Yon lekòl ki ekipe nou pou aktivite ki pi enpòtan nan lavi a
1 An jeneral, moun al lekòl pou yo ka ranmase enstriksyon k ap pèmèt yo atenn objektif yo nan lavi a. Toutfwa, lè n ap fè louwanj pou Pèsonaj ki ban nou lavi a epi n ap ede lòt moun konnen pwogram li ak fason li aji, èske gen yon bagay ki te ka pi enpòtan pase sa ? Non. Objektif Lekòl ministè teyokratik se fòme nou pou nou bay lòt moun ansèyman sou kwayans nou. Kidonk, lè nou asiste lekòl la chak semèn, se ranmase n ap ranmase teknik k ap fè nou ekipe pou aktivite ki pi enpòtan nan lavi a.
2 Nan Ministè Wayòm mwa pase a, nou te jwenn “ Programme pour l’École du ministère théocratique pour 2003 ”. Pwogram sa a bay esplikasyon sou fason lekòl la pral dewoule. Petèt w ap wè li bon pou w mete pwogram sa a nan liv Tirez profit de l’École du ministère théocratique la, piske n ap gen pou nou vini ak liv sa a chak semèn nan Lekòl ministè teyokratik. Kounye a, annou fè yon ti pale sou kèk nan karakteristik Lekòl ministè teyokratik pou ane 2003 a.
3 Teknik pou fè bon diskou : Apati mwa janvye, chak semèn, lekòl la ap kòmanse avèk yon diskou senk minit ki pral pale sou youn nan teknik pou moun fè bon diskou oswa sou yon sijè ki gen rapò ak lekti, etid oubyen ansèyman. Siveyan lekòl la ka fè diskou sa a li menm, oubyen li ka deziyen yon lòt ansyen kalifye pou fè li. Oratè a ap defini teknik l ap pale sou li a e l ap montre enpòtans li. Pou li fè sa, l ap bezwen ajoute egzanp ki soti nan Bib la e l ap bezwen montre ki jan yon moun ka sèvi ak teknik sa a. Sa ki dwe pi enpòtan pou li, se montre ki jan teknik sa a ka ede yon moun pwogrese nan ministè li.
4 Ekspoze no 1 : Yon lòt fwa ankò, yo mande frè k ap bay diskou enstriksyon yo pou yo plis chita sou itilite sijè y ap devlope a. Sa vle di se pou yo montre moun nan kongregasyon an ki jan pou yo mete sa yo tande a an pratik nan lavi yo. Si ou gen pou w fè diskou sa a, al gade nan paj 48-9 liv École du ministère la pou w ka wè ki jan pou w prepare l. Mete sou sa, se pou w byen egzamine referans yo bay nan ribrik “ Application pratique ” ki nan endèks la.
5 Pwogram lekti Labib : Si ou pa t janm reyisi respekte pwogram lekti Labib pou semèn nan, poukisa ou pa pran detèminasyon pou w respekte pwogram nan pandan ane k ap vini an ? Tout moun ki fè sa ap fin li Ekriti grèk yo nan fen ane a. Nan liv École du ministère la, nan paj 10 paragraf 4, yo pale sou avantaj sa genyen lè ou kòmanse pwogram lekti Labib ou avèk Ekriti grèk yo.
6 Pwen enteresan nan lekti Labib la : Pati sa a vin pi long. Kounye a, l ap dire dis minit, yon fason pou moun ki nan oditwa a ka fè kòmantè sou pasaj yo te gen pou yo li pou semèn nan. Frè k ap prezante sijè sa a dwe veye pou li pa depase tan yo akòde l la. Sijè sa a ap fèt chak semèn, menm lè gen revizyon oral. Pandan w ap li chapit ou gen pou w li yo, chèche ki ide ou ka itilize nan etid familyal ou, nan ministè w, oswa nan lòt domèn nan lavi w. Ki kalite Jewova te demontre nan fason li te aji ak kèk moun oswa ak kèk nasyon? Ki sa ou te aprann ki te fòtifye fwa w e ki te fè w vin gen plis rekonesans pou Jewova ? Ou mèt santi ou lib pou w pale sou nenpòt ki pwen ki nan chapit ou te gen pou w li yo, menm si se sou vèsè ki nan ekspoze no 2 a, piske frè k ap fè sijè sa a pap fè kòmantè sou vèsè yo.
7 Ekspoze no 2 : Chak semèn, ekspoze no 2 a se pral yon egzèsis k ap pèmèt elèv la aprann fè lekti an piblik. Tout lekti l ap fè yo ap soti nan lekti Labib pou semèn nan, sof lekti yo prevwa pou dènye semèn ki gen nan mwa a k ap soti nan Toudegad. Elèv la ap annik li sa pou l li a, san l pa fè ni entwodiksyon, ni konklizyon. Konsa, l ap kapab konsantre tout atansyon li sou teknik pou l fè bon lekti. — 1 Tim. 4:13.
8 Ekspoze no 3 ak no 4 : Gen kèk nan ekspoze sa yo, liv Comment raisonner a devlope yo plis pase lòt. Gen lòt ekspoze, se sèlman tèm nan yo ban nou. Frè ak sè ki dwe fè sijè kote se tèm nan sèlman yo genyen, oubyen kote referans yo ba yo a pa gen anpil enfòmasyon, ap gen okazyon pou yo fè rechèch nan piblikasyon Sosyete a pou yo ka prezante sijè a. Dispozisyon sa a ap fè li pi fasil pou sè yo adapte sa y ap di a ak moun y ap pale avè l la.
9 Kad : Dapre sa yo di nan paj 45 liv École du ministère la, siveyan lekòl la kapab endike ki kad pou sè yo itilize. Si li pa ekri okenn kad sou fich atribisyon an, sè yo kapab chwazi yon kad nan lis ki nan paj 82 a. Si yon sè fè yon ekspoze chak de mwa, 30 kad ki genyen yo ap pèmèt li chwazi yon kad diferan pandan senkan. Si yon sè chwazi kad no 30 la, “ Autre cadre de discussion adapté à votre région ”, li ta dwe ekri kad la anba oubyen nan do fich atribisyon an (S-89). Siveyan lekòl la ap ekri dat elèv la fè ekspoze a nan paj 82 a, akote kad li te itilize a. Li ka tou fè sa pandan l ap ekri sou fich konsèy elèv la.
10 Fich konsèy : Fich konsèy la tou kole nan liv la. W ap jwenn li nan paj 79-81. Sa vle di, chak fwa ou fin fè yon ekspoze, w ap bezwen pote liv la bay siveyan lekòl la. Siveyan lekòl la ap bezwen gen yon dosye kote l ap ekri ki pwen elèv la ap travay.
11 Revizyon oral : Chak de mwa, ap gen yon revizyon oral sou pwogram Lekòl ministè teyokratik la. L ap dire 30 minit. Kesyon k ap sèvi kòm baz pou revizyon sa a ap toujou kontinye parèt nan Ministè Wayòm nan. Sa ka rive kongregasyon an gen asanble sikonskripsyon oubyen vizit siveyan sikonskripsyon nan semèn pou revizyon an fèt la. Nan ka sa a, ekspoze ki te dwe fèt nan semèn ki vin apre semèn revizyon an, y ap fè yo nan semèn vizit la oubyen nan semèn asanble a, epi revizyon an ap fèt nan semèn apre a.
12 Lòt klas : Nan kongregasyon ki gen plis pase 50 elèv, ansyen yo ka anvizaje pou yo fè lòt klas. “ Dispozisyon sa a ka konsène tout ekspoze elèv yo, oubyen li ka konsène de dènye yo sèlman. ” (École du ministère, p. 285). Yo fè dènye sijesyon sa a pou fasilite kongregasyon kote gen anpil sè men pa gen anpil frè ki pou fè ekspoze no 2. Ansyen yo ta dwe chwazi frè ki kalifye pou dirije klas sa yo.
13 Konseye adjwen : Dapre pwogram Lekòl ministè teyokratik la, kolèj ansyen yo dwe nome yon konseye adjwen. Konseye adjwen sa a ap la pou li konseye, an prive, ansyen ak asistan ministeryèl ki fè pwen biblik enteresan ak diskou enstriksyon. Frè y ap nome a dwe yon frè ki kalifye, yon frè ki anmezi bay konsèy lòt ansyen yo ap asepte san pwoblèm. Konsèy li yo ta dwe pozitif. Si yon frè te byen fè yon diskou e li te sèvi ak bon metòd ansèyman, konseye a ta dwe felisite l pou sa e li ta dwe sijere l travay sou youn oubyen de pwen. Si yon frè bay diskou souvan, konseye adjwen an pa bezwen ba l konsèy apre chak diskou. Toutfwa, li bezwen gen disènman, e menm frè ki bay diskou piblik yo, li ta dwe konsyan li kapab ede yo pwogrese. — 1 Tim. 4:15.
14 Ki sa pou konseye yo suiv : Ki sa ki ka ede yon konseye analize yon ekspoze ? Nan liv École du ministère la gen 53 chapit ki nimewote, e nan pifò chapit sa yo, twazyèm kare a rezime sa pou konseye yo suiv. Anplis de sa, siveyan lekòl la ta dwe konsidere lòt rapèl oswa lòt sijesyon ki nan liv la k ap ede l wè byen vit si elèv la devlope sijè a yon fason ki lojik e ki efikas. Pa egzanp, gade kesyon ki anlè yo, nan paj 55 liv la, ak remak ki nan dènye paragraf paj 163 a.
15 Ekri nan espas vid yo : Nan liv École du ministère la, maj yo gen anpil plas. Men anplis de sa, gen plizyè kote w ap jwenn espas vid yo kite pou w ka ekri pwen ki retni atansyon w pandan w ap fè etid pèsonèl oubyen pandan w ap suiv dewoulman lekòl la (Gade nan paj 77, 92, 165, 243, 246, ak 250). Veye pou w toujou mache ak liv ou, chak semèn. Suiv ladan l pandan y ap fè premye diskou a. Kite liv la ouvri pandan tout dewoulman lekòl la. Note sijesyon siveyan lekòl la bay. Byen suiv tout metòd ansèyman oratè a ap itilize. Gen dwa se kesyon, egzanp, objè li fè moun yo wè, oswa konparezon. Si ou pran nòt ki itil, w ap anmezi pou w itilize tout bèl pwen ou ranmase nan lekòl la.
16 Jezi te konnen pi gwo privilèj yon moun te ka genyen se preche bon nouvèl Wayòm Bondye a. Se te misyon prensipal li (Mak 1:38). Li te di : “ Fòk m al anonse bon nouvèl wayòm Bondye a, paske se pou sa yo te voye m. ” (Lik 4:43). Antanke moun ki asepte envitasyon pou nou suiv li, nou menm tou nou toujou okipe nan predikasyon bon nouvèl la e nou toujou ap fè efò pou nou bay yon “ sakrifis louwanj ” ki pi bon (Ebre 13:15). Pou nou atenn objektif sa a, se pou nou detèmine pou nou toujou la nan Lekòl ministè teyokratik, yon lekòl k ap prepare nou pou aktivite ki pi enpòtan nan lavi a.