Moun ki vini yo pral jwenn yon kokenn temwayaj
1. Anplis diskou a, ki lòt bagay ankò ki ka fè yon bon enpresyon sou moun ki vin asiste Memoryal la? Esplike.
1 Ki lè? Nan sware Memoryal la. Nou te fè anpil efò pou nou envite moun yo vin asiste Memoryal la avèk nou. Se pa sa envite yo tande sèlman ki fè bon enpresyon sou yo. Apre yon dam te fin asiste yon Memoryal, men ki remak li te fè sitou sou sa l te wè: Tout moun te amikal, konstriksyon volontè yo te fè a te bèl, li te pwòp e yo te byen pran swen l. Pakonsekan, se pa oratè a sèlman ki bay yon bon temwayaj nan evènman sa a ki pi enpòtan nan ane a men se nou tout. — Efe. 4:16.
2. Ki sa nou chak ka fè pou nou bay envite yo yon bon temwayaj?
2 Salye envite yo yon fason amikal: Lè nou akeyi envite yo avèk yon bèl souri sou vizaj nou e nou di yo pawòl ki fè yo kontan, nou bay yon temwayaj (Jan 13:35). Menmsi nou pap ka pale ak tout moun, nou ka fè konesans avèk moun ki tou pre nou yo yon fason amikal (Ebre 13:1, 2). Veye pou nou pale ak envite ki sanble pa konnen okenn moun nan asistans lan. Petèt, yo te resevwa yon fich envitasyon pandan nou t ap fè kanpay la. Nou ka mande yo: “Èske se premye fwa ou vin isit la?” Mande yo pou yo chita bò kote nou, epi ofri yo pou nou reponn kesyon yo ka genyen. Si kongregasyon an dwe kite lokal la byen vit, paske gen yon lòt kongregasyon ki pral itilize l, nou ka di moun nan: “Mwen ta renmen konnen ki sa w panse de pwogram nan. Èske gen yon mwayen pou m kontakte w?”
3. Ki jan nou ka byen akeyi moun ki inaktif yo?
3 Byen akeyi moun ki inaktif yo: Se sèten, ap gen pwoklamatè inaktif k ap prezan, e gen kèk ladan yo se chak ane lè yo vin asiste Memoryal la sèlman yo frekante kongregasyon an. Se pou nou byen akeyi yo, epi fè yo konnen nou vrèman kontan wè yo (Wom. 15:7). Ansyen yo ka al lakay yo tousuit apre pou ankouraje yo kontinye asiste lòt reyinyon kongregasyon an fè. Nou swete pou anpil nan moun ki vin asiste Memoryal la santi yo pouse pou yo bay Bondye glwa nonsèlman pou sa yo tande men tou paske ‘yo wè bèl aksyon nou fè ak je yo’. — 1 Pyè 2:12.