Ինչպե՞ս կարող են ընտանիքի անդամները միմյանց հետ համագործակցել ծառայության մեջ
1 Ի՞նչը կարող է ավելի ուրախալի լինել, քան տեսնել, թե ինչպես են ամուսիններն ու կանայք, ծնողներն ու երեխաները միասին մասնակցում քրիստոնեական ծառայությանը՝ հրապարակավ Եհովայի անունը փառաբանելով (Սաղ. 148։12, 13)։ Ընտանիքները պետք է իրենց համար օգտակար ծրագիր մշակեն, որպեսզի կանոնավորաբար մասնակցեն դաշտի ծառայությանը։ Իսկ ձեր ընտանիքն ունի՞ նշանակված օր շաբաթական ծառայության համար։ Եթե այո, ապա ընտանիքի յուրաքանչյուր անդամ գիտի իր գրաֆիկը և կարող է լրիվ մասնակցություն բերել ծառայության մեջ (Առակ. 21։5 ա)։
2 Մինչև ընտանիքով ծառայելու օրվա մոտենալը, ինչո՞ւ միասին չպատրաստել այն ներածական խոսքերը, որոնք ընտանիքի անդամները կարող են գործածել քարոզելիս։ Այդպիսի նախապատրաստությունը կարող է շատ օգտակար լինել և նպաստել ընտանիքում իսկական համագործակցության ոգի առաջ գալուն։ Ինչպիսի՜ պարգև է, երբ ընտանիքի բոլոր անդամները լավ նախապատրաստված մասնակցում են դաշտի ծառայությանը։
3 Մի շրջագայող վերակացու համագործակցում էր մի ընտանիքի հետ ամսագրեր տարածելու գործում։ Դուստրերից մեկի հետ տնից տուն ծառայության գնալիս՝ աղջիկը հարցնում է. «Որքա՞ն ենք միասին ծառայելու»։ Ապա բացատրում է, որ դրանից հետո պատրաստվում է քարոզել իր հոր հետ։ Հստակ էր, որ և՛ աղջիկը, և՛ հայրը սիրում էին միասին ծառայել։ Համագործակցության ի՜նչ հիանալի ոգի է տիրում այս ընտանիքում։
4 Գուցե որոշ ընտանիքների հաջողվի տարվա մեջ մեկ ամիս միասին ենթառահվիրայություն վերցնել։ Կամ գուցե հնարավոր լինի, որ ընտանիքի միայն մեկ անդամը ծառայի որպես ենթառահվիրա կամ նույնիսկ ընդհանուր ռահվիրայություն վերցնի։ Լավ կազմակերպվածության և համագործակցության շնորհիվ՝ գուցե ընտանիքի յուրաքանչյուր անդամ ավելի շատ մասնակցություն բերի ծառայության մեջ՝ աջակցելով նրան, ով ծառայում է որպես ռահվիրա։ Անկասկած, ընտանիքի բոլոր անդամները կօրհնվեն այդ գործունեությունից, և նրանց ուրախություն կպատճառեն ծառայության ժամանակ պատահած հետաքրքիր դեպքերը (Մաղ. 3։10)։
5 Քարոզչական գործում լրիվ մասնակցություն բերելով՝ ընտանիքի անդամները կմտերմանան, եռանդուն կլինեն, հաջողություն կունենան Եհովային ծառայելու գործում և երջանիկ կլինեն (համեմատիր Փիլիպպեցիս 2։1, 2)։