Copy How Jesus Wen Go All Out Fo Preach

1. Wass someting dat make Jehovah’s peopo diffren from fake kine Christians?

ONE ting dat make Jehovah’s peopo diffren den fake Christians iz how dey like go all out fo preach. (Titus 2:14) But sometimes maybe you no really feel stoked fo go preach. Maybe you feel like dis hardworking elda who wen tell, “Sometimes I jus no feel like goin out fo preach.”

2. Wat can make um hahd fo us go all out fo preach?

² Maybe we like fo do odda kine work fo Jehovah radda den goin out preaching. How come? Cuz wen we build an take kea Kingdom Halls, help oua braddahs who suffa cuz of disastas, or wen we encourage oua braddahs we see good tings happen right away an dat make us feel happy. Get peace an love wen we work togedda wit oua braddahs, an we kno dat dey tankful fo wat we wen do fo dem. But den maybe we been preaching in da same place fo long time an ony litto bit peopo wen like lissen. An get some peopo dat ack mean to us cuz we preaching. Da closa we get to da end, goin get moa peopo dat no like lissen to da trut. (Mat 10:22) Wat can help us like go all out fo preach an help us keep goin all out fo preach?

3. Wat we learn about Jesus in da story in Luke 13:6-9?

³ We can learn how fo go all out an preach wen we look at Jesus exampo. Jesus neva stop working hahd fo preach to peopo. An az time went on, he wen work even moa hahd. (Read um Luke 13:6-9.) Like da worka guy who wen spen three years trying fo grow one fig tree dat no moa fruit, Jesus had spen about three years preaching to da Jew guys, but mos of dem neva come his followas. But like da worka guy who neva give up on da fig tree, Jesus neva give up on da peopo or his preaching. Jesus wen work even moa hahd fo preach to da Jew guys an help dem fo trus da good kine tings.

4. Wat four tings we can learn from Jesus?

⁴ In dis lesson, we goin talk about wat Jesus wen do fo go all out, speshly in da las six monts of his preaching. We can go all out if we lissen to wat he tell an copy wat he do. We goin look four tings we can learn from Jesus, (1) Fo him, doin wat Jehovah like wuz da main ting, (2) he wen undastan Bible prophecy, (3) he trus Jehovah wuz goin help him, an (4) he neva give up hope dat some guys wuz goin lissen.

HE WEN REMEMBA WAT JEHOVAH LIKE HIM DO

5. How Jesus wen show dat doin wat Jehovah like wuz da main ting in his life?

⁵ Jesus wen go all out fo preach “da Good Stuff bout how dey can get God fo dea king” cuz he wen kno it wuz da work God wanted him fo do. (Luk 4:43) Jesus wen make preaching da main ting in his life. Even in da las few monts of his preaching, he wen “go thru da big an small towns” fo teach. (Luk 13:22) An he wen train moa guys fo preach like him.​—Luk 10:1.

6. How da preaching work conneckted to odda work we do fo Jehovah? (Go look da picha.)

⁶ Preaching iz da main work dat Jehovah an Jesus like us do today too. (Mat 24:14; 28:19, 20) All da work we do fo Jehovah stay conneckted to da preaching work. Fo exampo, we build Kingdom Halls so dat peopo we preach to can come worship Jehovah ova dea. An da work we do at Bethel help da preaching work. Wen get one disasta we make shua oua braddahs an sistahs get da tings dey need, an dat help dem fo go back to da meetings an go preaching again. If we rememba dat da preaching work iz da mos importan ting Jehovah like us do, den we goin like preach az much az can. János, one elda in Hungary tell, “I make shua fo rememba dat no odda work we do fo Jehovah can take da place of da preaching work, dass oua main work.”

7. How come Jehovah like us keep preaching? (1 Fo Timoty 2:3, 4)

⁷ If we look peopo da same way Jehovah look at dem, we goin go all out fo preach even moa. He like az much az can fo lissen da good kine tings an learn da trut. (Read um 1 Fo Timoty 2:3, 4.) Cuz da trut save lifes, Jehovah help us wit sharing um wit oddas. Fo exampo, da Love Peopo​—Make Followas brochure teach us fo talk story wit peopo so dat maybe layta dey study da Bible an come followas too. Even if peopo no start fo serve Jehovah right now, maybe dey get chance fo start befoa da big trouble pau. Maybe bumbye dey goin rememba wat we tell dem an goin like serve Jehovah. But da ony way dat can happen iz if we keep preaching.

HE WEN UNDASTAN BIBLE PROPHECY

8. Cuz Jesus wen kno Bible prophecy, how dat affeck how he wen use his time?

⁸ Jesus wen undastan how Bible prophecies wuz goin come tru. He wen kno dat he would be preaching fo ony three an a half years. (Dan 9:26, 27) An he wen kno from prophecy wen an how he wuz goin die. (Luk 18:31-34) Cuz he wen kno wat wuz suppose to happen bumbye, Jesus neva wase his time. He wen go all out fo preach fo finish da work Jehovah wen give him.

9. How Bible prophecies can make us like go all out fo preach?

⁹ Wen we undastan how Bible prophecies stay coming tru, dat can make us like go all out fo preach. We kno ony get litto bit time lef fo dis world. Da Bible tell how peopo wuz goin ack an wat goin happen, an we see dat comin tru today. We undastan da Bible prophecy about da king of da south an da king of da north “in da time of da end” iz da fight between Britain an United States agains Russia an da guys dat back dem up. (Dan 11:40, NWT.) An we undastan dat da Britain an United States govaments rep da feet of da statue in da prophecy in Daniel 2:43-45. Cuz we undastan dese prophecies, we kno fo shua pretty soon God’s govament goin wipe out all human govaments. All dese prophecies show us we stay close to da end, so we like go all out fo preach az much az can.

10. Wat odda ways Bible prophecies can help us keep preaching?

¹⁰ Bible prophecies give us one good message dat we like share wit oddas. “Jehovah’s awesome promises fo one betta future make me like tell oddas about um,” tell Carrie, one sistah from da Dominican Republic. Den she tell, “Wen I see da stuff peopo goin tru today, I see dat dey gotta kno Jehovah wen promise dese awesome tings fo dem too.” Bible prophecies show us dat Jehovah stay helping us, so no hold back fo go preach. Leila who live in Hungary wen say, “Isaiah 11:6-9 tell dat wit Jehovah’s help anybody can change, so dat help me fo no hold back preach to guys I tink not goin lissen. An Christopher one braddah from Zambia tell, “Mark 13:10 say dat peopo all ova da world goin hea good kine stuff an I feel supa happy fo help dis prophecy come tru.” Wat Bible prophecies help you fo keep preaching?

HE WEN TRUS JEHOVAH WUZ GOIN HELP HIM

11. How come Jesus had fo trus Jehovah fo keep preaching? (Luke 12:49, 53)

¹¹ Jesus wen trus dat Jehovah wuz goin help him keep goin all out fo preach. Even tho Jesus wen show respeck wen he wuz preaching to oddas, he had kno dat da good kine tings wuz goin make some peopo mad an plenny guys wuz goin go agains dat message. (Read um Luke 12:49, 53.) Cuz da religious leada guys neva like wat Jesus wen preach, dey tried fo kill him plenny times. (John 8:59; 10:31, 39) But Jesus had keep on preaching cuz he wen kno dat Jehovah wuz goin help him. He tell, “I get my Faddah fo help me, cuz he da One wen sen me hea . . . He no leave me. I erytime do da kine stuff dat he like.”​—John 8:16, 29.

12. How Jesus wen make his followas ready fo keep preaching even wen guys go agains dem an make dem suffa?

¹² Jesus wen remind his followas dat dey could trus dat Jehovah wuz goin back dem up. An ova an ova he wen tell dem dat Jehovah wuz goin help dem even wen guys make dem suffa. (Mat 10:18-20; Luk 12:11, 12) Cuz Jesus wen kno peopo wuz goin go agains dem, he wen tell his followas fo be keaful. (Mat 10:16; Luk 10:3) He had also tell dem if peopo no like lissen, no force dem. (Luk 10:10, 11) If guys make dem suffa, he had tell dem fo dig out. (Mat 10:23) Even tho Jesus wen go all out an trus Jehovah wuz goin help him, he still wen stay away from stuff dat could hurt him.​—John 11:53, 54.

13. How you can be shua dat Jehovah goin help you?

¹³ We need Jehovah’s help fo keep goin all out fo preach even tho peopo go agains da work we doin today. (Jesus Show 12:17) How you can be shua dat Jehovah goin help you? Cuz wat Jesus wen pray about in John chapta 17. Jesus wen ask Jehovah fo watch ova his aposals, an Jehovah wen ansa dat praya. Da book Jesus Guys tell how Jehovah wen help da aposals fo go all out fo preach no matta peopo give dem hahd time. In dat praya, anodda ting Jesus wen ask wuz fo watch ova da guys who wen put fait in his aposals teachings. You one of dose guys. Jehovah still ansaring dat praya today. So Jehovah goin help you jus like he wen help da aposals.​—John 17:11, 15, 20.

14. How we kno we can keep goin all out fo preach? (Go look da picha.)

¹⁴ Az we come closa to da end, might come moa hahd fo us preach. But Jesus wen tell us dat we goin get wateva help we need fo go all out fo do dis work. (Luk 21:12-15) Jus like Jesus an his followas, we no try make argue wit peopo, we let dem choose if dey like lissen or not. Even in places wea oua work iz kapu, oua braddahs can keep preaching cuz dey rely on Jehovah, not demselfs. Jalike how Jehovah wen give powa to da firs Christians, he give us da powa fo keep preaching to erybody until he tell da work iz pau. (2 Tim 4:17) Fo shua you can kno dat if you trus Jehovah, you can keep goin all out fo preach.

HE NEVA GIVE UP HOPE

15. Wat show dat Jesus had one good attitude fo da preaching work?

¹⁵ Jesus had one good attitude fo da preaching work. Dat wen help him fo stay happy an keep working hahd. Fo exampo, about one year afta Jesus wen start fo preach, he had see dat plenny peopo wanted fo lissen to da good news. He wen compare dem to one field dass ready fo harves. (John 4:35) Den about a year layta, he wen tell his followas, “Get plenny crop fo harves.” (Mat 9:37, 38) An den layta on again he wen tell, “Get plenny peopo, dey jalike da crops . . . so, tell Da One In Charge dat own da crops fo sen out mo guys fo bring in da harves.” (Luk 10:2) Jesus neva give up hope dat peopo wuz goin lissen to da good news, an he wuz supa happy wen dey did.​—Luk 10:21.

16. How Jesus word pichas wen help his followas have one good attitude about da message dey preach? (Luke 13:18-21) (Go look da picha.)

¹⁶ Jesus wen teach his followas fo have one good attitude about da message dey preach, which would help dem fo keep goin all out. Fo exampo, we go look at two of his word pichas. (Read um Luke 13:18-21.) Jesus wen compare da message of da good stuff dat we preach to one small mustard seed dat would grow into one huge tree. He wen use dis fo teach dat da message would grow. Jesus also wen compare da message to yeast. It wuz goin spread all ova an cause changes in peopo dat maybe you no could see right away. So Jesus wen help his followas fo see dat da message dey preach wuz goin help plenny peopo.

17. Wat can help us keep goin all out fo preach?

¹⁷ Wen we tink about how da preaching work stay helping plenny peopo all ova da world, we like keep goin all out fo preach. Ery year, millions of guys who not witnesses come to da Meeting Fo Rememba an study da Bible wit us. Plenny peopo get baptize an preach wit us. We donno how many moa goin lissen to wat we preach, but we kno dat Jehovah getting togedda uku plenny peopo who goin make um tru da big trouble. (Jesus Show 7:9, 14) Jehovah iz da Boss Guy dat own da crop an he kno dat plenny peopo still goin lissen to da good stuff, so we goin keep preaching.

18. Wat we like oddas fo see wen we preach?

¹⁸ Jesus followas always wen go all out fo preach. Fo exampo, da aposals wuz fired up an no wuz sked fo preach, so wen da peopo had see dis dey wen kno “dat dese guys, . . . wen hang out wit Jesus.” (Jesus Guys 4:13) We like peopo see wen we go out fo preach, dat we copy Jesus exampo too.