Ինչպե՞ս Աստվածաշնչի ուսումնասիրություն անցկացնել «Աստծու սերը» գրքով

1. Ինչի՞ համար է նախատեսված «Աստծու սերը» գիրքը։

¹ Որքա՜ն ուրախալի էր, որ «Առաջնորդվենք Աստծու ոգով» մարզային համաժողովին լսեցինք «Մնա Աստծու սիրո մեջ» նոր գրքի լույս ընծայման մասին։ Ինչպես հայտարարվել է, այն նախատեսված չէ Աստվածաշնչի հիմնական ուսմունքները սովորեցնելու համար։ Այս նոր ձեռնարկը կօգնի մեզ հասկանալու և սիրելու Եհովայի չափանիշները։ Գիրքը տնետուն ծառայության ժամանակ չի առաջարկվելու։

2. Ինչպե՞ս ենք օգտագործելու այս հրատարակությունը։

² «Աստվածաշունչը սովորեցնում է» գրքի ուսումնասիրությունն ավարտելուց հետո որպես ուսումնասիրության երկրորդ ձեռնարկ կօգտագործվի «Աստծու սերը» գիրքը։ Չպետք է մոռանանք, որ մարդիկ տարբեր արագությամբ են հոգևորապես առաջադիմում։ Հետևաբար պետք է ուսումնասիրել նյութը՝ հաշվի առնելով անհատի ընդունակությունները։ Հիշիր, որ ուսումնասիրողը պետք է լավ հասկանա նյութը։ Այս ձեռնարկով ուսումնասիրություն չպետք է անցկացնել, եթե անհատի հետ արդեն մի քանի գիրք է ուսումնասիրվել, սակայն նա չի հաճախում ժողովի հանդիպումներին և չի ապրում իր սովորածի համաձայն։

3. Ի՞նչ պետք է անենք, եթե ներկայումս ուսումնասիրություն ենք անցկացնում «Երկրպագիր Աստծուն» գրքով։

³ Եթե ներկայումս սովորեցնում ես «Երկրպագիր Աստծուն» գրքի միջոցով և հասել ես վերջին մի քանի գլուխներին, ապա կարող ես շարունակել և ավարտին հասցնել գրքի ուսումնասիրությունը ու հորդորել անհատին ինքնուրույն կարդալ «Աստծու սերը» գիրքը։ Բայց եթե վերջերս ես սկսել «Երկրպագիր Աստծուն» գրքով ուսումնասիրել, լավ կլինի, որ դադարեցնես այն և անցնես նոր ձեռնարկի ուսումնասիրությանը։ Ինչպես «Աստվածաշունչը սովորեցնում է» գրքում, այնպես էլ այս ձեռնարկում կա հավելված։ Այդ թեմաների քննարկումը թողնվում է քո հայեցողությանը։

4. Ի՞նչ պետք է անես, եթե ուսումնասիրողը մկրտվի նախքան «Աստվածաշունչը սովորեցնում է» և «Աստծու սերը» գրքերի ուսումնասիրությունն ավարտելը։

⁴ Եթե ուսումնասիրող անհատը մկրտվի նախքան «Աստվածաշունչը սովորեցնում է» և «Աստծու սերը» գրքերի ուսումնասիրությունն ավարտելը, ապա պետք է ուսումնասիրությունը շարունակես այնքան, մինչև ավարտես «Աստծու սերը» գիրքը։ Թեև անհատը մկրտված է, սակայն քարոզչական հաշվետվության մեջ կարող ես նշել ուսումնասիրությունը, վերայցելությունը և ժամը։ Քեզ հետ համագործակցող քարոզիչը նույնպես կարող է գրանցել ժամանակը։

5. Ինչպե՞ս կարող ենք «Աստծու սերը» գրքի միջոցով օգնել ոչ ակտիվ քարոզիչներին։

⁵ Եթե ժողովի ծառայողական կոմիտեն քեզ հանձնարարել է ոչ ակտիվ քարոզչի հետ ուսումնասիրություն անցկացնել, ապա գուցե քեզ խնդրեն, որ հատուկ ուշադրություն դարձնես «Աստծու սերը» գրքից որոշ գլուխների վրա։ Այսպիսի ուսումնասիրությունը չպետք է շատ երկար տևի։ Իսկապես, այս գիրքը հրաշալի ձեռնարկ է, որը կօգնի մեզ մնալ «Աստծու սիրո մեջ» (Հուդա 21)։