Chèche vin pi maton nan travay predikasyon an: Fason pou n reponn objeksyon

Rezon ki fè sa enpòtan: Imajine w ta konnen pral gen yon katastwòf natirèl. Anpil moun ap mouri si yo pa kite zòn nan. W al lakay vwazen w lan pou w di l sa, men, li koupe pawòl nan bouch ou pou l di w li okipe. Pa gen dout nan sa, ou pa t ap kouri bay vag nan efò w ap fè pou w ede l. Lefètke gen anpil moun nan tèritwa nou an ki pa konnen jan mesaj nou an ka ede yo sove lavi yo, sa fè yo pa koute nou. Lè n al preche yo, petèt yo konn okipe (Mat. 24:37-39). Oswa yo gendwa pa vle koute nou akoz move bagay moun di sou nou (Mat. 11:18, 19). Yo gendwa panse pa gen okenn diferans ant nou menm ak lòt relijyon ki pa bay bon egzanp yo (2 Pyè 2:1, 2). Si, okòmansman, mèt kay la montre li pa enterese, nou pa dwe kouri bay vag.

Fason pou nou fè l:

Anvan w al preche kay an kay, pran yon ti tan pou w reflechi ak kèk objeksyon ou ka jwenn nan tèritwa a, epi reflechi sou fason w ka reponn yo.
Si mèt kay la vin ak yon objeksyon, avèk jantiyès, eseye kontinye konvèsasyon an. Petèt ou ka fè sa lè w felisite l. Pa egzanp, si l di w li gen pwòp relijyon pa l, ou ta gendwa reponn li konsa: “Mwen te espere jwenn yon moun tankou w ki enterese nan Bondye.” Pafwa, lè w demontre respè pou sa mèt kay la di w oswa lè w pran sitiyasyon l an konsiderasyon, sa ka ba w posiblite pou w kontinye pale avè l. Pa egzanp, si moun nan di w li okipe, ou ta gendwa di l: “Mwen konprann. Men, anvan m ale, mwen ta renmen ba w yon bagay.” Yon lòt bagay ou ta ka fè si mèt kay la di w li pa enterese se poze l yon kesyon. Ou ta ka di l: “Èske w vle di ou pa enterese nan sa Bib la di oswa èske se relijyon ki pa enterese w?”
Montre nou gen bon jijman. Pa bliye, Jewova pa fòse moun koute l (Det. 30:19). Se chak moun ki gen pou reponn pou tèt yo devan Jewova (Gal. 6:5). Si mèt kay la di w kareman li pa vle koute w, li pi bon pou w deplase. Lè w respekte sa moun nan di w la, w ap fè l pi fasil pou yon lòt pwoklamatè pale avè l yon lòt fwa ankò. — 1 Pyè 3:15.

Eseye sa a pandan mwa a:

Lè w jwenn yon objeksyon nan tèritwa a, apre w fin kite kay la, fè yon ti pale ak pwoklamatè k ap preche avè w la sou fason ou ta gendwa pi byen reponn objeksyon sa a.