Ճշգրիտ հաշվետվություն ներկայացնենք մեր ծառայության մասին

¹ Շուտով լույս կտեսնի նոր «Տարեգիրքը»՝ 2000 ծառայողական տարվա համաշխարհային հաշվետվությամբ։ Անհամբերությամբ սպասում ենք, թե երբ կկարողանանք տեսնել աշխարհի տարբեր մասերում քարոզչական գործունեության արդյունքները (Ես. 60։22)։ Քանի որ համաշխարհային հաշվետվության մեջ ընդգրկված է բոլոր քարոզիչների գործունեությունը, ի՞նչ կարող է անել մեզանից յուրաքանչյուրը, որպեսզի հաշվետվությունը լինի ճշգրիտ։

² Մատթէոս 24։14–ից հասկանում ենք, որ ներկա համակարգի վերջին օրերի ընթացքում մենք պետք է քարոզենք։ Յուրաքանչյուր ամսվա վերջում բարեխղճորեն հանձնելով քարոզչության մասին հաշվետվությունը՝ կարող ենք մեր գնահատանքը ցույց տալ Եհովայի կազմակերպության ձեռնարկած միջոցառումների համար, ինչպես նաև ցույց տալ, որ գիտակցում ենք համաշխարհային գործի մեջ ունեցած մեր համեստ դերը։ Կանոնավորաբա՞ր եք հանձնում ձեր ծառայության մասին ճիշտ հաշվետվությունը։

³ Ինչպես ճիշտ հաշվետվություն կազմել. Հաշվետվության մեջ հարկավոր է միայն ժամերի ամբողջական թիվը գրել։ Մնացած րոպեները քարոզիչները կարող են գումարել հաջորդ ամսվա հաշվետվությանը։ Որպեսզի այն ճշգրիտ լինի, լավ է ամեն անգամ քարոզչությանը մասնակցելուց հետո գրի առնել, թե քանի ժամ ենք անցկացրել ծառայության մեջ, որքան գրականություն ենք տարածել և քանի վերայցելություն կատարել։ Այդպիսով՝ ամսվա վերջում ստիպված չենք լինի մոտավորապես հիշել, այլ հարկավոր կլինի ընդամենը իրար գումարել գրի առնված թվերը։ Ժողովում առկա «Ծառայողական հաշվետվության թերթիկները» օգնում են գրառումները կանոնավորաբար կատարելուն։

⁴ Չմոռանանք, որ վերայցելությունների մեջ են մտնում նաև ամեն անգամ անցկացված Աստվածաշնչի ուսումնասիրությունները։ Ամսվա վերջում յուրաքանչյուր ուսումնասիրության համար պետք է «Ուսուցման հաշվետվություն» թերթիկը լրացնել և հանձնել «Քարոզչական ծառայության հաշվետվության» թերթիկի հետ միասին։ Աստվածաշնչի բոլոր ուսումնասիրությունների համար մեկական «Ուսուցման հաշվետվություն» թերթիկ լրացնելուց հետո «Քարոզչական ծառայության հաշվետվություն» թերթիկում Աստվածաշնչի տնային ուսումնասիրություններին հատկացված վանդակում պետք է նշել այդ ամսվա ընթացքում անցկացված ուսումնասիրությունների քանակը։

⁵ Հարկ է նշել նաև, որ ծառայությունը սկսվում է քարոզել սկսելու առաջին րոպեներից և ավարտվում վերջին զրույցի ավարտով։ Ուստի, ծառայության ընթացքում հանգստանալու նաև ուտելու համար արված դադարները չեն ընդգրկվում ծառայության հաշվետվության մեջ։ Հանրային ելույթով հանդես եկողները գրի են առնում նաև այդ ժամանակը (տեսեք «Մեր ծառայությունը» գիրքը, էջ 104, ռուս.)։ Եթե մեր ծառայության մասին հաշվետվությունը ներկայացնենք բարեխղճորեն, դրանով մեր բաժինը կունենանք «Տարեգրքում» հրատարակվող ճշգրիտ հաշվետվության մեջ։

⁶ Քանի որ քարտուղարը ժողովի ծառայության հաշվետվությունը Ընկերությանն է ուղարկում մինչև հաջորդ ամսվա վեցը, հասկանալի է, թե ինչու է կարևոր, որ յուրաքանչյուր քարոզիչ իր ծառայության հաշվետվությունը անմիջապես հանձնի ամսվա վերջում։ Եղբայրների կատարած աշխատանքի հանդեպ գնահատանքը պետք է մղի քարոզիչներին յուրաքանչյուր ամսվա վերջում ժամանակին հանձնել հաշվետվությունները։ Քարտուղարը միայն վեց օր ունի բոլոր հաշվետվությունները հավաքելու, դրանք իրար գումարելու և ժամանակին Ընկերություն ուղարկելու համար, որպեսզի այդ հաշվետվությունը մեր տերիտորիայում գտնվող 1 400 այլ ժողովների հաշվետվության հետ միասին ընդգրկվի ծառայողական հաշվետվության մեջ։

⁷ Քարոզիչներից յուրաքանչյուրը, ով պատրաստակամորեն համագործակցում է վերոհիշյալ կազմակերպչական գործողություններին, ուրախ կարող է լինել՝ իմանալով, որ ինքն էլ իր մասնակցությունն է բերում Եհովայի վկաների համաշխարհային գործունեության վերաբերյալ ճշգրիտ հաշվետվություն կազմելու մեջ (համեմատեք Եզեկիէլ 9։11)։ Եկե՛ք, ուրեմն, մեր ծառայության մասին ժամանակին և ճշգրիտ հաշվետվություն ներկայացնենք։