LESON 14

Fè pwen prensipal yo parèt byen klè

Ebre 8:1.

SA POU W FÈ: Ede moun yo suiv diskou w ap fè a, epi montre aklè ki jan chak pwen prensipal gen rapò ak objektif ou fikse a ansanm ak tèm nan.

Fikse yon objektif. Chèche konnen si objektif diskou a se pou enfòme, konvenk oswa motive moun yo, epi devlope l selon objektif la. Asire w tout pwen prensipal yo ede w atenn objektif ou fikse a.

Mande tèt ou: ‘Ki kesyon moun k ap koute m yo genyen sou sijè a oswa ki pwoblèm yo gen avè l? Nan ki lòd yo ka poze kesyon sa yo oswa yo ka di pwoblèm sa yo?’ Apre sa, ranje pwen w yo nan menm lòd la yon fason pou moun k ap koute w yo ka suiv, konprann epi aksepte enfòmasyon an.
Met aksan sou tèm diskou w la. Fè referans ak tèm nan pandan tout diskou a lè w repete mo kle ki nan tèm nan oswa lè w sèvi ak kèk sinonim.
Prezante pwen prensipal yo yon fason ki klè e ki senp. Chwazi sèlman pwen prensipal ki gen rapò ak tèm nan e w ap ka byen anseye nan kantite tan w genyen an. Pa pran twòp pwen prensipal, fè chak pwen prensipal parèt aklè, fè yon ti poz ant pwen yo epi lè w ap sot nan youn pou w al nan yon lòt fè sa byen swa.

Ou ka site pwen prensipal yo depi nan entwodiksyon an pou w ede moun yo suiv avè w oswa w ka site yo nan konklizyon an pou w ede moun yo sonje yo.