Քարոզիր առանց դադարի
1 Երբեմն գուցե մտածենք, թե մեր տարածքը հաճախ ու մանրակրկիտ է մշակվում, և գրեթե արձագանք չի լինում։ Այդուհանդերձ, լուրջ պատճառներ ունենք շարունակելու քարոզել (Մատթ. 28։19, 20)։
2 Վկայություն լինելու համար։ Հիսուսը կանխագուշակեց, որ Թագավորության քարոզչությունը «իրերի համակարգի վախճանի նշանի» կարևոր մասերից է լինելու, և որ այս գործը կատարվելու է «բոլոր ազգերին վկայություն լինելու համար» (Մատթ. 24։3, 14)։ Մարդիկ մեծ վկայություն են ստանում, երբ մեզ տեսնում են Թագավորության մասին քարոզելիս։ Մեր հեռանալուց հետո նրանք գուցե ժամերով և նույնիսկ օրերով խոսեն մեր այցի մասին, անգամ եթե չեն ընդունել բարի լուրը։ Գիտակցելով, թե ինչու ենք ծառայում՝ մենք կկարողանանք հաստատակամություն դրսևորել և շարունակել քարոզել։ Եհովային հաճելի է, որ մենք վկայություն ենք տալիս և նախազգուշական պատգամ հռչակում՝ մասնակցելով աստվածաշնչյան մարգարեության կատարմանը (2 Թեսաղ. 1։6–9)։
3 Անհրաժեշտ է հաստատակամություն։ Այսօր մարդիկ զբաղված են շատ բաներով և ժամանակ քիչ ունեն։ Ուստի հաստատակամություն է անհրաժեշտ նրանց ցուցաբերած հետաքրքրությունը զարգացնելու համար։ Օրինակ՝ Եհովայի վկաները մեկ տարի շարունակ՝ ամեն շաբաթ, այցելում էին մի կնոջ։ Վերջապես նա որոշեց նրանց ներս ընդունել և զրուցել Աստվածաշնչից։ Նրան այնքան դուր եկավ իր լսածը, որ ընդունեց Աստվածաշունչ ուսումնասիրելու առաջարկը, սկսեց հաճախել հանդիպումներին և շուտով մկրտվելու ցանկություն հայտնեց։
4 Աշխարհում տիրող իրավիճակները փոխվում են արագորեն, և նույնը կարելի է ասել մարդկանց մասին։ Շատերը, ովքեր նախկինում մերժել են մեզ, հնարավոր է՝ այժմ սիրով ընդունեն մեր տարած թարմացնող հույսը։ Արժե՛ շարունակել հաստատակամություն դրսևորել, նույնիսկ եթե մեկ հոգի արձագանքի Թագավորության լուրին։
5 Ամբողջ աշխարհում գնալով ավելի շատ մարդիկ են «հառաչում եւ ողբում.... [կատարվող] բոլոր պղծութիւնների համար» (Եզեկ. 9։4)։ Մեր ծառայության արդյունքները հաստատում են, որ ճիշտ տրամադրված անհատները արձագանքում են Թագավորության լուրին (Ես. 2։2, 3)։ Ուստի եկեք շարունակենք առանց դադարի քարոզել՝ սիրով և վճռականությամբ շարունակելով «բարիք ավետել» (Ես. 52։7; Գործ. 5։42)։