Ծառայության ժամանակ կերտենք միմյանց
1 Բոլորիս դուր է գալիս «հարմար ժամանակին ասված» քաջալերական խոսքը (Առակ. 25։11)։ Ինչպե՞ս կարող ենք ծառայության ժամանակ կերտել միմյանց։
2 Կերտիչ զրույց։ Որքա՜ն կերտիչ է, երբ ծառայության ժամանակ, մեր հավատակիցների հետ զրուցում ենք հոգևոր թեմաների շուրջ (Սաղ. 37։30)։ Օրինակ՝ կարող ենք խոսել մեր պատրաստած մատուցման շուրջ կամ պատմել քաջալերական դեպքեր, որոնք վերջերս տեղի են ունեցել մեր ծառայության ժամանակ (Գործ. 15։3)։ Կարող ենք խոսել որևէ հետաքրքիր մտքի մասին, որն իմացել ենք Աստվածաշնչի մեր անձնական ընթերցանությունից, պարբերագրերի թարմ համարներից կամ ժողովի հանդիպումների ժամանակ։ Կարող ենք նաև քննարկել մտքեր հանրային ելույթից, որը վերջերս լսել ենք Թագավորության սրահում։
3 Ի՞նչ անել, եթե վհատվել ենք այն բանից, որ չենք կարողացել պատասխանել տանտիրոջ առարկությանը։ Օգտակար կլինի, եթե հեռանալուց հետո մի քանի րոպե տրամադրենք, որպեսզի մեր ծառայակցի հետ քննարկենք, թե ինչպես կարելի է հետագայում հաղթահարել նման առարկությունը՝ թերևս դիմելով «Ինչպես վարել Աստվածաշնչի թեմայով զրույցը» գրքույկին։ Նաև, եթե մեզ դուր է եկել, մեր ծառայակցի մատուցումը, ապա անկեղծորեն գովելով՝ մենք կքաջալերենք նրան։
4 Նախաձեռնություն վերցրու։ Գրքի ուսումնասիրության խմբում կա՞ն անհատներ, ում հետ վերջերս չենք ծառայել։ Նրանց ծառայության հրավիրելով՝ կարող ենք «փոխադարձ քաջալերություն ստանալ» (Հռոմ. 1։12)։ Ընդհանուր ռահվիրաներն ու ենթառահվիրաները շատ երախտապարտ են լինում, երբ ուրիշները պատրաստ են ծառայելու իրենց հետ, հատկապես առավոտյան կամ երեկոյան ժամերին, երբ քարոզիչներից գուցե քչերն են գնում ծառայության։ Մենք կարող ենք աջակցել ռահվիրաներին, եթե պատրաստակամորեն համագործակցենք նրանց հետ։ Իսկ ժողովում կա՞ որևէ վատառողջ քարոզիչ, ով չի կարողանում լիարժեքորեն մասնակցել ծառայությանը։ Եթե ջանք թափենք նրա հետ գնալու ծառայության, թերևս Աստվածաշնչի ուսումնասիրության, դա կարող է օգուտներ բերել (Առակ. 27։17)։
5 Անգամ փոքր բաների համար գովելն ու գնահատանքի խոսքեր արտահայտելը միշտ էլ քաջալերում է։ Մենք պետք է հիշենք դա, երբ ուրիշների հետ ծառայության ենք մասնակցում, որովհետև ուզում ենք «շարունակ կերտել միմյանց» (1 Թեսաղ. 5։11)։