Repons kesyon w yo

◼ Ki pi bon fason pou nou fè kontribisyon pou ede frè nou yo ki nan bezwen nan lòt peyi ?

Pafwa nou konn tande pale de frè ki nan lòt peyi ki nan bezwen akoz pèsekisyon, dezas oswa lòt sitiyasyon difisil. Gen kèk frè ki konn santi yo pouse pou yo voye kòb dirèkteman nan filyal ki nan peyi sa yo. Yo konn mande pou yo ede yon moun, yon kongregasyon oswa yon pwojè konstriksyon an patikilye ak kòb sa a. — 2 Kor. 8:1-4.

Byenke jan de sousi konsa ki montre nou gen lanmou pou kwayan parèy nou se yon bagay ki merite felisitasyon, souvan gen bezwen ki pi ijan pase sa ki nan lespri moun k ap bay kontribisyon an. Nan kèk ka, bezwen yo vize a konn deja konble. Natirèlman, lè nou voye kontribisyon nou yo nan filyal la pou travay mondyal la, pou Fon pou Sal Wayòm, oswa èd pou moun ki sinistre, nou mèt asire nou y ap sèvi ak kòb sa yo jan moun ki bay kontribisyon an mande l la.

Frè nan tout filyal resevwa bonjan fòmasyon pou yo fè fas rapidman ak ka yo pa t prevwa. Nan tout ka yo, filyal la toujou enfòme Kolèj santral la sou pwoblèm ki genyen an. Si yo bezwen plis èd, Kolèj santral la kapab mande filyal ki toupre yo pou yo pote èd yo oswa syèj mondyal la kapab voye fon ki nesesè yo dirèkteman. — 2 Kor. 8:14, 15.

Pakonsekan, tout kontribisyon n ap bay pou travay mondyal la, pwojè konstriksyon nan lòt peyi, oswa èd pou moun ki sinistre dwe ale nan biwo filyal ki nan peyi kote n ap viv la, swa pa mwayen kongregasyon an, swa dirèkteman. Konsa, grasa dispozisyon Kolèj santral la pran nan domèn òganizasyon, “ esklav fidèl ki prevwayan an ” fè fas ak bezwen frè yo nan lemonnantye yon fason ki òdone. — Mat. 24:45-47 ; 1 Kor. 14:33, 40.