Stay Happy Wen You Get Olda

1-2. How Jehovah look at faitful olda ones? (Songs Fo God 92:12-14; Go look da picha.)

IN SOME places, iz one good ting fo get olda. But odda places dey try eryting dey can fo no look old. Like if dey see one white hair dey pull um out right away. But no matta how hahd dey try, notting can stop dem from getting olda.

² But how Jehovah look at da olda guys who serve him? (Smart Guys 16:31) He say dey like beautiful trees. (Read um Songs Fo God 92:12-14.) How come? Olda trees usually get plenny leaves an flowas dat make um look beautiful, like da Japanese cherry blossom tree. Plenny of dose trees iz ova tousan years old. Jus like dose beautiful trees, faitful olda ones iz beautiful to Jehovah. He no look at da gray hairs, but he look at da person dey stay on da inside. He see how dey wuz loyal to Him an serve Him fo long time, tru da good an bad times.

3. How Jehovah wen use olda ones fo do unreal real tings fo him?

³ Wen one person get olda, dey still importan to Jehovah.a Jehovah wen use olda ones fo do importan work, an even unreal stuff. Like Sarah, she wuz old wen Jehovah had say she wuz goin have one boy. From dat boy one big nation wuz goin come, an even da Messiah. (Start 17:15-19) Moses wuz old wen Jehovah tell him fo take da Israel peopo out of Egypt. (Egypt 7:6, 7) An da aposal John wuz old too wen Jehovah had get him fo write five books of da Bible.

4. Wat can help olda ones hando da problems dat come up in dea life? (Smart Guys 15:15) (Go look da picha.)

⁴ Az you get olda, you start fo get plenny new problems. One sistah joking aroun wen say, “Wen you get old, you no can be one wimp.” But being happyb can help olda ones hando any problems dat come up in dea life. (Read um Smart Guys 15:15.) In dis lesson, we goin talk about wat olda ones can do fo stay happy. Anodda ting we goin talk about iz wat oddas can do fo help da kupunas in da hui. Firs, we go talk about why can be hahd fo stay happy az we get olda.

WHY CAN BE HAHD FO STAY HAPPY WEN WE GET OLD

5. Wat can bring olda ones down?

⁵ Wat iz some stuff dat can bring you down? Maybe you bummed cuz you no can do da stuff you use to do befoa. You probly miss da days wen you wuz young an healty. (Teacha 7:10) One sistah name Ruby wen tell, “I in so much pain, I get hahd time putting on my clothes or getting aroun. Even simpo stuff like putting on socks iz hahd fo me. Cuz of da arthritis in my hands, it make um hahd fo do anyting.” Harold, one braddah from Bethel, wen say, “I wuz in top shape, an I mad cuz I no can do da tings I use to befoa. I love playing baseball an peopo use to say, “Give da ball to Harold cuz he goin help us win da game.” But now I no can even throw da ball.”

6. (a) Wat else could bring olda ones down? (b) Wat can help olda ones see if dey should stop driving? (Go look da article “Should I Stop Driving, Or Wat?”)

⁶ Anodda ting dat can get you down iz dat you no can do da stuff you use to by yoaself anymoa. Like can be hahd if somebody gotta come yoa house fo take kea you or you gotta move in wit one of yoa kids. Or maybe you no can drive anymoa or go places by yoaself, cuz you not strong enuff or no can see good. Dass a bumma! Maybe you no can do all da stuff you use to do befoa, but rememba you wort plenny to Jehovah an oddas. Jehovah kno how we feel, an wat matta mos to him iz how much we love him an oua braddahs an sistahs.​—1 Sam 16:7.

7. Wat can help if you tink dat you not goin live long enuff fo see dis world get wipe out?

⁷ Maybe you bummed cuz you tink you not goin live long enuff fo see Jehovah wipe out dis pilau world. If you feel lidat, rememba how come he patient an waiting fo do dat. (Isa 30:18) He like plenny peopo fo kno him an be his fren. (2 Pet 3:9) If you start fo feel down, try fo rememba all da guys dat get chance fo get save befoa da end come. Some of dose guys could be yoa own ohana.

8. Wen olda ones iz sick or in pain, wat dey might do?

⁸ Wedda we young or old, if we sick or in pain, get one good chance we goin say or do someting dat we shouldn’t. (Teacha 7:7; Jam 3:2) Like wen Job wuz in pain an all buss up, he wen say tings dat wuz off. (Job 6:1-3) Olda ones can say or do tings dey wouldn’t normally cuz of one medical problem or da medicine dey take. But even if we old or sick, wouldn’t be right fo be mean or demanding. An if we awready had say someting mean to somebody, we gotta be fas fo say sorry.​—Mat 5:23, 24, NEW WORLD TRANSLATION.

HOW FO STAY HAPPY

9. Why let oddas help you? (Go look da pichas.)

⁹ Let oddas help you. (Gal 6:2) Maybe at firs goin be hahd fo you do dat. One sistah name Gretl tell, “Sometimes not easy fo me ask fo help, cuz I feel like I stay boddaring dem. It wen take time fo me change how I tink, be humbo, an see dat I need da help.” Rememba dat wen you let oddas help you, dey goin be happy. (Jesus Guys 20:35) An you goin be happy fo see how much dey love you an like take kea of you.

10. Why iz good fo show you tankful? (Go look da picha.)

¹⁰ Show you tankful. (Col 3:15; 1 Tess 5:18) Wen oddas do good tings fo us, we tankful but sometimes we foget fo show um. But wen we smile an say, “Right on, mahalo!” we make oua frenz feel good. Leah, one sistah who take kea olda ones at Bethel, wen say, “One of da sistahs I take kea of leave me messages on small pieces of paypah. Dey not long but dey so nice. I love getting um an dey make me feel supa happy fo kno she appreciate me.”

11. How you can help oddas? (Go look da picha.)

¹¹ Try help oddas. Wen you focus on helping oddas, dat goin help you fo no tink too much about yoa own problems. Get one saying dat olda peopo iz like books dat can teach oddas plenny. But if peopo no read da books, dey learn notting from um. So same lidat, younga guys no can learn from you if you no talk story an share yoa mana’o wit dem. So try get fo kno da younga guys by asking dem questions an lissening wen dey talk. Den you can tell dem how Jehovah wen help you in yoa life, an how lissening to him goin make dem happy. Fo shua wen you help da younga ones, dat goin make you feel good.​—Songs 71:18.

12. From wat Isaiah 46:4 tell, wat Jehovah promise fo do fo olda ones? (Go look da picha.)

¹² Pray to Jehovah fo help you come strong. Sometimes you might feel tired or weak an dat can make you lose fight. But rememba dat Jehovah iz supa strong an da Bible tell dat he “no goin come tired o wore out.” (Isa 40:28) So fo shua he can give you all da powa you need. (Isa 40:29-31) In fact, he promise fo do dat. (Read um Isaiah 46:4.) An Jehovah neva bags out on his promises. (Josh 23:14; Isa 55:10, 11) So wen you pray, Jehovah goin give you all da help you need. Den you goin feel how much he love you an dat goin make you supa happy.

13. From wat 2 Fo Da Corint Peopo 4:16-18 tell, wat we gotta rememba? (Go look da picha.)

¹³ Rememba you goin be young an healty again. If you rememba any hahd time we get not goin las foeva, dat goin make um moa easy fo us hang in dea. An da Bible tell us dat getting old an getting sick goin be gone. (Job 33:25; Isa 33:24) So you can be happy cuz you kno dat yoa bes days iz not in da pas but in da future, wea you goin be healty, stronga, an moa beautiful den eva befoa. (Read um 2 Fo Da Corint Peopo 4:16-18.) But wat can oddas do now fo help?

HOW ODDAS CAN HELP

14. How come iz importan fo visit an call olda ones?

¹⁴ Call an visit da olda braddahs an sistahs ery time. (Heb 13:16) Olda ones can feel all alone. One braddah name Carlc, who stay stuck at his house wen say, “Cuz I gotta stay in da house all day, I get bored, mad, an all anxiety out. I feel like one animal stuck in one cage.” Wen we visit da olda ones, dey kno dat we love dem an dey spesho to us. All us rememba one time wen we wanted fo call or visit one kupuna in da hui, but we neva cuz we wen get busy. Wat can help us no foget about dem? (Php 1:10) Maybe you can put one reminda in yoa calenda fo text or give dem one call. Anodda ting you can do iz make one plan fo hang out wit dem.

15. Wat young guys an kupunas can do togedda?

¹⁵ If you one young guy, maybe you wonda wat you can talk about or do wit da kupunas. But no worry, jus be one good fren. (Smart Guys 17:17) Talk to dem befoa or afta da meetings. Maybe you can ask dem wass dea favorite scipcha or about someting funny dat wen happen back in da day. You can even ask dem fo come watch da broadcas wit you. Maybe you can help dem wit odda stuff, like dea phone or tablet, or making shua dey wen download da newes tings we goin study. One sistah name Carol wen tell, “Try ask olda guys fo do fun tings wit you. I old but I still like to have fun. I like fo go shopping, goin out fo eat, an spending time outside.” An one 33 year old sistah name Maira wen say, “One of my bes frenz iz 90 years old. We 57 years apaht, but we still yet have good fun watching movies and doin stuff togedda. An wen we go tru problems, we ask each odda fo advice an we help each odda out.”

16. Why iz good fo go wit oldas ones to dea doctas appointments?

¹⁶ Go wit dem to dea doctas appointments. On top of giving dem rides to da doctas, stay wit dem fo make shua dey get da help dey need an erybody treat dem good. (Isa 1:17) Wen da docta talk wit dem, try take notes. One anty name Ruth had say, “Wen I go to da docta by myself, dey no believe wat I say. Sometimes dey would tell me, “Yoa problem stay all in yoa head.” But wen somebody come wit me to da doctas, dey treat me way betta. I supa tankful fo my braddahs an sistahs who come wit me to my appointments.”

17. Wat kine ways you can work wit olda ones in service?

¹⁷ Work wit dem in service. Some kupunas get hahd time goin house to house, so maybe you can try some of dese odda tings. Invite dem fo go cart witnessing wit you an even bring dem one chair. You could ask dem fo come wit you on one Bible study. You could even have da Bible study at dea house. Da eldas could tink about having da meetings fo field service at da kupuna’s house fo make um moa easy fo dem preach. Anyting we do fo help da olda ones, goin make Jehovah happy.​—Smart Guys 3:27; Rome 12:10.

18. Wat we goin talk about in da nex lesson?

¹⁸ Dis lesson wen remind us dat oua olda ones iz wort plenny to Jehovah an all us. Getting old iz hahd, but wit Jehovah’s help you can stay happy. (Songs 37:25) How awesome fo kno dat yoa bes days iz not in da pas, but in da future! But wat if you take kea of somebody in yoa family or one fren dat stay sick? How you can stay happy? We goin talk about da ansa to dat in da nex lesson.