobada hegegemadai Haroro Sikuli ese tama sina ia durua, edukeisini namona be edia natudia do idia henidia totona. Lagani 16 merona ladana Moriah ia gwau: “Diba tahua dalana bona egu hereva karaia toho guna dalana lau dibaia vadaeni. Hari, haisikuli ai lau abia gaukaradia iboudiai be haraga herea lau dekenai.”

Lagani 15 merona ladana Matthew, guna iena lagani be 7 neganai Haroro Sikuli ena stiuden ta ai ia lao, be ia gwau: “Sikuli ai egu uru taudia lau hereaia. Lau stadi namonamo diba, lau kamonai namonamo diba, bona hereva lau harorolaia namonamo diba danu.” Iena kakana, lagani 17 merona ladana Phil, ia gwau: “Haroro Sikuli ese egu lalona ia hagoadaia. Lau diba bema gaukara ta be lau idia henia, do lau karaia diba.”

Haroro Sikuli ese taunimanima badadia ia hadibaia danu. Michael, iena palani hegeregerena ena bosi ia haroro henia vadaeni tauna, be ia gwau: “Haroro Sikuli ena stiuden ai lau lao neganai lau hemarai bada, to hari lau hemarai lasi. Sikuli lalonai lau gari lasi, bona lau idia hadibaia bona egu lalona idia hagoadaia dainai, egu hemarai lau negea diba.” Tama ta ia gwau: “Lau laloa lau mero neganai lau reaia gaudia be lau abia vadaeni.”

Latin America ena hanua maragina ta ai, Edukeisini ena Dipatmen taudia be Haroro Sikuli ai idia vareai. Unai hanua tauna ta ena hereva idia kamonai murinai, idia ta, hed-tisa ta, ia gwau: “Ai diba inai tau be guna ia duahiduahi diba lasi dainai [sibona ena gado ai lasi to] Spain gado ai ia hereva dalana be lasi, bona hebou taudia ia haroro henia dalana be lasi momokani, to hari ia be unai bamona ia kara.”

Momokani, tanobada ibounai lalonai Haroro Sikuli be sikuli hereadaena ta! Matamatadia bona burukadia ia durua diba, edukeisini namona idia abia totona. Mero ta ia gwau: “Lau laloa sikuli ena stiuden ta ai ia lao gwauraia tauna be maoromaoro unai bamona ia kara be namo.”

[Picture on page 13]

Haroro Sikuli ese taunimanima milioni momo ia durua, edukeisini namona idia abia totona