Երախտագետ՝ Աստծու մեծագույն պարգևի համար. ինչպե՞ս
1. Հատկապես ինչի՞ համար ենք երախտապարտ Եհովային։
1 Եհովայի բազմաթիվ «բարի պարգևներից» մեծագույնը նրա սիրելի Որդու միջոցով տրված փրկանքն է (Հակ. 1։17)։ Այն առատ օրհնությունների դուռ է բացում մեր առաջ և հնարավորություն է տալիս մեղքերի թողություն ստանալու (Եփես. 1։7)։ Թեև միշտ հիշում ենք այս պարգևի մասին և երախտապարտ ենք դրա համար, սակայն Հիշատակի երեկոյին նախորդող և հաջորդող շրջանում ավելի շատ ենք խորհրդածում փրկանքի մասին։
2. Ինչպե՞ս կարող ես զարգացնել քո և ընտանիքիդ անդամների երախտագիտությունը։
2 Երախտագիտություն զարգացրեք։ Ընտանիքիդ անդամների երախտագիտությունը զարգացնելու համար կարող ես Հիշատակի երեկոյին նախորդող շաբաթների ընթացքում քննարկել փրկանքի մասին թեմաներ ընտանեկան երկրպագության ժամանակ։ Նաև կարող եք միասին կարդալ Հիշատակի երեկոյին նախորդող և հաջորդող օրերի համար նախատեսված աստվածաշնչյան հատվածները։ Կարող ես խորհրդածել, թե ինչ օգուտներ է քեզ տալիս փրկանքը, և ինչպես է այն ազդել քո տեսակետների վրա, որ ունեիր Աստծու, ուրիշների, անձամբ քո և ապագայի վերաբերյալ։ Օգտակար կլինի, որ փորձես մի քանի անգամ երգել 8–րդ և 109–րդ համարի երգերը, քանի որ դրանք երգվելու են Հիշատակի երեկոյի ժամանակ (Սաղ. 77։12)։
3. Ինչպե՞ս կարող ենք դրսևորել մեր երախտագիտությունը։
3 Ինչպես արտահայտել երախտագիտությունը։ Փրկանքի համար ունեցած երախտագիտությունը մղում է մեզ պատմելու մարդկանց Եհովայի ու նրա մեծ սիրո մասին, որը նա ցույց տվեց՝ երկիր ուղարկելով իր Որդուն (Սաղ. 145։2–7)։ Մարտ, ապրիլ և մայիս ամիսների ընթացքում որոշ ընտանիքներ իրենց երախտագիտությունը այսպես են արտահայտում. նրանք ընտանեկան գործերը այնպես են կազմակերպում, որ տնեցիներից առնվազն մեկը կարողանա ծառայել որպես ենթառահվիրա։ Իսկ եթե հնարավոր չէ ենթառահվիրա ծառայել, ապա գուցե «գնես ժամանակը» և ավելի շատ մասնակցես ծառայությանը (Եփես. 5։16)։ Երախտագիտությունը մղում է մեզ նաև օգնելու ուրիշներին մեզ հետ ներկա գտնվել Հիշատակի երեկոյին (Հայտն. 22։17)։ Գրիր այն մարդկանց անունները, որոնց պետք է հրավիրես Երեկոյին, օրինակ՝ Աստվածաշունչ ուսումնասիրողներին, հարազատներիդ, գործընկերներիդ, հարևաններիդ։ Ամեն ջանք թափիր, որ կարողանաս լիովին մասնակցել Հիշատակի երեկոյի հրավիրատոմսերը բաժանելու հատուկ քարոզարշավին։
4. Ինչպե՞ս կարող ենք իմաստությամբ օգտագործել Հիշատակի երեկոյին նախորդող և հաջորդող շրջանը։
4 Հիշատակի երեկոյին նախորդող և հաջորդող շրջանում մեր առաջ նոր հնարավորություններ են բացվում ցույց տալու Եհովային, թե որքան թանկ ենք գնահատում մարդկությանը տված նրա պարգևը։ Թող որ այս ժամանակն օգտագործենք զարգացնելու և դրսևորելու մեր երախտագիտությունը փրկանքի և «Քրիստոսի անհատակ հարստության» հանդեպ (Եփես. 3։8)։