Ճշմարտախոսություն. միայն ուրիշների՞ց ենք ակնկալում
«ԵՍ ԱՏՈՒՄ եմ սուտը, և չեմ սիրում, երբ ինձ են սուտ ասում»,— ասաց 16–ամյա մի աղջիկ։ Մեզանից շատերը միևնույն տեսակետն ունեն։ Մենք ակնկալում ենք, որ մեզ փոխանցվող ինֆորմացիան՝ լինի այն բանավոր թե գրավոր, ճշմարիտ լինի։ Իսկ ինքներս ճի՞շտ ենք խոսում արդյոք, երբ որևէ ինֆորմացիա ենք փոխանցում ուրիշներին։
Գերմանիայում անցկացված մի հարցման տվյալներով՝ մասնակիցների ճնշող մեծամասնությունը այն կարծիքին էր, որ «իրենց կամ ուրիշներին վնասներից պաշտպանելու նպատակով փոքր հարցերում ստելը թույլատրելի է և նույնիսկ անհրաժեշտ, որպեսզի մարդիկ իրար հետ լավ փոխհարաբերություններ պահպանեն»։ Իսկ մի լրագրող գրում է. «Ամեն ժամանակ ճիշտ խոսելը և միայն ու միայն ճիշտն ասելը վեհ գաղափար է, բայց դա ձանձրացնող է»։
Արդյոք հնարավո՞ր է՝ մենք ցանկանանք, որ ուրիշները ճիշտը խոսեն, սակայն ինքներս մտածենք, թե երբեմն հիմնավոր պատճառ ունենք ճիշտը չասելու։ Կարևո՞ր է արդյոք՝ մենք ճիշտ ենք խոսում, թե՝ ոչ։ Ինչպիսի՞ հետևանքներ է ունենում սուտ խոսելը։
Սուտ խոսելու վնասները
Այժմ քննենք, թե ինչ վնասներ կարող է պատճառել սուտ խոսելը։ Ստախոսությունը անվստահության զգացում է առաջ բերում ամուսինների, ինչպես նաև ընտանիքի անդամների միջև։ Բամբասանքը կարող է արատավորել անհատի բարի անունը։ Աշխատողների խաբեբայության պատճառով մեծանում են կազմակերպությունների ծախսերը, ինչի հետևանքով բարձրանում են նաև ապրանքների գները։ Հարկագրերում լրացվող կեղծ տվյալների պատճառով կառավարությունները զրկվում են այն եկամուտներից, որոնք անհրաժեշտ են հասարակական ծառայությունների համար։ Հետազոտողները իրենց ներկայացրած կեղծ ինֆորմացիայի պատճառով կործանում են իրենց կարիերան և բիծ բերում հարգանք վայելող կազմակերպությունների վրա։ Խաբեբա մարդիկ, արագորեն հարստանալու ծրագրեր առաջարկելով, շորթում են իրենց վստահող ներդրողների խնայած միջոցները կամ ավելի վատ իրավիճակների մեջ են գցում նրանց։ Ուստի զարմանալի չէ, թե ինչու է Աստվածաշունչն ասում, որ Եհովա Աստծուն զզվելի բաների շարքին են դասվում նաև «ստախօս լեզու[ն]» և «սուտեր փչող անիրաւ վկա[ն]» (Առակաց 6:16–19)։
Այո, համատարած ստախոսությունը կարող է վնաս պատճառել թե՛ առանձին անհատներին և թե՛ ամբողջ հասարակությանը։ Դժվար թե որևէ մեկը առարկի։ Այդ դեպքում ինչո՞ւ են մարդիկ միտումնավոր կերպով սուտ խոսում։ Եվ արդյո՞ք ամեն մի անստույգ տեղեկություն իսկապես սուտ է։ Այս և ուրիշ հարցերի պատասխանները կքննարկենք հաջորդ հոդվածում։
[նկար 3–րդ էջի վրա]
Ստախոսությունը անվստահության զգացում է առաջ բերում ամուսինների միջև