Jehovah Can Help Us Be Happy Fo Real Kine

1-2. (a) How peopo feel today? (b) Wat we goin go ova in dis lesson?

PEOPO today try do anyting fo be happy. But still yet, dey feel sad an feel like someting missing in dea life. Even Jehovah’s peopo can feel lidat. Cuz we stay living in da las days, we kno we goin go tru problems dat make us sad or “presha [us] out.”​—2 Tim 3:1.

² We go check out wat tings can bum us out an how we can be happy again if dat happen. But firs, we go look who can make us fo real kine happy.

WHO CAN MAKE US FO REAL KINE HAPPY?

3. Wat we learn about Jehovah from all da stuff he wen make? (Go look da pichas.)

³ Jehovah always stay happy an he like us feel lidat too. Dass how come he wen make all dis unreal stuff fo us be happy. Like he wen make da beautiful eart wit all da unreal colors, an get da animals dass good fun fo watch playing, an even get all da ono food dat we can grind. Jehovah really love us an he like us be happy!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) How can Jehovah be happy even tho he see suffaring? (b) How does Jehovah help us? (Songs Fo God 16:11)

⁴ Jehovah kno dat peopo stay suffaring, an wen he see dat, it make him sad. But still yet da Bible call him “da God dat stay . . . good inside.” (1 Tim 1:11) Even tho he see all dat, how can Jehovah be happy? One reason iz, he kno dat all da suffaring dat we stay goin tru not goin las. He goin do someting fo fix all dat. But till dat time, Jehovah undastan wat we go tru an he like help us. How he do dat? One ting he do iz, he help us be fo real kine happy no matta wat we go tru. (Read um Songs Fo God 16:11.) We go see how knowing Jehovah wen make Jesus happy.

5-6. How come Jesus iz happy?

⁵ Afta Jehovah, da nex mos happy person iz Jesus. How come? We go look two reasons. (1) He jalike his Faddah in ery way. (Col 1:15) (2) Jesus had spen supa long time wit his Faddah moa den anybody else.

⁶ Jesus iz always happy doin wateva his Faddah ask him fo do. (Smart Guys 8:30, 31; John 8:29) An cuz Jesus always lissen, Jehovah so proud of him.​—Mat 3:17.

7. How we can be happy?

⁷ We goin be happy if we keep getting fo kno Jehovah. Wen we learn how Jehovah tink an feel, we can copy him moa betta an dat make us happy. An wen we do da tings dat Jehovah ask, he happy wit us, an dat make us feel good too.a (Songs 33:12, NWT) But if sometimes we feel down, or maybe we feel sad all da time, dat mean Jehovah not happy wit us? No! Cuz we not perfeck, we goin hurt, feel sad, an be depress sometimes. Jehovah undastan dass wat can happen living in dis world. (Songs 103:14) We go check out wat can bum us out an wat we can do fo be happy again.

WATCH OUT FO DA TINGS DAT CAN BUM YOU OUT

8. Wat can happen wen we get problems?

⁸ #1 Life’s problems. Wen you go tru problems, dat can make you presha out or feel sad, speshly wen you no moa control ova um. Problems like peopo goin agains you, natural disastas, money problems, getting sick, or even getting ol. Da Bible tell dat dose kine tings can make “you lose fight.” (Smart Guys 15:13) Dass wat wen happen to one elda name Babis. In ony four years, he wen lose his braddah an his parents. He wen say, “I wen feel all by myself an nobody could help me. Wen bodda me plenny cuz I wanted fo spend moa time wit my parents an braddah befoa dey wen mahke but I couldn’t cuz I had plenny fo deal wit.” Iz no joke dat da problems we go tru can be so hahd dat it make us feel tired an all bummed out.

9. Wat can help us be happy again? (Jeremiah 29:4-7, 10)

⁹ Wat can help us fo be happy again? We can be moa happy if we stop worrying about da stuff we no can control, an be tankful fo da stuff dat we get. Da world like make us tink dat eryting in oua life gotta be perfeck fo be happy. But dass all one bulai. Try look wat Jehovah wen tell da guys dat had get taken to Babylon. He wen tell dem fo jus do dea bes fo be happy ova dea. (Read um Jeremiah 29:4-7, 10.) Wat we can learn from dis? Try see da good tings in yoa life an be tankful fo all dose tings. Rememba, Jehovah goin help you an he no goin bag from you. (Songs 63:7; 146:5) Effie, who wen get paralyze in one accident, wen say, “Jehovah, my ohana, an da local hui wen help me out plenny. I wanted fo show dem dat I wuz tankful fo all da stuff dat dey wen do, an still yet doin, so I try my bes fo be happy.”

10. How we can be happy even if we get problems?

¹⁰ Even wen we get problems or bad tings happen to us or oua family, we can still yet be happy.b (Songs 126:5) How come? Cuz being fo real happy no depend on wat stay goin on in yoa life. One pionea sistah Maria wen tell, “Wen we get problems we can stay happy cuz we rememba da tings dat Jehovah wen promise. Dis no mean we neva goin cry or we not goin feel sad. But oua Faddah can help us stay happy no matta wat we go tru.” No matta how hahd tings get, Jehovah goin hemo all da bad tings we go tru. It not goin las foeva. Oua problems iz like footprints on da beach, dey goin get wash away.

11. How Paul’s exampo help you?

¹¹ Wen we get plenny problems, we might start fo tink Jehovah not happy wit us or maybe he not blessing us. If we start fo tink lidat, would be good fo check out some of da faitful guys in da Bible dat had go tru hahd times. Like tink about da aposal Paul. Jesus wen pick him fo preach to “da peopos dass not Jew guys an dea kings an to da Israel peopo too.” (Jesus Guys 9:15) Dass awesome, yeah? But still yet Paul’s life no wuz easy, he had plenny problems. (2 Cor 11:23-27) Dat wen mean Jehovah wuzn’t happy wit him? No ways! Paul ony could hang in dea iz cuz Jehovah wen help him. (Rome 5:3-5) Try tink about wat you goin tru. If you get plenny problems an still yet hanging in dea, dat mean Jehovah stay happy wit you an he blessing you.

12. Wat if we no can do all dat we like fo Jehovah?

¹² #2: We like do moa fo Jehovah, but no can. (Smart Guys 13:12) We like do moa fo Jehovah cuz we love him an we like show him we tankful. But maybe cuz of wat stay goin on in oua life now, we no can do all da stuff we like fo Jehovah. An dis can bum us out. (Smart Guys 17:22) One pionea sistah Holly wen say, “I wanted fo go to da Skool Fo Kingdom Evangelizas, preach in anodda country, or go help out at da Ramapo projeck. But tings in my life wen change up an I couldn’t do any of dose tings an I wuz bummed out. Iz frustrating wen you like do someting but no can.” Plenny peopo feel lidat.

13. If we no can do da tings we like do fo Jehovah, wat odda stuffs we can do?

¹³ Wat can help us fo be happy again? Rememba dat Jehovah no ask us fo do moa den wat we can. We still importan to him even tho we no can do da stuff we like do fo him. Wat Jehovah like iz fo us kno oua limits an be faitful to him. (Mic 6:8, NWT; 1 Cor 4:2) Jehovah kea moa bout who we stay on da inside, den bout da stuffs we can do. So no expeck moa of yoaself den wat Jehovah expeck of you.c If you no can do all da stuff you like fo Jehovah, jus tink of da stuff you can do. Like training da younga guys or building up da olda ones. Or anodda ting you can do iz help somebody by visiting dem, calling dem up, or sending dem one text. Wen you do all dat kine stuff, Jehovah goin be happy an you goin be happy too. An rememba dat in da new world, you goin get plenny chances fo serve Jehovah in unreal ways dat you no can even imagine. Holly, da sistah we had talk about earlia, wen say, “Wen I start fo feel junk, I rememba dat I goin live foeva. In Paradise, I can do all da stuff I wanted fo do fo Jehovah wit his help.”

14. Wat else can make us no be happy?

¹⁴ #3: Goin all out fo make yoaself happy. Maybe on social media, we goin see guys look fo real kine happy cuz dey get nice tings, an dey always having one good time. We might start fo believe dat we goin be fo real kine happy if we live like dem too. Like jus doin da tings we like, shopping all da time an traveling all kine places. Iz not wrong fo do dese kine tings cuz Jehovah like us enjoy life. But plenny guys wen figga out dat all da tings dey had tink wuz goin make dem happy, it neva. Eva, one pionea, wen tell, “Wen yoa whole life iz about doin stuff fo make yoaself happy, no moa end to dat.” If you ony go all out fo make yoaself happy, you goin feel empty.

15. Wat we can learn from King Solomon?

¹⁵ King Solomon wen go all out fo try make himself happy. He had eat all kine ono foods, lissen to good music, an wen buy all kine fancy stuffs. But still yet, he wuzn’t happy. He wen tell, “Get way mo stuff fo talk bout, way mo fo see an hear.” (Teacha 1:8; 2:1-11) Wat da world say goin make you fo real kine happy iz like fake money. Look like wort plenny, but iz not.

16. Why we goin be happy wen we do good tings fo oddas? (Go look da pichas.)

¹⁶ Wat can help us fo be happy again? Jesus wen teach us, “Da guy dat give, he stay mo betta inside den da guy dat get.” (Jesus Guys 20:35) An elda name Alekos wen tell, “I try fo do small tings fo help odda peopo. Da moa I do fo oddas, da less I tink about myself. An dass wat make me happy.” Wat you can do fo help oddas? If you see somebody stay struggling, go talk to dem. Maybe you no can fix dea problem, but you can build dem up if you lissen to dem real good an try fo undastan how dey feel. You can even remind dem fo tell Jehovah how dey feel cuz Jehovah kea about dem. (Songs 55:22; 68:19) Help dem fo see dat Jehovah neva goin bag out on dem. (Songs 37:28; Isa 59:1) You can even do someting nice like making dem food, or goin on one walk wit dem. You can even ask dem fo go field service wit you. Cuz weneva we preach, we always feel betta. Let Jehovah use you fo build up odda peopo. Wen you use yoa time fo help oddas, you goin be fo real kine happy!​—Smart Guys 11:25.

17. Fo be fo real kine happy, wat we gotta do? (Songs Fo God 43:4)

¹⁷ Da moa we get fo kno Jehovah, da moa happy we goin be. Da Bible tell us dat Jehovah can make us feel “real good inside.” (Read um Songs Fo God 43:4.) So no matta wat kine problems we get, we no need presha out or be sked. If Jehovah iz oua bes Fren, den he can help us be happy foeva!​—Songs 144:15.