Գտնենք հետաքրքրվող անհատների՝ փողոցում արդյունավետ վկայություն տալով

¹ Հիսուսն իր աշակերտներին պատվիրեց փնտրել այն մարդկանց, ովքեր արժանի են Թագավորության բարի լուրը լսելուն (Մատթ. 10։11)։ Սակայն շատ վայրերում այսօր ավելի դժվար է մարդկանց հանդիպել իրենց տներում։ Ուստի ի՞նչ կարող ենք անել արժանիներին գտնելու համար։

² Փողոցում վկայություն տալը արդյունավետ միջոց է քարոզելու նրանց, ովքեր տանը չեն եղել, երբ իրենց այցելել ենք։ Մենք կարող ենք վկայություն տալ ավտոբուսի կանգառներում, հսկողության տակ գտնվող բնակելի շենքերի մոտ, զբոսայգիներում և այլ վայրերում, որտեղ մարդիկ կան։

³ Ոմանց մեջ վախի ու կաշկանդվածության զգացում է առաջանում, երբ լսում են «փողոցի վկայություն» արտահայտությունը։ Գուցե նրանք վարանում են մասնակցել ծառայության այդ ձևին, քանի որ ամաչկոտ են կամ մտածում են, որ Թագավորության պատգամից հրաժարվող մարդիկ կարող են կոպտել իրենց։ Սովորաբար անհանգստանալու հիմքեր չկան։ Ծառայության այս ոլորտում փորձառու քարոզիչներն ասում են, որ փողոցում վկայություն տալն ավելի դժվար չէ, քան տնետուն ծառայությունը։ Նրանք նկատել են, որ մեծամասամբ մարդիկ սովոր են այն բանին, որ փողոցում տարբեր պատճառներով իրենց են մոտենում, և ոմանք թերևս ավելի տրամադրված են զրուցելու փողոցում, քան թե տանը։ Հետևաբար եթե ‘համարձակ’ լինենք, ապա ականատես կլինենք հաճելի դեպքերի (Ա Թեսաղ. 2։2)։

⁴ Ինչպե՞ս կարելի է փողոցում վկայություն տալ արդյունավետ ձևով։ Կարևոր է լավ նախապատրաստվել։ Նախապես կարդա պարբերագրերը և ընտրիր մեկ–​երկու հետաքրքիր միտք, որոնք, ըստ քեզ, կգրավեն մարդկանց ուշադրությունը։ Մատուցման տևողությունը կարող է լինել մոտ 30 վայրկյան։ Քանի որ փողոցում վկայություն տալու նպատակը մարդկանց հետ զրուցելն է, ընտրիր այնպիսի վայր, որտեղ սովորաբար մեծ թվով մարդկանց կարելի է հանդիպել։ Թեև լավ կլինի, որ քեզ հետ մեկ ուրիշ քարոզիչ էլ լինի, սակայն այս դեպքում սովորաբար ավելի լավ է առանձին քարոզել։ Կողք–կողքի գտնվող քարոզիչները գուցե հակված լինեն ժամանակն անցկացնել միմյանց հետ զրուցելով և չնկատեն այն մարդկանց, ովքեր գուցե տրամադրված են լսելու Թագավորության պատգամը։

⁵ Եթե կանգնես մի տեղում և պարզապես ցուցադրես պարբերագրերը, ապա դա այնքան էլ արդյունավետ չի լինի։ Շատ ավելի լավ է նախաձեռնություն վերցնել և մոտենալ մարդկանց։ Ձգտիր տեսողական կապ հաստատել։ Զրույց սկսելիս աշխատիր լինել ջերմ, բարեհամբույր և անմիջական։ Երբեմն գուցե կարիք լինի անհատի հետ զրուցելիս որոշ ճանապարհ անցնել։ Եթե նա դրական է արձագանքում, պարբերագրեր առաջարկիր։ Եթե մերժում է դրանք վերցնել, ապա փորձիր թերթիկ տալ։

⁶ Սովորաբար ավելի լավ է կարճ մատուցում նախապատրաստել, որն ընդգրկում է զրուցակցին հետաքրքրող ինչ–որ հարց կամ որևէ տեղեկություն։ Եթե նա հետաքրքրություն է դրսևորում, ապա աշխատիր իմանալ նրա անունը, հասցեն ու թերևս հեռախոսի համարը, որպեսզի կարողանաս զարգացնել նրա հետաքրքրությունը։ Օրինակ՝ կարող ես ասել. «Եթե կցանկանաք ավելին իմանալ, ես ուրախությամբ կայցելեմ ձեզ կամ կպայմանավորվեմ, որ մեկ ուրիշ Վկա ձեզ այցելի»։

⁷ Մի երեց փողոցի ծառայության ժամանակ մոտեցավ մի կնոջ և զրույցի ընթացքում իմացավ, որ տանը նա երբեք առիթ չի ունեցել Վկաների հետ զրուցելու։ Այդ կինը մի գիրք վերցրեց և համաձայնվեց, որ քույրերից մեկը հարմար ժամի այցելի իրեն։ Եթե փողոցում արդյունավետորեն վկայություն տանք, ապա կարող ենք գտնել և աջակցություն ցույց տալ ավելի ու ավելի մեծ թվով արժանի անհատների (Գործք 17։17)։