Ապրիլ ամիսը բարի գործերի մեջ նախանձախնդիր լինելու ժամանակ է

¹ Երբ ինչ–​որ վայրում փոթորիկ կամ մրրիկ է սպասվում, տվյալ գոտու բնակիչներին վտանգի մասին հրատապորեն նախազգուշացնելու անհրաժեշտություն է առաջանում։ Որքան փոթորիկը մոտենում է, այնքան ավելի զորեղ պետք է հնչի նախազգուշացումը։ Իսկ ինչո՞ւ։ Քանի որ մարդկանց կյանքերը վտանգի տակ են։ Հնարավոր է, որ ոմանք տեղյակ չեն մինչ այդ եղած նախազգուշացումներից։ Մի մասն էլ գուցե լսել է, սակայն քայլեր ձեռք չի առել։ Նույնն է պարագան Աստծո կողմից մեզ հանձնարարված նախազգուշացման հետ, որի մասին հռչակում ենք, մինչև որ նրա «մրրիկը» վերացնի այս ապականյալ աշխարհի չարությունը (Առակ. 10։25)։ Վտանգի տակ է միլիարդավոր մարդկանց հավիտյան կյանքի հեռանկարը, ուստի պետք է բարձր նախազգուշացում հնչի։ Մեզ հարկավոր է «նախանձախնդիր [լինել] բարի գործերի» մեջ (Տիտոս 2։11—14)։

² Տասնամյակներ շարունակ Եհովայի ժողովուրդը ջանքեր է գործադրել՝ Հիշատակի երեկոյին նախորդող և հաջորդող օրերին ծառայության մեջ առանձնահատուկ ժրաջանություն ցուցաբերելու։ 1939 թ. գարնանը «Տեղեկատու» (այժմ՝ «Մեր թագավորական ծառայությունը») կոչվող թերթիկը հետևյալ քաջալերիչ խոսքերն էր ուղղել ընթերցողներին. «Գարունը եկել է... Եղանակները տաքացել են... Այդ առնչությամբ ակնկալում ենք, որ կկրկնապատկվի այն ժամանակը, որը քարոզիչներն անցկացնում են ծառայության մեջ, և ռահվիրաներն ավելի շատ ժամանակ կունենան քարոզելու։ Ապրիլն ունի հինգ կիրակի և հինգ շաբաթ։ Աշխատիր այդ ամսվա բոլոր շաբաթներն ու կիրակիները.... քարոզչության համար յուրահատուկ ժամանակ դարձնել»։ Վաթսուն տարի առաջ եղբայրների համար դա մի վիթխարի նպատակ էր։ Այս տարի ևս, ինչպես 1939–ին էր, ապրիլ ամիսն ունի հինգ շաբաթ և կիրակիներ։ Ի՞նչ պլաններ ունես այս ամսվա համար։ Օրացույցումդ ապրիլ ամսվա մեջ ի՞նչ նշումներ ես կատարել։ Նպատակ դիր հատկապես այս ամիս Եհովայի ժողովրդի հետ միասին մասնակցելու հոգևոր գործունեությանը։

³ Ի՞նչ ակնկալիքներ ունենք։ 2000 թ. ամենակարևոր օրը ապրիլի 19–ն է՝ Հիսուսի մահվան տարեդարձի օրը։ Եկեք հատուկ ջանքեր գործադրենք՝ Հիշատակի երեկոյին հնարավորին չափ շատ անհատների հրավիրելու։ Ինչպես խորհուրդ էր տրվել սույն թերթիկի նախորդ համարում, կազմիր այն անհատների անվանացանկը, որոնք քո կարծիքով կցանկանային ներկա գտնվել Հիշատակի երեկոյին, այնուհետև հետևիր, որ ոչ մեկին բաց չթողնես։ Հրավիրիր նաև ոչ ակտիվ քարոզիչներին, Աստվածաշունչ ուսումնասիրողներին, նրանց, ում այցելում ես, նաև նախկինում ուսումնասիրող, բայց այժմ ուսումնասիրությունը դադարեցրած անհատներին, աշխատակիցներիդ, համադասարանցիներիդ, հարևաններիդ, բարեկամներիդ և մյուս ծանոթներիդ։ Ճշտիր, թե միջոցառմանը ներկա գտնվել ցանկացողներն ապահովվա՞ծ են տրանսպորտային փոխադրամիջոցով։ Եթե ո՛չ, կարո՞ղ ես օգնության ձեռք մեկնել նրանց։ Երեկոյի ընթացքում մեզանից յուրաքանչյուրն առանձնաշնորհում ունի ողջունելու և ուշադրություն ցույց տալու այցելուների նկատմամբ։ Հիշատակի երեկոյից հետո կարող ենք շարունակել հոգ տանել, որպեսզի այդ հետաքրքրվող անհատներին հավելյալ հոգևոր օգնություն ցույց տրվի։

⁴ Հիշատակի երեկոյին նախորդող և հաջորդող օրերին լինելով «նախանձախնդիր բարի գործերի» համար՝ մենք ցույց կտանք Եհովային, որ իսկապես գնահատում ենք այն ամենը, ինչ որ նա արել է մեզ համար։ Շատ վայրերում օրերի երկարելու և եղանակի ավելի բարենպաստ դառնալու շնորհիվ մեզանից շատերը կկարողանան ավելի շատ ջանք գործադրել ավետարանչական գործում։ Եթե դու արդեն ենթառահվիրա ես, հավանաբար ցանկանում ես 50 կամ, գուցե, դրանից ավել ժամ տրամադրել ծառայությանը (Մատթ. 5։37)։ Հենց ամսվա սկզբից հետևիր ծառայությանդ գրաֆիկին (Ժող. 3։1; Ա Կորնթ. 14։40)։ Իսկ մյուսներս եկեք մեր ուժերից եկածն անենք բոլոր ռահվիրաներին աջակցություն ցույց տալու համար՝ քաջալերելով նրանց և ծառայության մեջ նրանց հետ համագործակցելով (համեմատիր Դ Թագ. 10։15, 16)։ Եթե ապրիլին ժրաջանորեն ցանենք ճշմարտության սերմերը, մեծ ուրախություն կստանանք ու օրհնություններ Եհովայից (Մաղ. 3։10)։ Գուցե այս ամսվա ժրաջան ծառայությունը հիմք հանդիսանա մեզ համար, որպեսզի ենթառահվիրայություն կամ ընդհանուր ռահվիրայություն սկսենք։ Թող որ ապրիլ ամսվա ընթացքում մեր զարգացրած եռանդը հետագայում էլ չմարի, որպեսզի շարունակենք Թագավորության լուրը կանոնավորաբար քարոզել։

⁵ Համոզված ենք, որ այս ամիս հազարավոր Եհովայի վկաներ Աստվածաշնչի է՛լ ավելի ուսումնասիրություններ կսկսեն։ Դու էլ կցանկանա՞ս նոր ուսումնասիրություն սկսել։ Հատուկ աղոթիր նոր ուսումնասիրություն գտնելու համար և գործիր աղոթքներիդ համաձայն։ Վստահ եղիր, որ Եհովան կգնահատի հեզությամբ արտասանված քո խնդրանքը, երբ դիմես նրան անկեղծ սրտով անհատ գտնելու համար (Ա Յովհ. 3։22)։

⁶ Ահա զրույց սկսելու համար փորձված և բավականին հաջող մի նախաբան. «Ի՞նչ եք կարծում, դպրոցներում տիրող բռնությունը դիվայի՞ն ազդեցության արդյունք է, թե՞ վատ դաստիարակության»։ Թույլ տուր պատասխանել։ Եթե զրուցակիցդ ասում է, որ դա դիվային ազդեցության արդյունքն է, ապա կարդա Յայտնութիւն 12։9, 12 խոսքերը և բացատրիր աշխարհում տիրող անկարգության մեջ Սատանայի ունեցած դերը։ Այնուհետև բաց արա «Աստված պահանջում է» գրքույկի չորրորդ դասը և հարցրու զրուցակցիդ, թե արդյոք երբևիցե չի՞ մտածել այն մասին՝ որտեղի՛ց է առաջացել Սատանան։ Շարունակիր կարդալ և քննարկել առաջին երկու պարբերությունները։ Իսկ, եթե նա պատասխանում է, որ դպրոցներում տիրող բռնության պատճառը վատ դաստիարակությունն է, կարդա Բ Տիմոթէոս 3։1—3 խոսքերը և ընդգծիր մարդու բնավորության այն գծերը, որոնք անմիջականորեն կապ ունեն տվյալ խնդրի հետ։ Հետո բաց արա «Աստված պահանջում է» բրոշյուրի 8–րդ դասը, կարդա 5–րդ պարբերությունը և շարունակիր քննարկումը։ Եթե հաջողվի պայմանավորվել կրկնակի այցելության, ուրեմն հավանական է, որ նրա հետ Աստվածաշնչի կանոնավոր ուսումնասիրություն կսկսես։ Հաջորդ այցելության ժամանակ հարցրու, թե գիտի՞ որևէ մեկի, ով, թերևս, նույնպես ցանկանա զրուցել այդ թեմայով։

⁷ Ապրիլ ամսին ‘բարի գործերի մեջ նախանձախընդիր’ լինելու մեկ այլ միջոցը քարոզչության զանազան ձևերին մասնակցելն է։ Երբևէ մտածե՞լ ես զբոսայգում կամ ավտոկանգառում, կանգառում կամ երկաթուղային կայարանում քարոզելու մասին։ Կամ չե՞ս ցանկանա քարոզել հեռախոսով, փողոցում կամ էլ գործարար տարածքներում։ Ինչո՞ւ չփորձել հենց այս ամիս իրականացնել այդ ձգտումները։ Եհովան կօգնի քեզ՝ ծառայության մեջ անհրաժեշտ համարձակություն ունենալու (Գործք 4։31; Ա Թեսաղ. 2։2բ)։ Գուցե փորձառու քարոզիչների կամ ռահվիրաների հե՞տ մասնակցես նման տիպի քարոզչությանը։

⁸ Իրենց ծառայությունն ընդարձակել ցանկացող քարոզիչներին հարկավոր է մասնակցել ոչ պաշտոնական ծառայությանը։ Այս տիպի ծառայության համար հաճախ բավական է մարդու հետ պարզապես ընկերական խոսակցություն սկսել։ Կարող ես պարզապես այնպիսի հարց բարձրացնել, որը, կարծում ես, շատերին է կհետաքրքրի։ Դա կարելի է անել նույնիսկ կիրառելով 6–րդ պարբերության մատուցումը։ Աշխատիր օգտագործել նույնիսկ ամենաչնչին ժամանակը՝ այն աննպատակ չվատնելու համար։ Տրամաբանական չէ՞ արդյոք, որ մենք դեն չենք նետի մետաղյա դրամները միայն այն պատճառով, որ դրանք մեծ գումար չեն կազմում։ Ինչո՞ւ ուրեմն արդյունավետ կերպով չօգտագործենք նույնիսկ հինգ, տասը կամ էլ տասնհինգ րոպեն՝ մարդկանց հետ զրուցելով։

⁹ Խորհելու ժամանակ։ Հիշո՞ւմ ես անցած տարվա «Աստծո մարգարեական Խոսքը» նահանգային համաժողովի դրաման, որի վերնագիրն էր՝ «Գնահատենք մեր հոգևոր ժառանգությունը»։ Դրամայի ուշագրավ մասերի օգնությամբ մենք կարողացանք խորհել Հակոբի ու Եսավի միջև եղած տարբերության շուրջը։ Եսավն ասում էր, որ նա հոգևորի հանդեպ նույնպիսի հետաքրքրություն ունի, ինչպիսին Հակոբը, սակայն նրա գործերը հակառակն էին ցույց տալիս (Ծննդ. 25։29—34)։ Ինչպիսի՜ ազդու նախազգուշացում է մեզ համար։ Եկեք ջանք թափենք, նույնիսկ պայքարենք ինչպես Հակոբը Եհովայից օրհնություն ստանալու համար (Ծննդ. 32։24—29)։ Եկեք ապրիլ և հաջորդ ամիսներին ավելի մեծ եռանդով ծառայենք և անհոգությամբ չվերաբերվենք մեր հոգևոր ժառանգությանը։

¹⁰ «Մօտ է Տիրոջ մեծ օրը, մօտ է եւ շատ շտապում է» (Սոփ. 1։14)։ Թագավորության բարի լուրը պետք է հռչակվի ամենուրե՛ք։ Մարդկանց կյանքերը վտանգի տակ են։ Թող որ այս ամիսը լինի հատուկ օրհնությունների ամիս Եհովայի ամբողջ ժողովրդի համար, և թող նրանք միասնաբար ցույց տան, որ ‘նախանձախնդիր են բարի գործերում’։

[4 էջի վրայի շրջանակը]

Հիշեցումներ Հիշատակի երեկոյի համար

Հիշատակի երեկոն այս տարի նշվելու է ապրիլի 19–ին՝ չորեքշաբթի օրը։ Երեցները պետք է ուշադրություն դարձնեն ներքոհիշյալ հարցերին։

◼ Հանդիպման ժամը որոշելիս՝ ուշադիր եղեք, որ խորհրդանիշները մինչև մայրամուտը չփոխանցվեն։

◼ Բոլորին, այդ թվում նաև ելույթ ունեցողին, պետք է տեղեկացնել Երեկոյի ճիշտ ժամի և տեղի մասին։

◼ Համապատասխան հացը և գինին պետք է նախօրոք ձեռք բերել և պատրաստ պահել (տես «Դիտարան» 15.02.85, էջ 17, ռուս.)։

◼ Ափսեները, բաժակները, հարմար սեղանը և սփռոցը պետք է սրահ բերել և նախօրոք իրենց տեղերում դնել։

◼ Թագավորության սրահը կամ այն վայրը, որտեղ կկայանա հանդիպումը, պետք է նախապես լավ մաքրել։

◼ Պետք է կարգավորողներ և սպասարկողներ նշանակել ու նախօրոք տեղեկացնել իրենց պարտականությունների և արարողությունը պատշաճ կերպով անցկացնելու մասին։

◼ Պետք է հոգ տանել այն օծյալներին սպասարկելու համար, որոնք հիվանդ են կամ ի վիճակի չեն ներկա լինելու Երեկոյին։

◼ Եթե միևնույն Թագավորության սրահում Հիշատակի երեկոն պետք է անցկացնեն մեկից ավելի ժողովներ, հարկավոր է, որ ստույգ պայմանավորվածություն լինի այդ ժողովների միջև, որպեսզի միջանցքում, մուտքի մոտ և մայթերին մարդիկ չխմբվեն և որպեսզի ավելորդ կուտակումներ չլինեն ավտոկանգառում։