Մասնակցո՞ւմ ես ճշգրիտ հաշվետվություններ կազմելու գործին
1 Աստվածաշնչում հաճախ հանդիպում ենք որոշակի թվերի, որոնք օգնում են մեզ պատկերացում կազմել տեղի ունեցածի մասին։ Օրինակ՝ Գեդեոնը 300 հոգիանոց բանակով նվաճեց մադիամացիների մեծաքանակ զորքին (Դատ. 7։7)։ Եհովայի հրեշտակը սպանեց 185 000 ասորի զինվորների (Դ Թագ. 19։35)։ Մ.թ. 33–ի Պենտեկոստեին մոտ 3 000 հոգի մկրտվեցին, և դրանից շատ չանցած՝ հավատացյալների թիվը հասավ 5 000–ի (Գործք 2։41; 4։4)։ Այս թվերը ցույց են տալիս, որ Աստծո վաղեմի ծառաները մեծ ջանքեր են գործադրել, որպեսզի թվերի ամբողջական և ճշգրիտ արձանագրություն կազմեն։
2 Եհովայի կազմակերպությունն այսօր մեզ էլ է հորդորում ամեն ամիս քարոզչական գործունեության մասին հաշվետվություն հանձնել։ Այս հարցում եղբայրների հետ սերտորեն համագործակցելով՝ մենք մեր բաժինն ենք բերում քարոզչական աշխատանքի հսկողությունն իրականացնելու մեջ։ Հաշվետվություններն օգնում են իմանալ, թե ծառայության որ մարզին է հարկավոր ավելի շատ ուշադրություն դարձնել, կամ թե որ տարածքում ավելի մեծ թվով քարոզիչների կարիք կա։ Ժողովի ներսում հաշվետվություններն օգնում են երեցներին տեսնել, թե ովքեր հնարավորություն ունեն ընդլայնել իրենց ծառայությունը, ինչպես նաև որոշել, թե ովքեր օգնության կարիք ունեն։ Եվ վերջապես, հաշվետվության արդյունքները ոգևորում են համաշխարհային քրիստոնեական եղբայրությանը։ Իսկ դու քո բաժինը բերո՞ւմ ես ճշգրիտ հաշվետվություններ կազմելու գործում։
3 Անձնական պատասխանատվություն ունենալ։ Երբ գալիս է ամսվա վերջը՝ հաշվետվությունները հանձնելու ժամանակը, դժվարանո՞ւմ ես հիշել, թե ամսվա ընթացքում որքան ես ծառայել։ Եթե այո, ապա կարող ես ամեն անգամ քարոզչական ծառայությունից հետո նշումներ անել։ Ոմանք օրացույց կամ օրագիր են օգտագործում։ Մյուսները միշտ իրենց հետ վերցնում են քարոզչական ծառայության հաշվետվությունների բլանկը։ Ամսվա վերջին հաշվետվությունդ ժամանակին հանձնիր ձեր՝ Գրքի ուսումնասիրության վերակացուին։ Կամ եթե ցանկանում ես, կարող ես հաշվետվությունների բլանկը գցել Թագավորության սրահում դրա համար հատկացված արկղը։ Եթե մոռացել ես հանձնել հաշվետվությունդ, անհապաղ դիմիր Գրքի ուսումնասիրության վերակացուին՝ առանց սպասելու, որ նա քեզ մոտենա։ Ծառայության հաշվետվությունները բարեխղճորեն հանձնելով՝ դու ցույց ես տալիս, որ հարգում ես Եհովայի կողմից սահմանված այս կարգը, և ուշադիր ես այն եղբայրների նկատմամբ, ովքեր նշանակված են այդ հաշվետվությունները հավաքելու և ընդհանուր հաշիվ կազմելու համար (Ղուկ. 16։10)։
4 Ի՞նչ դեր է խաղում Գրքի ուսումնասիրության վերակացուն։ Որպես ուշադիր և հոգատար հովիվ՝ Գրքի ուսումնասիրության վերակացուն ամբողջ ամսվա ընթացքում հետաքրքրվում է իր խմբի յուրաքանչյուր անդամի քարոզչական ծառայությամբ (Առակ. 27։23)։ Այսպիսով՝ նա տեսնում է, թե յուրաքանչյուր քարոզիչ մասնակցում է արդյոք ծառայությանը կանոնավորաբար, նպատակաուղղված և ուրախ սրտով, և եթե որևէ մեկը ընդհանրապես չի ծառայել տվյալ ամսում, անհապաղ օգնություն է ցույց տալիս։ Հաճախ քարոզիչները կարիք ունեն խրախուսանքի խոսքեր լսելու, գործնական խորհուրդներ ստանալու կամ վերակացուի հետ ծառայության մասնակցելու։
5 Ամսվա վերջին վերակացուն հետևում է, որ խմբի բոլոր անդամները հանձնեն հաշվետվությունները, որպեսզի ժողովի քարտուղարը կարողանա ժողովի ճշգրիտ հաշվետվությունը մինչև հաջորդ ամսվա 6–ը ուղարկել մասնաճյուղ։ Ամսվա վերջին վերակացուն կարող է հիշեցնել իր խմբի անդամներին հաշվետվությունները հանձնելու մասին։ Նաև լավ կլիներ, եթե Գրքի ուսումնասիրությունն անցկացնելու վայրում հաշվետվության բլանկներ լինեին։ Եթե որևէ մեկը հաճախ մոռանում է հանձնել իր հաշվետվությունները, վերակացուն կարող է հիշեցնել և խորհուրդ տալ այդ հարցի կապակցությամբ։
6 Ծառայության հաշվետվությունները ժամանակին հանձնելով՝ մենք մեր աջակցությունն ենք ցույց տալիս ընդհանուր հաշվետվության մեջ իրականությանը համապատասխան տվյալներ գրանցելուն։ Կարո՞ղ ես դու էլ քո բաժինը բերել՝ ամեն ամիս քարոզչական ծառայության քո հաշվետվությունները ժամանակին հանձնելով։