2023: Տագնապալից տարի։ Ի՞նչ է ասում Աստվածաշունչը

2023 թվականի ընթացքում աշխարհով մեկ տեղի ունեցած դեպքերը անառարկելիորեն փաստեցին, որ ապրում ենք Աստվածաշնչում կանխագուշակված «վերջին օրերում» (2 Տիմոթեոս 3։1)։ Ուշադրություն դարձրեք, թե աշխարհում տիրող ներկա իրավիճակը ինչպես է համապատասխանում այն իրողություններին, որոնք Աստվածաշունչը կանխագուշակել է մեր օրերի առնչությամբ։

Աստվածաշունչը և աշխարհում տիրող իրավիճակը

«Պատերազմների ձայներ և պատերազմների լուրեր կլսեք» (Մատթեոս 24։6)։

• «Աշխարհի տարբեր մասերում գնալով շատանում են բռնի հակամարտությունները»։a

«Տեղ-տեղ երկրաշարժեր.... կլինեն» (Մարկոս 13։8)։

• «2023 թ.-ից ի վեր աշխարհում 7 մագնիտուդից բարձր 13 երկրաշարժեր են եղել։ Սա պատմության մեջ գրանցված ամենաբարձր ցուցանիշներից է»։b

«Ահազդու երևույթներ» (Ղուկաս 21։11)։

• «Գլոբալ տաքացման դարաշրջանն ավարտվել է։ Սկսվել է գլոբալ եռման դարաշրջանը» (Անտոնիո Գուտերեշ, ՄԱԿ-ի գլխավոր քարտուղար)։c

«Սովեր» (Մատթեոս 24։7)։

• «2023 թվական. հերթական ծայրահեղ տագնապալից տարի՝ օրվա հացը դժվարությամբ հայթայթող ընտանիքների համար»։d

«Չափազանց դժվար ժամանակներ են լինելու» (2 Տիմոթեոս 3։1)։

• «Աշխարհի բնակչության ամեն 8 մարդուց 1-ը հոգեկան առողջության հետ կապված խնդիրներ ունի»։e

Ի՞նչ ակնկալել 2024 թվականից

Ոչ ոք հաստատ չի կարող ասել, թե 2024 թվականը ինչեր կբերի։ Սակայն աշխարհում տեղի ունեցող դեպքերը հուշում են, որ շուտով Աստծու Թագավորությունը՝ երկնային կառավարությունը, կփոխարինի բոլոր մարդկային կառավարություններին և վերջ կդնի տառապանքների ու տագնապների բոլոր պատճառներին (Դանիել 2։44; Հայտնություն 21։4)։

Իսկ մինչ այդ, երբ տագնապի զգացում ենք ունենում, կարող ենք դիմել Աստծու օգնությանը։ Աստվածաշնչում ասվում է.

«Որ օրն էլ որ վախենամ, քեզ պիտի ապավինեմ» (Սաղմոս 56։3)։

Ինչպե՞ս կարող ենք ցույց տալ, որ վստահում ենք Աստծուն։ Առաջարկում ենք ավելին իմանալ տառապանքներից զերծ ապագայի մասին, որ խոստանում է Աստվածաշունչը։ Փորձեք Աստվածաշնչի անվճար, ինտերակտիվ դասընթացը՝ պարզելու համար, թե դուք և ձեր ընտանիքը ինչ օգուտներ կարող եք ստանալ աստվածաշնչյան խոստումներից։