Kara Maoromaorodia Badinaia Karana be Ia Maragi Ia Lao

“GUNA unai bamona kara be ia vara lasi.” Germany ena praiminista gunana ta, Helmut Schmidt, be unai hereva ia gwauraia. Ia be vanegai niuspepa ese idia herevalaia gavamani taudia edia koikoi karadia badadia edia sivarai ia gwauraia mai ena lalohisihisi ida. Ia gwau: “Mataganigani dainai kara maoromaoro taravatudia be idia boio.”

Taunimanima momo ese iena hereva idia abia dae. Nega daudau lalonai taunimanima momo ese Dirava ena Hereva, Baibel, ena hakaua herevadia dahaka be maoro bona dahaka be kerere dekenai idia abia dae, to hari momo ese idia laloa bada lasi. Sibona idia gwauraia Keristani tanodia dekenai unai ia vara danu.

Baibel Ena Kara Maoromaoro Taravatudia be mai Anina, A?

Baibel ese ia gwauraia kara maoromaorodia haida be hereva eiava kara momokani bona lalo-maoromaoro dogoatao karana. To, taunimanima momo be idia koikoi bona kara gageva idia karaia. London ena niuspepa, The Times, ia gwau pulisi taudia haida be “raskol taudia dekenai drag dikadia idia hoihoilaia lou eiava kara dika rohoroho taudia edia kerere hamomokania gaudia idia hadikaia negadia ta ta amo, £100,000 bamona idia abia diba.” Idia gwau Austria dekenai insurens koikoi karadia be momo. Bona vanegai Germany dekenai, tahua gaukarana idia karaia taudia be “Germany ena taunimanima ia hahemaraia bada koikoi gauna saiens dekenai” idia davaria dainai, saiens taudia idia hoa bada. Profesa ta, “Germany ena genetik stadilaia taudia huanai ia be ladana bada tauna ta,” idia samania badina be koikoi dalana ai iena saiens pepadia edia hereva momo ia hakererea eiava hereva haida ia atoa kau.

Danu, Baibel ena kara maoromaoro taravatuna ta be headava taudia ese edia adavana idia badinaia be namo, badina be headava be do ia noho daudau hetura karana. To, headava hadokoa totona kota dekenai idia lao headava taudia ena namba ia bada daekau. Katolik niuspepa ta Christ in der Gegenwart (Hari Inai Negai Keristani Taudia) ese ia hahedinaraia “Switzerland dekenai, ‘herevana taunimanima be guna taudia edia noho dalana idia badinaia noho,’ to headava momo herea idia dika.” Netherlands dekenai, headava ibounai 100 100 amo, 33 33 idia hadokoa. Idia hanaia lagani haida lalonai, Germany dekenai ia vara gauna ia itaia hahinena ta be iena lalohadai ia gwauraia, ia gwau: “Taunimanima idia laloa hari headava be idaunegai taudia edia kara ta bona hari inai negai ia be anina lasi karana. Taunimanima idia headava neganai, edia mauri ibounai lalonai unai adavana ida do idia noho be idia laloa lasi.”

To, iseda nega lalonai, taunimanima milioni momo idia laloa Baibel ia gwauraia kara maoromaoro taravatudia idia abidadama henia diba bona edia mauri lalonai ia be mai anina bada. Switzerland bona Germany edia hetoa gabuna dekenai idia noho tau bona ena adavana idia davaria Baibel ese ia gwauraia kara maoromaoro taravatudia idia dibaia bona idia badinaia neganai, moale korikori idia abia. Edia lalohadai be “mauri ena dala ibounai ia hakaua gauna be tamona sibona. Unai hakaua gauna be Baibel.”

Dahaka oi laloa? Baibel be mai anina bada hakaua gauna, a? Baibel ese ia gwauraia kara maoromaoro taravatudia be mai anina bada hari, a?