Երիտասարդները հարցնում են...

Ինչպե՞ս խուսափել մինչամուսնական սեքսից

«19 տարեկան էի, երբ իմ դպրոցից մի տղայի հետ առաջին անգամ սեռական հարաբերություն ունեցա։ Չեմ կարող նկարագրել, թե իմ այդ արարքից հետո որքան ստորացած և անարժեք էի ինձ զգում»։ (Լեյսի)

«ՓԱԽԷՔ պոռնկութիւնիցը»,— պատվիրում է Աստվածաշունչը (Ա Կորընթացիս 6։18)։ Սակայն այսօր պատանիներից քչերն են միայն, որ ցանկանում են հնազանդվել Աստծո Խոսքին և հեռու մնալ մինչամուսնական սեռական հարաբերություններ ունենալուց։ Լեյսիի նման, շատերն են տրվել իրենց ցանկություններին և արդյունքում հոգեկան տառապանքներ կրել ու խղճի խայթ զգացել։

Ճիշտ է, միշտ չէ, որ հեշտ է կառավարել սեռական կրքերը։ Ինչպես նշվում է մի դասագրքում, սեռական հասունության հետ կապված հորմոնալ փոփոխությունների հետ մեկտեղ՝ անխուսափելիորեն «աճում են նաև սեռական մղումները» («Adolescent Development»)։ Փոլ անունով մի երիտասարդ ասում է. «Ժամանակ առ ժամանակ սեքսի մասին մտքերը առանց որևէ ակնհայտ պատճառի ուղեղիս մեջ են մտնում»։

Մանկաբուժության գծով պրոֆեսոր Հովարդ Կուլինը այս առնչությամբ հետևյալն է ասում. «Շատ հեշտ է [պատանիների] վարքը բարդել միայն հորմոնների վրա»։ Նա բացատրում է, որ այդ հարցում սոցիալական գործոնները նույնպես իրենց դերն ունեն։ Իրականում այդ գործոնները, մասնավորապես հասակակիցների ազդեցությունը, կարող են շատ զորավոր լինել։

Պատրիսիա Հերշը իր «Առանձնացած ցեղ» գրքում առաջ է քաշում այն միտքը, որ մեր օրերում «պատանիները կառուցել են իրենց սեփական հասարակարգը .... Լինելով ավելին, քան ընդամենը հասակակիցներից բաղկացած մի խումբ՝ այն դարձել է [չափահաս տարիքի մարդկանցից] մեկուսացած մի հասարակություն՝ իր սեփական արժեքներով, սկզբունքներով և բարոյագիտությամբ»։ Սակայն այսօր շատ պատանիների «սկզբունքները» և «բարոյագիտությունը» հաճախ խրախուսում են նրանց տրվել սեռական կրքերին և ոչ թե կառավարել դրանք։ Այդպիսով՝ շատերն ընկնում են մինչամուսնական սեռական հարաբերությունը «փորձելու» ճնշման տակ։

Այնուհանդերձ, քրիստոնյա պատանիները իմաստուն կերպով խուսափում են պոռնկության բոլոր ձևերից՝ գիտակցելով, որ Աստված դատապարտում է այն որպես «մարմնի գործերից» մեկը (Գաղատացիս 5։19)։a Սակայն, չնայած այդպիսի մեծ ճնշումներին, ինչպե՞ս կարող ես դո՛ւ բարոյապես մաքուր մնալ։

Փնտրիր խոհեմ ընկերներ

Հետաքրքիրն այն է, որ թեև սոցիալական ճնշումները կարող են բացասական ազդեցություն թողնել, սակայն եթե ընկերների ճիշտ ընտրություն կատարես, ապա այդ ընտրությունը կարող է դրական ազդեցություն թողնել քեզ վրա։ Ահա թե ինչ է Աստվածաշունչն ասում այդ առումով. «Իմաստունների հետ վարուողը իմաստուն կ’դառնայ» (Առակաց 13։20, Ա Կորնթացիս 15։33)։ Առողջապահության համաշխարհային կազմակերպության (ԱՀԿ) մի զեկուցման մեջ ասվում է, որ «այն պատանիները, որոնք իմաստալից փոխհարաբերությունների մեջ են իրենց ծնողների, ուրիշ հոգատար մարդկանց և իրենց հասակակիցների հետ.... հավանականությունը քիչ է, որ սեռական արարքներ կկատարեն»։

Ծնողներիդ հետ իմաստալից փոխհարաբերություններ ունենալը կարող է մեծ վարձատրություններ բերել քեզ։ Ջոզեֆ անունով մի պատանի ասում է. «Իրոք որ, ծնողներս ինձ շատ օգնեցին, որ կարողանամ դիմադրել սեռական արարք փորձելու ճնշմանը»։ Իրականում, աստվածավախ ծնողներդ կարող են Աստծո Խոսքի վրա հիմնված սահմանափակումներ դնել և ճիշտ դաստիարակություն տալ քեզ (Եփեսացիս 6։2, 3)։ Նրանք կարող են օգնել քեզ այդ պայքարում բարոյապես մաքուր մնալ։

Ճիշտ է, սկզբում գուցե անհարմար զգաս նրանց հետ այդ թեմաներով զրուցել։ Բայց ի զարմանս քեզ, կտեսնես, թե որքան լավ են նրանք հասկանում քո զգացումները։ Չէ՞ որ նրանք էլ են մի ժամանակ պատանի եղել։ Այս առումով Սոնյան խորհուրդ է տալիս մյուս պատանիներին. «Գնացեք և զրուցեք ձեր ծնողների հետ ու մի ամաչեք խոսել սեքսի մասին»։

Իսկ ի՞նչ անել, եթե ծնողներդ չեն հետևում Աստվածաշնչի չափանիշներին։ Թեպետ հարգում ես նրանց, այնուհանդերձ, այսպիսի դեպքերում գուցե հարկ լինի առաջնորդությունը փնտրել ընտանիքից դուրս։ Օրինակ՝ Փոլը, որի մասին վերևում հիշատակվեց, նշում է. «Ես մեծ օգնություն եմ ստանում, երբ այս հարցերի շուրջ զրուցում եմ ամուսնացած հասուն քրիստոնյաների հետ»։ Իսկ Քենջին՝ մի երիտասարդ աղջիկ, որի մայրը նույնպես չի ապրում Աստվածաշնչի չափանիշներով, ասում է. «Խորհրդի համար ես մշտապես դիմում եմ հոգևոր հասուն քրիստոնյաներին. նրանք հոգևորապես կերտիչ խորհուրդներ են տալիս»։ Սակայն նա նաև ավելացում է. «Ես խուսափում եմ նրանցից, ովքեր բարոյապես ամուր անձնավորություններ չեն, անգամ եթե պնդում են, թե նույն կրոնական համոզմունքներն ունեն, ինչ որ ես»։

Ընկերների ընտրության հարցում երբեմն անհրաժեշտ է զգոնություն պահպանել նույնիսկ քրիստոնեական ժողովում։ Աստվածաշունչը մեզ հիշեցնում է, որ ցանկացած մեծ խմբի մեջ հաճախ կլինեն այնպիսիները, ովքեր չեն դրսևորի հարգալից և պատվաբեր վարք (Բ Տիմոթէոս 2։20)։ Իսկ ի՞նչ կանես դու, եթե նկատես, որ ձեր ժողովում որոշ պատանիներ իրականում ‘կեղծավոր’ են (Սաղմոս 26։4)։ Խուսափիր ընկերություն անել նման անհատների հետ և փնտրիր այնպիսի ընկերներ, որոնք կօգնեն քեզ բարոյապես մաքուր մնալու հարցում լինել վճռական։

Մերժիր կործանարար պրոպագանդան

Այս ամենից բացի, դու պետք է նաև ջանքեր թափես, որ պաշտպանես ինքդ քեզ սեքսուալ պատկերների և այդ թեմայով անուղղակի ակնարկների «տարափից», որոնք կարող են քեզ վրա շարունակ ներգործել գրքերի, ամսագրերի, երաժշտական տեսահոլովակների, տեսախաղերի, ֆիլմերի և Ինտերնետի միջոցով։ Մասսայական լրատվական միջոցները մինչամուսնական սեքսը ներկայացնում են որպես մի այնպիսի բան, որը հրապուրիչ է, հաճույք պատճառող և անվտանգ։ Արդյունքը՞։ Քենջին ասում է. «Ես դիտում էի շոու ծրագրեր, որոնցում սեքսը ներկայացվում էր որպես մի սովորական բան, և որտեղ նույնիսկ համասեռամոլության մասին էր ակնարկներ արվում։ Հետևանքը եղավ այն, որ ես սկսեցի մոռանալ, թե որքան լրջորեն է Եհովան վերաբերվում այդ հարցերին»։

Ճշմարտությունն այն է, որ հայտնի զվարճությունները հաճախ վարպետորեն թաքցնում են մինչամուսնական սեքսի պատճառած տխուր հետևանքները՝ անցանկալի հղիությունները, վաղաժամ ամուսնությունները և սեռային ճանապարհով փոխանցվող հիվանդությունները։ Ուստի թույլ մի տուր, որ խաբվես այնպիսիների կողմից, «որ չարին ասում են բարի, եւ բարիին՝ չար» (Եսայիա 5։20)։

Հիշիր Առակաց 14։15 համարում գրված խոսքերը. «Պարզամիտը հաւատում է ամեն խօսքի, բայց խորագէտը քննում է իր քայլերը»։ Հետևաբար, եթե գիրք կարդալիս, Ինտերնետից օգտվելիս կամ հեռուստացույց դիտելիս քո մեջ սեռական ցանկություն է առաջանում, անհապա՛ղ քայլեր ձեռնարկիր. փակիր գիրքը, անջատիր համակարգիչը կամ փոխիր հեռուստացույցի այդ ալիքը։ Ապա միտքդ ուղղիր մեկ այլ՝ կերտիչ բանի վրա (Փիլիպպեցիս 4։8)։ Այդպես վարվելով՝ դեմ կդնես նման սխալ ցանկություններին մինչև դրանց զարգանալը (Յակոբոս 1։14, 15)։

Խուսափիր վտանգներով հղի իրավիճակներից

Մտերմությո՞ւն ես անում ինչ–որ մեկի հետ։ Եթե այո, ուրեմն զգոն լինելու կարիք ունես։ Աստվածաշունչն ասում է. «Խորամանկ է սիրտն ամենից աւելի եւ ապականուած» (Երեմիա 17։9)։ Իրականում շատ հեշտ է, որ ձեր ֆիզիկական մտերմությունը վերածվի սեռական սխալ վարքի։ Ուստի խելամիտ քայլեր ձեռք առեք, այսինքն՝ թող ձեզ ուղեկցի մի երրորդ անձնավորություն, կամ էլ մի տեղ գնալիս խմբով դուրս եկեք։ Խուսափեք երկուսով մենակ մնալուց և գայթակղություն առաջացնող իրավիճակներից։

Հնարավոր է՝ դու նշանված ես, և քեզ թվում է, թե ձեր սերն իրար արտահայտող արարքները նորմալ են։ Սակայն այդ առնչությամբ ԱՀԿ–ն զգուշացնում է. «Երբ ամուսնությունը արդեն մոտ է, կանանց մեծամասնությունը մինչամուսնական սեռական հարաբերություններ է ունենում. այդ երևույթը նկատվում է նույնիսկ պահպանողական մշակույթ ունեցող երկրներում»։b Հետևաբար ձեր ֆիզիկական մտերմությանը սահմաններ դիր և այդպիսով խնայիր ինքդ քեզ անտեղի տառապանք պատճառելուց։

Որքան էլ որ ցնցող թվա, պատանիներից շատերին, հատկապես պատանի աղջիկներին բռնությամբ կամ բռնի ուժով են ստիպում սեռական հարաբերություն ունենալ։ Մի հետազոտության համաձայն՝ «Միացյալ Նահանգներում երիտասարդ աղջիկների 60 տոկոսը, ովքեր սեռական հարաբերություն են ունեցել մինչև 15 տարեկան հասակը, դա արել են իրենց կամքին հակառակ»։ Բռնություն գործողները հաճախ ուժ են բանեցնում իրենց զոհին տիրելու համար (Ժողովող 4։1)։ Օրինակ՝ Աստվածաշնչում ասվում է, որ Դավիթի որդի Ամնոնը «սիրեց» իր քույր Թամարին և խաբեությամբ ստիպեց նրան սեռական հարաբերություն ունենալ իր հետ (Բ Թագաւորաց 13։1, 10–16)։

Սակայն սա չի նշանակում, թե հնարավոր չէ կանխել բռնաբարությունը։ Վտանգի հանդեպ զգոնություն դրսևորելով, խուսափելով վտանգներով հղի իրավիճակներից և սպառնալիքի դեպքում արագ քայլեր ձեռք առնելով՝ դու շատ բան կարող ես անել՝ պաշտպանելու ինքդ քեզ։c

«Միացրու» քո սիրտը

Հուսով ենք՝ այս հոդվածում քննարկված խորհուրդները կօգնեն քեզ այդ դժվարին պայքարում բարոյապես մաքուր մնալ։ Ի վերջո, քո վարքը ցույց կտա, թե իրականում ինչ կա քո սրտում։ Հիսուսն ինքն ասաց, որ «սրտից են դուրս գալիս.... պոռնկություններ» (Մատթէոս 15։19)։ Ուստի, այս կենսական խնդրում դու պետք է պայքարես երկատված (կեղծավոր) ու կես սիրտ (գաղջ) ունենալու հակման դեմ (Սաղմոս 12։2; 119։113)։

Եթե չես կարողանում վճռական լինել կամ քո սրտում ներքին պայքար ես մղում, Դավիթի նման, աղերսանքով խնդրիր Աստծուն. «Միացրու իմ սիրտը որ քո անունիցը վախենայ» (Սաղմոս 86։11)։ Այնուհետև գործիր աղոթքիդ համաձայն՝ ուսումնասիրելով Աստվածաշունչը և նրա վրա հիմնված հրատարակությունները, ապա կիրառիր սովորածդ (Յակոբոս 1։22)։ Լիդիան ասում է. «Ես վճռել եմ դիմադրել իմ մեջ առաջ եկող սեռական ցանկություններին՝ հիշելով, որ ‘ոչ մի պոռնիկ կամ պիղծ ժառանգություն չունի Աստծո արքայությունում’ (Եփեսացիս 5։5)։

Մինչամուսնական սեռական հարաբերություններից խուսափելը թերևս այնքան էլ հեշտ չէ։ Սակայն Եհովայի օգնությամբ դու կարող ես բարոյական մաքրություն պահպանել և խնայել ինքդ քեզ ինչպես նաև ուրիշներին հոգեկան ապրումներ ու տառապանք պատճառելուց (Առակաց 5։8–12)։

[Ծանոթագրություններ]

[Նկար 14–րդ էջի վրա]

Մտերմության շրջանում խմբով դուրս գալը կարող է պաշտպանություն լինել

[Նկար 15–րդ էջի վրա]

Քո զգացումների մասին ծնողներիդ պատմելը կարող է օգնել քեզ բարոյապես մաքուր մնալ