Հռչակենք Եհովայի գերազանց հատկությունները

1. Ի՞նչն է մեզ մղում հռչակելու Եհովայի գերազանց հատկությունները։

¹ «Քոնն է, ով Տէր, մեծութիւնը եւ զօրութիւնը եւ փառքը եւ յաղթութիւնը [«գերազանց հատկությունը», ՆԱ] եւ պայծառութիւնը, եւ բոլոր երկնքումն ու երկրումը եղողները» (Ա Մնաց. 29:11)։ Ի՞նչ ազդեցություն են գործում մեզ վրա Եհովայի հանդեպ ունեցած մեր սերը և երախտագիտությունը։ Դրանք մղում են մեզ, որ «ամենուրեք հռչակենք գերազանց հատկությունները նրա, ով խավարից մեզ կանչեց իր սքանչելի լույսի մեջ» (Ա Պետ. 2:9, ՆԱ)։ Մենք պարզապես չենք կարող չպատմել մարդկանց մեր չքնաղ Աստծու մասին։ Մարտ, ապրիլ և մայիս ամիսներին մենք հոյակապ հնարավորություն կունենանք Եհովայի գերազանց հատկությունները մարդկանց հռչակելու։

2. Ի՞նչ հատուկ քարոզարշավ է անցկացվելու մարդկանց ուշադրությունը Հիշատակի երեկոյի արարողությանը հրավիրելու համար։

² Հատուկ քարոզարշավ՝ մարդկանց ուշադրությունը Հիշատակի երեկոյի արարողությանը հրավիրելու համար։ Ապրիլի 2–ին՝ երկուշաբթի օրը, մենք կվեհացնենք Եհովայի գերազանց հատկությունները՝ նշելով Տիրոջ ընթրիքը։ Մարտի 17–ից մինչև ապրիլի 2–ը հատուկ հրավիրատոմսեր են տարածվելու ամբողջ աշխարհում այս հատուկ իրադարձության հետ կապված։ Մեզ բոլորիս հորդոր է տրվում լիարժեքորեն մասնակցելու այդ քարոզարշավին։ Դա հրաշալի ժամանակ կարող է լինել ուսումնասիրողների համար սկսելու քարոզել բարի լուրը, եթե համապատասխանում են քարոզիչ լինելու պահանջներին։ Եթե ունես երեխաներ, կամ եթե կան անհատներ, որոնց հետ ուսումնասիրում ես Աստվածաշունչը, և նրանք համապատասխան որակումներ ունեն, ապա միջոցներ ձեռնարկիր երեցների հետ զրուցելու համար։

3. Ի՞նչ կարող ենք ասել մարդկանց Հիշատակի երեկոյին հրավիրելու համար։

³ Այս քարոզարշավը նման է այն քարոզարշավին, որ անցկացվեց «Ազատագրումը մո՛տ է» մարզային համաժողովի հետ կապված։ Ժողովները բավական քանակությամբ հրավիրատոմսեր կստանան, այնպես որ յուրաքանչյուր քարոզիչ կարող է վերցնել հրավիրատոմսի 5 օրինակ։ Կարճ մատուցում գործածիր։ Կարող ես, օրինակ, ասել. «Սա ձեր հրավիրատոմսն է։ Սրտանց հրավիրում ենք ձեզ տարեկան մի կարևոր արարողության, որը տեղի կունենա շուտով։ Մանրամասնությունների մասին գրված է հրավիրատոմսի վրա»։ Անշուշտ, եթե անհատը հարցեր ունի, ապա ժամանակ տրամադրիր այդ հարցերին պատասխանելու համար։ Այդ հարցում մեծ օգնություն կարող է լինել «Աստվածաշունչը սովորեցնում է» գրքի հավելվածի 206–րդ էջում տեղ գտած հոդվածը, որի վերնագիրն է՝ «Տիրոջ ընթրիք»։ Շաբաթ և կիրակի օրերին հատուկ հրավիրատոմսի հետ միասին առաջարկելու ենք ընթացիկ պարբերագրերը։ Ուշադիր եղիր, եթե որևէ մեկը հետաքրքրություն ցույց տա, և պայմանավորվիր վերայցելել։

4. Ինչպե՞ս պետք է տարածենք Հիշատակի երեկոյի հրավիրատոմսերը։

⁴ Հնարավորության դեպքում այս հատուկ հրավիրատոմսը պետք է տալ անձամբ յուրաքանչյուր անհատին։ Ուստի գրի առ, թե որ բնակարաններում ոչ ոք տանը չի եղել, և այցելիր մեկ ուրիշ անգամ։ Այն ժողովներում, որտեղ մնացել են մեծ քանակությամբ հրավիրատոմսեր, քարոզիչները Հիշատակի երեկոյին նախորդող շաբաթվա ընթացքում, բայց ոչ այդ շաբաթվանից շուտ, դրանք կարող են թողնել այն բնակարաններում, որտեղ ոչ ոք տանը չի եղել։ Հավաստիացիր, որ հրավիրատոմսը տվել ես նրանց, ում վերայցելում ես, ում հետ ուսումնասիրում ես Աստվածաշունչը, նաև հարազատներիդ, աշխատակիցներիդ, հարևաններիդ և քեզ ծանոթ այլ մարդկանց։

5. Ինչո՞ւ պետք է հիմա արդեն սկսենք պլաններ կազմել ենթառահվիրայական ծառայություն սկսելու համար։

⁵ Ենթառահվիրայություն։ Կարո՞ղ ես ավելի մեծ մասնակցություն ունենալ Եհովայի գերազանց հատկությունները հռչակելու գործում՝ մարտ, ապրիլ և մայիս ամիսներին որպես ենթառահվիրա ծառայելով։ Դա անելու համար հավանաբար անհրաժեշտ կլինի քո ամենօրյա գրաֆիկում որոշակի փոփոխություններ կատարելու (Եփես. 5:15–17)։ Կարող ես վստահ լինել, որ Եհովային ավելի շատ ծառայելու համար ջանքեր գործադրելով՝ ուրախություն կստանաս, ինչպես նաև օրհնություններ Եհովայից (Առակ. 10:22)։ Քանի որ մոտենում է Հիշատակի երեկոյին նախորդող և հաջորդող շրջանը, արդեն հիմա կարող ես պլաններ կազմել (Առակ. 21:5)։

6. Ի՞նչ կարող ենք սովորել 90–ամյա քրոջ օրինակից, որն անցած տարի ծառայեց որպես ենթառահվիրա։

⁶ 90–ամյա մի քույր անցած տարի հնարավորություն ունեցավ որպես ենթառահվիրա ծառայելու։ Նա պատմում է. «Թեև ես շատ եմ սիրում այգի մշակել և ցանկանում էի սկսել որոշ բույսեր տնկել, սակայն հասկացա, որ ճիշտ առաջնահերթություններ պետք է ունենամ։ Քանի որ ուզում էի Թագավորության շահերը առաջին տեղում դնել, որոշեցի մարտին ծառայել որպես ենթառահվիրա»։ Արդյոք օրհնություններ ստացա՞վ նա իր թափած ջանքեր համար։ Քույրը պատմում է. «Ես ինձ ավելի մոտ էին զգում ժողովին, իսկ դա ինձ ավելի մոտեցրեց Եհովային»։ Չարժե՞ արդյոք, որ մենք էլ քննենք, թե որ գործերին ենք առաջնահերթություն տալիս և նույնպես հարկ եղած փոփոխություններն անենք։

7. Դժվա՞ր է արդյոք ծառայել որպես ենթառահվիրա։

⁷ Գուցե մտածես, որ դժվար է լրացնել ենթառահվիրաներից պահանջվող ժամերի քանակը, որը 50 ժամ է կազմում։ Աղոթքով մտածիր քո ամենօրյա գործերի շուրջ, կազմիր գրաֆիկ, ապա այն գրի առ քո աստվածապետական օրացույցում։ Ոչ ոք ավելի լավ չգիտի քո հանգամանքները։ Եթե վատառողջ ես և ֆիզիկապես տկար, գուցե կարողանաս օրական երկու ժամ մասնակցել ծառայությանը։ Եթե աշխատում ես լրիվ աշխատանքային օրով կամ սովորում ես դպրոցում, թերևս քեզ հաջողվի ծառայել որպես ենթառահվիրա, եթե ծառայությանը մասնակցես երեկոյան ժամերին կամ շաբաթ ու կիրակի օրերին։

8. Ի՞նչը օգնեց մի ամուսնական զույգի ծառայել որպես ենթառահվիրա։

⁸ Շատերին հաջողվել է ծառայել որպես ենթառահվիրա ամբողջ ընտանիքով։ Մի քանի տարի առաջ մի ամուսնական զույգ վարանում էր ենթառահվիրայական ծառայություն սկսել, քանի որ նրանք կարծում էին, թե իրենց հանգամանքների պատճառով չեն կարող մասնակցել ծառայության այդ ձևին։ Ի՞նչ միջոցներ ձեռնարկեցին նրանք։ «Մենք աղոթեցինք Եհովային, որ օգնի մեզ իրականացնել այն, ինչի մասին երազել էինք շատ վաղուց»։ Լավ պլանավորման շնորհիվ նրանց հաջողվեց հասնել իրենց նպատակին։ Նրանք ասում են. «Հրաշալի էր։ Մենք բազում օրհնություններ ստացանք։ Ուստի մեր խորհուրդը՝ քեզ. փորձի՛ր։ Եթե մենք կարողացանք անել, ապա դո՛ւ էլ կկարողանաս»։

9. Ի՞նչ կարող եք քննարկել ձեր հաջորդ ընտանեկան ուսումնասիրության ժամանակ, որպեսզի նախապատրաստվեք այն հատուկ գործունեությանը, որն անցկացվելու է գալիք ամիսներին։

⁹ Դուք կարող եք ձեր հաջորդ ընտանեկան ուսումնասիրության ժամանակ քննարկել, թե ինչպես կարող են ընտանիքի բոլոր անդամներն ընդարձակել իրենց ծառայությունը գալիք ամիսներին։ Նույնիսկ եթե ձեր ընտանիքի բոլոր անդամները չեն կարող մասնակցել ենթառահվիրայական ծառայությանը, գուցե մեկը կարողանա ծառայել մյուս անդամների օգնության ու աջակցության շնորհիվ։ Եթե դա էլ հնարավոր չէ, գուցե նպատակ դնեք ձեր առջև այս գալիք ամիսներին, որոնց ընթացքում հատուկ գործունեություն է ծավալվելու, ավելի շատ ժամանակ տրամադրել ծառայությանը։

10. Ինչո՞ւ է հարկավոր մյուսներին պատմել Հիշատակի երեկոյին նախորդող և հաջորդող շրջանում որպես ենթառահվիրա ծառայելու մեր ցանկության մասին։

¹⁰ Օգնենք միմյանց։ Քո խանդավառությամբ դու գուցե մյուսներին էլ վարակես։ Պատմիր մյուսներին ենթառահվիրա ծառայելու քո ցանկության մասին։ Դա կարող է քաջալերել նրանց նույնպես մասնակցելու ծառայության այդ ձևին։ Բացի այդ, նրանք, ովքեր նախկինում են ծառայել որպես ենթառահվիրա, կարող են իրենց խորհուրդներով քեզ օգնել, որ այնպես ծրագրես գործերդ ու այնպիսի գրաֆիկ կազմես, որ կարողանաս հասնել քո նպատակին (Առակ. 15:22)։ Եթե ի վիճակի ես ծառայելու որպես ենթառահվիրա, ապա կարող ես հրավիրել քարոզիչներից որևէ մեկին, որ նույնանման հանգամանքներ ունի, միանալ քեզ այս հաճելի գործում։

11. Ինչպե՞ս կարող են երեցները խանդավառությամբ առաջացնել մյուսների մեջ գալիք ամիսներին ենթառահվիրայական ծառայություն սկսելու հանդեպ։

¹¹ Շատ երեցներ անհրաժեշտ քայլեր են ձեռնարկում, որ կարողանան մասնակցել ծառայության այս ձևին (Եբր. 13:7)։ Որքա՜ն է դա ոգևորում ժողովի անդամներին։ Նաև նրանք մյուսների մեջ խանդավառություն են առաջացնում իրենց զրուցներով։ Մի քանի քաջալերական խոսքերը կամ գործնական որոշ խորհուրդներ գուցե ոմանց մղեն ենթառահվիրայություն սկսել։ Ծառայողական վերակացուն հավանաբար քարոզչական ծառայության լրացուցիչ հանդիպումներ կկազմակերպի, որպեսզի բոլորը հնարավորություն ունենան մասնակցելու խմբակային վկայությանը նույնիսկ աշխատանքից կամ դասերից հետո։ Այդ հանդիպումների մասին հարկավոր է կանոնավորաբար հայտարարել։ Ծառայողական վերակացուն նաև պետք է հոգ տանի, որ բոլորն ունենան բավական քանակությամբ գրականություն և քարոզչական տարածքներ։

12. Ի՞նչ կարող ես անել, եթե ի վիճակի չես ենթառահվիրա ծառայելու։

¹² Եթե նույնիսկ քո հանգամանքները թույլ չեն տալիս քեզ ծառայել որպես ենթառահվիրա, կարող ես քաջալերել նրանց, ովքեր մասնակցում են ծառայության այդ ձևին և կարող ես աղոթել նրանց համար (Առակ. 25:11; Կող. 4:12)։ Գուցե կարողանաս շաբաթվա մեջ մի լրացուցիչ օր տրամադրել նրանց հետ ծառայությանը մասնակցելուն կամ էլ նրանց հետ համագործակցել՝ սովորականից մի փոքր ավելի շատ ծառայելով։

13. Ի՞նչ նպատակ ունենք Հայաստանի համար, և ի՞նչ կարող է անել ձեր ժողովը այդ նպատակին հասնելու համար։

¹³ Նպատակ դնենք մեր առջև ապրիլ ամսին որպես ենթառահվիրա ծառայելու։ Հայաստանում ենթառահվիրաների երբևէ գրանցված բարձրագույն թիվը եղել է 2002 թ. մարտին՝ 1 662։ Հետևաբար այս տարվա ապրիլին մեր նպատակն է Հայաստանում ունենալ 1 800 ենթառահվիրա։ Մենք կկարողանանք հասնել այդ նպատակին, եթե միջին հաշվով յուրաքանչյուր ժողովում 5 քարոզիչներից 1–ը ծառայի որպես ենթառահվիրա։ Ինչ խոսք, որոշ ժողովներում կլինեն նույնիսկ ավելի շատ քարոզիչներ, որոնք ի վիճակի կլինեն ծառայելու որպես ենթառահվիրա։ Ժողովների մեծ մասը հեշտությամբ կարող է հասնել այդ նպատակին։ Պատկերացրու, թե ի՜նչ ոգևորություն կտիրի ձեր ժողովում, և ի՜նչ դրական ազդեցություն դա կունենա ժողովի տարածքը մշակելու գործի վրա։

14. Ինչո՞ւ է ապրիլը որպես ենթառահվիրա ծառայելու հիանալի ամիս։

¹⁴ Ինչո՞ւ կարելի է ասել, որ ապրիլը հարմար ամիս է ենթառահվիրայական ծառայության համար։ Քանի որ Հիշատակի երեկոն տեղի կունենա ամսվա սկզբին, մենք հիանալի հնարավորություն կունենանք այդ ամսվա ընթացքում վերայցելել նրանց, ովքեր ներկա կլինեն Երեկոյին։ Վերայցելություններ կատարելիս մենք կառաջարկենք պարբերագրեր՝ նպատակ ունենալով նաև առաջարկել «Աստվածաշունչը սովորեցնում է» գիրքը, ապա ուսումնասիրություն սկսել այդ գրքով։ Ուստի ապրիլին որպես ենթառահվիրա ծառայելով՝ հնարավորություն կունենանք Աստվածաշնչի ուսումնասիրություններ սկսել։ Հայաստանում ապրիլին օրերը ավելի երկար են լինում, իսկ եղանակը՝ սովորաբար մեղմ։ Բացի այդ, ապրիլն ունի հինգ կիրակի օր, ինչը հնարավորություն կտա ծառայելու որպես ենթառահվիրա նրանց, ովքեր աշխատում են կամ սովորում։

15. Ինչո՞ւ պետք է հրատապության զգացում ունենանք, մինչ մոտենում է Հիշատակի երեկոյին նախորդող և հաջորդող շրջանը։

¹⁵ Ամեն տարի երբ գալիս է Հիշատակի երեկոյին նախորդող և հաջորդող շրջանը, մենք մեկ տարով ևս մոտենում ենք իրերի համակարգի վախճանին։ Մեր հրաշալի Աստծու մասին մարդկանց պատմելու համար մնացած ժամանակը գնալով նվազում է (Ա Կորնթ. 7:29)։ Երբ Հիշատակի երեկոյին նախորդող և հաջորդող շրջանը անցնի, մեր երկնային Հորը փառաբանելու այն հրաշալի հնարավորությունները, որ կային այդ ժամանակ, նույնպես կանցնեն։ Ուստի եկե՛ք արդեն հիմա նախապատրաստվենք, որ մեր ձեռքից եկած ամեն բան անենք մարտ, ապրիլ և մայիս ամիսներին, որ հռչակենք Եհովայի գերազանց հատկությունները։

[Շրջանակ 4–րդ էջի վրա]

Կարո՞ղ ենք ապրիլին Հայաստանում ունենալ 1 800 ենթառահվիրա

◼ Քննիր, թե ինչ առաջնահերթություններ ունես

◼ Ձեր նպատակները քննարկեք ընտանիքի բոլոր անդամների հետ միասին

◼ Ծրագրերիդ մասին պատմիր մյուսներին