Devlope tèm diskou a

ORATÈ ki gen eksperyans yo konnen enpòtans sa genyen pou yo gen yon tèm y ap devlope. Lè y ap prepare yon diskou, tèm nan ede yo konsantre sou yon seri enfòmasyon presi e li ede yo pi byen reflechi sou enfòmasyon sa yo. Konsa, olye pou yo pase byen rapid sou yon pakèt pwen, yo devlope enfòmasyon yo yon fason k ap pi itil moun k ap koute yo. Lè chak pwen prensipal konekte dirèkteman ak tèm nan e li ede w devlope tèm nan, sa ede moun k ap koute w yo sonje pwen sa yo e sa ede yo konprann enpòtans yo.

Byenke se pa yon mal pou yo pale de tèm ou an kòm sijè w ap pale sou li a, w ap pi byen fè diskou w la si w konsidere tèm ou an kòm yon aspè presi w ap devlope nan sijè a. Wayòm nan, Labib ak rezirèksyon se sijè ki jeneral. Gen yon kantite tèm nou kapab devlope sou sijè sa yo. Men kèk egzanp: “Wayòm nan se yon gouvènman reyèl”, “Wayòm Bondye a pral fè tè a tounen yon paradi”, “Se Bondye ki enspire Bib la”, “Labib se yon gid ki itil nan tan n ap viv la”, “Rezirèksyon bay moun ki nan lapenn yo yon espwa” e “Esperans rezirèksyon an ede nou rete fèm devan pèsekisyon”. Chak tèm sa yo mande pou w devlope l sou yon aspè ki diferan nèt.

Lè Jezi Kris t ap preche sou tè a, li te fè sa ann amoni ak tèm santral ki nan Bib la. Li te mete aksan sou tèm sa a lè l te di: “Wayòm syèl la vin pi pre.” ​(Mat. 4:17). Ki jan l te devlope tèm sa a? Jan nou li sa nan kat Evanjil yo, li te site Wayòm nan plis pase 110 fwa. Men, li pa t annik plede repete mo “wayòm” nan. Ni nan ansèyman li te bay, ni nan mirak li te fè, li te fè moun yo konprann aklè li menm, ki te avèk yo a, li se Pitit Bondye a, Mesi a, moun Jewova ap bay Wayòm nan. Jezi te montre tou se pa mwayen li menm lòt moun t ap gen posiblite pou yo fè pati Wayòm nan. Anplis, li te montre ki bèl kalite yon moun ki vle gen privilèj sa a dwe genyen. Grasa ansèyman l yo ak kokenn mirak li te fè yo, li te fè moun ki t ap koute l yo konprann aklè ki enfliyans Wayòm Bondye a t ap gen sou lavi moun e li te montre yo lefètke li te sèvi ak lespri Bondye pou l chase demon se te yon prèv ki montre ‘wayòm Bondye a te rive sou yo toutbon’. (Lik 11:20.) Se konsènan Wayòm sa a Jezi te mande disip li yo pou yo preche. — Mat. 10:7; 24:14.

Chwazi yon tèm ki apwopriye. Yo pap ba w devlope yon tèm yon fason laj tankou sa fèt nan Bib la, men sa pa vle di li pa enpòtan pou w gen yon tèm ki apwopriye w ap devlope.

Si se ou k ap chwazi tèm w ap devlope a, premye bagay pou w fè se egzamine objektif diskou w la. Ansuit, lè w ap chwazi pwen prensipal w ap mete ladan l yo, asire w yo vrèman ann amoni ak tèm ou chwazi a.

Si yo tou ba w tèm nan, byen analize l pou w wè nan ki direksyon l ap gide w pou w devlope enfòmasyon yo. Ou ka bezwen fè efò pou w byen konprann enpòtans tèm sa a ak pwen li ba w posiblite devlope yo. Si se ou k ap chwazi enfòmasyon ou bezwen pou w devlope tèm nan, byen chwazi yo, yon fason pou yo pa depaman ak tèm nan. Yon lòt bò, menmsi se ba w yo ba w enfòmasyon pou w devlope yo, w ap toujou bezwen analize fason pou w devlope yo ann amoni ak tèm nan. Ou bezwen tou egzamine poukisa enfòmasyon sa yo enpòtan pou moun ki pral koute w yo e ki objektif ou dwe fikse lè w ap bay diskou a. Sa ap ede w konprann sou ki pwen pou w mete aksan nan diskou w la.

Fason pou w mete aksan sou tèm nan. Pou w ka byen mete aksan sou tèm nan, ou dwe poze yon baz pou sa lè w ap chwazi enfòmasyon yo e lè w ap òganize yo. Si se sèlman enfòmasyon ki ann amoni ak tèm nan ou itilize e si w suiv prensip ki la pou pèmèt ou prepare yon bon plan diskou, w ap mete aksan sou tèm nan yon fason ki prèske otomatik.

Si w repete tèm nan, sa ka ede w mete aksan sou li. Annou pran egzanp yon chante sou lanmou. Nan tout chante a, chantè a pale sou tèm nan, sètadi sou lanmou li gen pou moun sa a li admire a. Li gendwa repete tèm nan divès fason, pa egzanp, li ka pale de lanmou plizyè fason diferan. Li ka itilize sinonim, metafò, langaj powetik, oswa kèk egzanp. Men, chante a ap toujou suiv menm tèm nan. Se menm jan an sa dwe ye pou tèm yon diskou. Menm janm kesyon lanmou an parèt tanzantan nou tout chante a, se konsa ou dwe repete mo kle ki nan tèm diskou a pandan tout diskou a. Pou w fè ti chanjman, ou ka itilize kèk sinonim mo kle sa yo oswa w ka di tèm nan yon lòt jan. Lè w fè sa, sa ap fè tèm nan tounen ide prensipal k ap rete nan lespri moun k ap koute w yo.

Prensip sa yo pap sèvi w sèlman pou diskou w ap fè sou estrad la, men tou, y ap sèvi w nan konvèsasyon w ap fè nan predikasyon. Nan konvèsasyon w ap fè ak yon moun, menmsi konvèsasyon an kout, si tèm nan parèt byen klè, l ap plis sonje l. Lè w ap fè etid ak yon moun, l ap pi fasil sonje ansèyman w ba li yo, si w mete aksan sou yon tèm. Efò w ap fè pou w chwazi tèm ki apwopriye e pou w devlope yo ap ede w vin yon pi bon oratè e yon pi bon anseyan Pawòl Bondye a.