Երկյուղիր Եհովայից ամեն ժամանակ
1 «Իմաստութեան սկիզբը Տիրոջ [«Եհովայի», ՆԱ] երկիւղն է» (Սաղ. 111։10)։ Այդ զգացումը մղում է մեզ բարի գործերի և օգնում է չարից հեռու մնալ (Առակ. 16։6)։ Այն մեր Արարչի հանդեպ խոր հարգանքի արտահայտություն է և օգնում է մեզ խուսափել նրան տհաճություն պատճառելուց ու անհնազանդ գտնվելուց։ Դա մի այնպիսի զգացում է, որը հարկավոր է զարգացնել մեր մեջ և դրսևորել ամեն ժամանակ (Առակ. 8։13)։
2 Ամեն օր Սատանայի աշխարհի ոգին մեծ ճնշում է գործադրում մեզ վրա՝ մղելով մեզ ընթանալ չար ուղիներով (Եփես. 6։11, 12)։ Մեր անկատար, մեղավոր մարմինը, անկախ մեր կամքից, հակված է սխալվելու (Գաղ. 5։17)։ Ուստի, Եհովայի հրահանգներին ենթարկվելու, երջանիկ լինելու և կյանքը ստանալու համար հարկավոր է Աստծո երկյուղն ունենալ մշտապես (Բ Օրին. 10։12, 13)։
3 Եբրայեցիս 10։24, 25 խոսքերում մեզ խորհուրդ է տրվում մեկտեղ հավաքվել և հորդորել միմյանց «աւելի» այս ժամանակում, որում ապրում ենք։ Հանդիպումներին կանոնավորաբար հաճախելը կարևոր է այս վերջին օրերից վերապրելու համար։ Եհովային տհաճություն պատճառելու երկյուղը մղում է մեզ ներկա լինել հանդիպումներին և բարձր գնահատել դրանց նպատակը։ Աստծո երկյուղն ունեցող անհատները քրիստոնեական հանդիպումներին հաճախելը սուրբ առանձնաշնորհում են համարում։
4 Աստծո հանդեպ ունեցած մեր երկյուղի դրսևորումներից է նաև բարի լուրի քարոզչությանը մասնակցելու հրահանգին ենթարկվելը (Մատթ. 28։19, 20; Գործք 10։42)։ Քարոզչության գործի հիմնական նպատակն է՝ օգնել մարդկանց Եհովայի հանդեպ երկյուղ զարգացնել և կատարել նրա կամքը։ Դրան կարելի է հասնել՝ վերայցելելով մարդկանց, աշխատելով Աստվածաշնչի տնային ուսումնասիրություններ սկսել և սովորեցնելով նրանց Աստծո պատվերները։ Այդպիսով՝ մենք ցույց կտանք Եհովայի հանդեպ մեր երկյուղը և դրացու հանդեպ մեր սերը (Մատթ. 22։37–39)։
5 Նրանք, ովքեր Աստծո հանդեպ երկյուղ չեն դրսևորում, թերանում են հոգևոր բաների հանդեպ գնահատանք զարգացնել և տրվում են աշխարհի մահացու օդին՝ մտածելակերպին (Եփես. 2։2)։ Եկեք հաստատակամ լինենք և «ծառայենք Աստծուն՝ իրեն հաճելի ձեւով՝ ահով եւ դողով» (Եբր. 12։28)։ Այսպիսով՝ Եհովայի հանդեպ երկյուղ դրսևորելով՝ մենք ամեն ժամանակ օրհնություններ կստանանք։