Հունվարի 6-ով սկսվող շաբաթից՝ ուսումնասիրելու ենք «Մոտեցիր Եհովային» գիրքը

1. Հունվարի 6-ով սկսվող շաբաթից՝ Եհովային մոտենալու ի՞նչ հնարավորություն կունենանք։

¹ Եհովան ուզում է, որ մենք մոտենանք իրեն (Հակ. 4։8)։ Այս հարցում մեզ կօգնի «Մոտեցիր Եհովային» գիրքը, որը հունվարի 6-ով սկսվող շաբաթից՝ կուսումնասիրենք Աստվածաշնչի ուսումնասիրության հանդիպմանը։ Գրքի նախաբանում կարդում ենք, թե ինչ նպատակով է այն գրվել. «Խորհրդածելով այն մասին, թե ինչպես է Եհովան դրսևորում իր հատկություններից յուրաքանչյուրը, տեսնելով, թե ինչպես է Հիսուս Քրիստոսը կատարելապես արտացոլել դրանք, և հասկանալով, թե ինչպես մենք կարող ենք զարգացնել այդ հատկությունները՝ կկարողանանք մտերմանալ Աստծու հետ»։ Ճիշտ է, նախկինում այս գիրքը քննարկվել է ժողովներում (2004–2005թթ.), բայց քանի որ դրանից հետո ճշմարտությունն ընդունած մոտ երկու միլիոն մարդկանցից շատերը երբևէ մանրամասնորեն չեն քննարկել Եհովայի չքնաղ հատկությունները, գիրքը նորից ուսումնասիրելու ենք ժողովի հանդիպմանը։ Իսկ նրանք, ովքեր նախկինում ուսումնասիրել են «Մոտեցիր Եհովային» գիրքը, այն կրկին ուսումնասիրելով՝ կխորացնեն իրենց երախտագիտությունը Եհովայի հատկությունների համար (Սաղ. 119։14)։

2. Ինչպե՞ս է անցկացվելու «Մոտեցիր Եհովային» գրքի ուսումնասիրությունը։

² Ինչպե՞ս է անցկացվելու։ Անցկացնողը ուսումնասիրությունը կսկսի կարճ ներածական խոսքերով՝ մեկ-երկու նախադասությամբ։ Գրքում նշված չէ, թե որ սուրբգրային համարներն է հարկավոր կարդալ, ուստի անցկացնող եղբայրն ինքը կասի, թե որ համարները ընթերցել։ Յուրաքանչյուր ուսումնասիրության վերջում նա կարող է մեկ-երկու հարց տալ լսարանին՝ թեման ամփոփելու համար։ Եթե ուսումնասիրվելիք նյութի մեջ կա «Հարցեր՝ խորհրդածելու համար» շրջանակ, ապա թեման ամփոփելու համար հարկավոր է օգտվել այս շրջանակից։ Եթե ժամանակը թույլ է տալիս, անցկացնողը կարող է ունկնդիրներից ոմանց խնդրել, որ կարդան շրջանակում գրված որոշ սուրբգրային համարներ, ինչից հետո նա լսարանին տալիս է լրացուցիչ հարցեր։

3. Երբ սկսենք ուսումնասիրել «Մոտեցիր Եհովային» գիրքը, լավ կլինի ի՞նչ անենք և ինչո՞ւ։

³ Լիարժեք օգուտներ քաղիր։ Նախապատրաստվիր ուսումնասիրությանը, նույնիսկ եթե նախկինում ուսումնասիրել ես այս գիրքը։ Մեկնաբանություններ տուր, քանի որ դա փառք է բերում Եհովային, օգնում է քեզ հիշելու նյութը և օգուտներ է բերում ներկաներին (Սաղ. 35։18; Եբր. 10։24, 25)։ Եհովայի անզուգական հատկությունների մասին խորհրդածելով՝ ավելի կմոտենաս նրան (Սաղ. 77։11–13)։ Արդյունքում ավելի վճռական կլինես հնազանդվելու նրա պատվիրաններին և ավելի կմղվես ուրիշներին պատմելու նրա մասին (Սաղ. 150։1–6)։