Afta Adam an Eve wen leave da Eden Garden, dey had plenny keikis. Dea firs boy, Cain, wen come one farma, an dea second boy, Abel, wen take kea sheep.

One day Cain an Abel wen make sacrifices to Jehovah. You kno wat iz one sacrifice? Dass one spesho kine present. Jehovah wuz happy wit Abel’s present, but he no wuz happy wit Cain’s present. Dat had make Cain supa mad. Jehovah wen tell Cain fo watch out cuz bein supa mad goin make him do someting bad. But Cain neva lissen.

An dass why Cain wen tell Abel fo ‘go wit him to da country side.’ Wen dey wuz by demselfs ova dea, Cain wen murda his braddah. Wat Jehovah wen do about dis? Jehovah wen punish Cain an wen sen him far away from his ohana. An Cain no could come back eva.

Wat us guys learn from dis? We might start fo get mad if tings no go da way we like um go. If we start fo feel supa mad inside, or if odda guys tell us watch out cuz dey see us getting supa mad, we gotta change how we tink an how we feel real fas befoa we end up doin someting bad cuz of dat.

Jehovah always goin rememba Abel, cuz he wen love Jehovah an wen do wat wuz right. God goin bring him back to life wen He make da eart one paradise bumbye.

Afta a while, started fo have choke peopo on da eart. Plenny of dem wuz bad. Even some of da angels in da sky wen come bad. Dey wen leave dea home in da sky an wen come down to da eart. You kno how come dey wen do dat? So dey could look like regula peopo an marry da wahines.

Da angels an wahines had bebe boys togedda. Dose boys wen grow up fo be supa strong bullies. Dey wen hurt peopo. Jehovah no could let dose tings keep happening. So he figga he goin make one flood fo wipe out all da bad peopo.

But had one guy dat wuz diffren. He wen love Jehovah. His name wuz Noah. He had one wife an 3 boys, Shem, Ham, an Jafet, an dey all wuz married. Jehovah wen tell Noah fo build one big boat so dat him an his ohana could stay alive. Dat boat had look like one big box dat could float on da watta. Jehovah wen tell Noah fo bring all kine diffren animals in da boat so dey could live too.

Noah wen start fo build da big boat right away. Wen take him an his ohana about 50 years fo build um. Dey wen make um exackly how Jehovah wen tell dem fo make um. Same time, Noah wen tell da peopo about da flood. But nobody wen lissen.

Now, wuz time awready fo get into da big boat. We go check out wat wen happen nex.