Նախանձախնդիր լինենք բարին գործելու մեջ

¹ Քանի որ մոտենում է 2003 թ. Հիշատակի երեկոյի շրջանը, մենք բազում պատճառներ ունենք «նախանձախնդիր լինե[լու] բարին գործելու» մեջ (Ա Պետ. 3։13, ԱՆԹ)։ Այդ պատճառներից ամենագլխավորը Հիսուս Քրիստոսի քավիչ զոհաբերությունն է (Մատթ. 20։28; Յովհ. 3։16)։ Այս կապակցությամբ Պետրոս առաքյալը գրում է. «Գիտենալով որ ոչ թէ ապականացու արծաթով կամ ոսկով փրկուեցաք ձեր.... ունայն վարմունքիցը. այլ Քրիստոսի պատուական արիւնովը, ինչպէս մի անբիծ եւ անարատ գառի» (Ա Պետ. 1։18, 19)։ Սիրո այս բացառիկ արտահայտության համար մեր երախտագիտությունը մղում է մեզ միշտ բարին գործել և ընդունել, որ Հիսուսն «իր անձը մեզ համար տուաւ, որ մեզ ամեն անօրէնութիւնից փրկէ, եւ սրբէ իրան համար յատուկ ժողովուրդ շինէ բարի գործերի նախանձաւոր» (Տիտոս 2։14; Բ Կորնթ. 5։14, 15)։

² Երբ մենք անում ենք այն, ինչը հաճելի է Եհովայի աչքին, մենք լավ փոխհարաբերություններ ենք վայելում նրա հետ և արժանանում նրա սիրալիր հոգատարությանը։ Պետրոսը շարունակում է. «Ով որ կամենում է կեանք սիրել եւ լաւ օրեր տեսնել,....չարիցը ետ քաշուի եւ բարի անէ, խաղաղութիւն որոնէ եւ նորան հետեւէ։ Որովհետեւ Տիրոջ աչքերն արդարների վերայ են, եւ նորա ականջները դէպի նորանց աղօթքը» (Ա Պետ. 3։10–12)։ Ի՜նչ մեծ օրհնություն է իմանալ, որ այս դժվարին ժամանակներում Եհովան ուշադրություն է դարձնում մեզ վրա, պատրաստ է գործել հօգուտ մեզ և «պահպանե[լ] իր աչքի բիբին պէս» (Բ Օրին. 32։10; Բ Մնաց. 16։9)։

³ Չնայած իրենց կրած փորձություններին՝ վաղեմի քրիստոնյաների սրտում, որոնց Պետրոսն ուղղեց իր նամակը, նախանձախնդրության կրակ էր վառվում, որը հնարավոր չէր մարել։ Նրանք բարի լուրը տարածել էին հնարավոր ամեն տեղ (Ա Պետ. 1։6; 4։12)։ Նույնը կարելի է ասել Աստծո ժողովրդի մասին այսօր։ Չնայած մենք ապրում ենք «չար ժամանակներ[ում]», Եհովայի բարության համար երախտագիտությունը մղում է մեզ նախանձախնդրորեն կատարելու նրա կամքը (Բ Տիմոթ. 3։1; Սաղ. 145։7)։ Եկ նկատի առնենք մի քանի բարի գործեր, որոնցով կարող ենք զբաղված լինել Հիշատակի երեկոյին նախորդող և հաջորդող շրջանում։

⁴ Մարդկանց հրավիրիր Երեկոյին։ Միջոցներից մեկը, որով կարող ենք մեր գնահատանքն արտահայտել փրկանքի այս չքնաղ պարգևի համար, Հիսուսի մահվան հիշատակի կապակցությամբ տարեկան միջոցառմանը ներկա գտնվելն է, որն այս տարի կնշվի ապրիլի 16–ին՝ չորեքշաբթի օրը՝ արևամուտից հետո (Ղուկ. 22։19, 20)։ 94 600 ժողովների հաշվետվությունները ցույց են տվել, որ անցած տարի ամբողջ աշխարհում ներկաների ընդհանուր թիվը կազմել է 15 597 746։ Այն 220 000–ով գերազանցում է նախորդ տարվա ներկաների թվին։

⁵ Իսկ քանի՞ հոգի ներկա կլինեն այս տարի։ Շատ բան կախված է նրանից, թե ինչ ջանասիրությամբ կխրախուսենք մարդկանց միանալ մեզ այդ օրը։ Առաջին քայլը պետք է լինի այն մարդկանց ցանկը կազմելը, որոնց կցանկանայիր հրավիրել։ Ցանկի սկզբում պետք է լինեն քո ընտանիքի անդամների անունները։ Եթե անհավատ ամուսին ունես, հայտնիր նրան, որ սրտանց ցանկանում ես, որ նա քեզ հետ միասին ներկա լինի Երեկոյին։ Մի անհավատ ամուսին պատմում է, որ անցած տարի նա ներկա գտնվեց Հիշատակի երեկոյին, քանի որ տեսավ, որ իր ներկայությունը մեծ նշանակություն ուներ իր կնոջ համար։ Հաջորդը քո ցանկում կարող են լինել բարեկամներդ, հարևաններդ, աշխատակիցներդ կամ համադասարանցիներդ։ Մի մոռացիր հրավիրել նրանց, ում հետ Աստվածաշունչ ես ուսումնասիրում։

⁶ Ցանկը կազմելուց հետո այնպես ծրագրիր ժամանակդ, որ ի վիճակի լինես անձամբ այցելել ու հրավիրել յուրաքանչյուրին։ Դրա համար գործածիր Հիշատակի երեկոյի հրավիրատոմսերը։ Որպեսզի օգնես նրանց հիշել անցկացման վայրն ու ժամը, այդ տեղեկությունը կարող ես տպել կամ պարզ գրել հրավիրատոմսի ներքևի մասում։ Ապրիլի 16–ին մոտ օրերին ցանկում ընդգրկված անհատներին հիշեցրու Երեկոյի մասին. դա կարող ես անել հեռախոսով կամ անձամբ նրանց այցելելով։ Եկեք օգնենք հնարավորին չափ շատ մարդկանց, որ ներկա լինեն այս ամենասրբազան արարողությանը։

⁷ Օգնիր նրանց, ովքեր ներկա կլինեն Երեկոյին։ Հիշատակի երեկոն մեզ համար հուզումնալից իրադարձություն է։ Այս հանդիպման ժամանակ մենք հնարավորություն ունենք ողջունելու այն անհատներին, ովքեր կանոնավորաբար չեն հաճախում ժողովի հանդիպումներին։ Եթե տեղի պայմանները թույլ են տալիս, միջոցներ ձեռնարկիր՝ շուտ գալու և հանդիպման ավարտից հետո երկար մնալու։ Նախաձեռնությունը քեզ վրա վերցրու ծանոթանալու համար նրանց հետ, ովքեր առաջին անգամ են ներկա գտնվում Երեկոյին։ Եղիր ջերմ և հյուրընկալ (Հռովմ. 12։13)։

⁸ Կարո՞ղ ես օգնել ներկաներից մի քանիսին Աստվածաշնչի տնային ուսումնասիրության միջոցով հոգևոր առաջադիմություններ կատարել։ Փորձիր իմանալ նոր անհատների անուններն ու հասցեները, որոնց ներկայումս ոչ ոք չի այցելում, որպեսզի հետո օգնություն ցույց տաս նրանց։ Մինչև հաջորդ տարվա Հիշատակի երեկոն գուցե նրանցից ոմանք, սիրալիր օգնություն ստանալով, առաջադիմություններ կատարեն և նույնիսկ համապատասխանեն չմկրտված քարոզիչ դառնալու պահանջներին։ Այցելելով այն անհատներին, ովքեր ներկա եղան Հիշատակի երեկոյին՝ հրավիրիր նրանց հատուկ ելույթին, որը կներկայացվի ապրիլի 27–ին։

⁹ Կարո՞ղ ես այս գարնանը ծառայել որպես ենթառահվիրա։ Ամեն տարի Եհովայի հանդեպ մեր նախանձախնդրությունը մղում է մեզ ջանքեր գործադրել, որպեսզի լիարժեք մասնակցություն բերենք ծառայության մեջ այս ամիսներին, որոնց ընթացքում աստվածապետական հատուկ գործունեություն է ծավալվում։ Օրինակ՝ անցած տարի Հայաստանում մարտ և ապրիլ ամիսներին որպես ենթառահվիրա են ծառայել միջին հաշվով 1 288 քարոզիչ։ Ամբողջ ժողովի միավորված ջանքերի շնորհիվ, որ գործադրվել է՝ բարի լուրը Հիշատակի երեկոյին նախորդող և հաջորդող շրջանում նախանձախնդրորեն քարոզելու, կարելի է հրաշալի արդյունքների հասնել։

¹⁰ Մի ժողով, որն ուներ 107 քարոզիչ և 9 ընդհանուր ռահվիրա, հայտնում է, որ նախորդ տարվա ապրիլը մի «բացառիկ ամիս էր» ժողովի համար. 53 քարոզիչ ծառայել է որպես ենթառահվիրա, այդ թվում նաև բոլոր երեցներն ու ծառայող օգնականները։ Իսկ ինչպե՞ս երեցներին հաջողվեց խանդավառություն առաջացնել քարոզիչների մեջ՝ այդ ամսին ենթառահվիրա ծառայելու։ Նրանք Հիշատակի երեկոյից դեռ շատ առաջ են խրախուսել շատերին, որ հնարավորության դեպքում մասնակցեն ծառայության այդ ձևին։ Քարոզչական ծառայության հանդիպումներն անցկացնում էին օրվա տարբեր ժամերին, որպեսզի բոլորին հարմար լիներ։ Հատուկ շեշտ էր դրվել հեռախոսով վկայություն տալու վրա, հատկապես նրանց համար, ովքեր ֆիզիկապես տկար էին։

¹¹ Ութսունվեցամյա մի քույր, որը առողջական խնդիրների պատճառով չի կարողանում քայլել, որոշեց ծառայել որպես ենթառահվիրա։ Առավոտյան նա, խոհանոցում նստած, մեկ–​երկու ժամ հեռախոսով վկայություն էր տալիս, ապա մի քանի ժամ հանգստանում և հետո նորից վերադառնում խոհանոց և մի քիչ էլ քարոզում։ Մի կին, որի հետ նա զրուցել էր, վերջին երկու տարիների ընթացքում կորցրել էր ամուսնուն և երկու պատանի որդիներին և չէր կարողանում հասկանալ, թե ինչու է Աստված թույլ տալիս, որ նման դաժան բաներ տեղի ունենան։ Քույրը նրան լավ վկայություն է տալիս։ Աստվածաշնչի ուսումնասիրություն է սկսվում։ Երեկոները կամ ուրիշ ժամերի հեռախոսով վկայություն տալը հիանալի միջոց է քարոզելու համար նրանց, ովքեր ապրում են այնպիսի շենքերում, ուր մտնել հնարավոր չէ։ Դա նաև հնարավորություն է տալիս քարոզիչներին կապ հաստատել այն մարդկանց հետ, ովքեր օրվա ընթացքում տանը չեն լինում։

¹² Վերջում վերոհիշյալ ժողովի երեցները տեղեկացնում են. «Դա մեզ համար հրաշալի ժամանակ էր, և մենք երախտապարտ ենք Եհովային ծառայության մեջ այն առանձնաշնորհումների և օրհնությունների համար, որ տվեց յուրաքանչյուրիս»։ Ճիշտ պլանավորումը ձեր ժողովին նույնպես կօգնի նման օրհնություններ ստանալ։

¹³ Ձգտիր լիակատար մասնակցություն ունենալ ծառայության մեջ։ Աստծո և դրացու հանդեպ մեր սերը մղում է ամեն ամիս գնել ժամանակը՝ բարի լուրը մարդկանց հաղորդելու համար (Մատթ. 22։37–39)։ Ժողովի Գրքի ուսումնասիրության վերակացուները և նրանց օգնականները պետք է ձգտեն աջակցություն ցույց տալ իրենց խմբի անդամներին, որպեսզի նրանք ամեն ամիս մասնակցեն քարոզչական գործին։ Այս հարցում հաջողության հասնելու հիանալի միջոց է նախօրոք ծրագրելը՝ խմբի որոշակի անդամների հետ քարոզչական ծառայությանը մասնակցելու։ Ամսվա վերջին սպասելու փոխարեն՝ այս ուղղությամբ քայլեր ձեռնարկիր ամսվա սկզբին։ Այդպես դու սիրալիր օգնություն ցույց տալու ավելի մեծ հնարավորություններ կունենաս։

¹⁴ Ձեր խմբում կա՞ն այնպիսի քարոզիչներ, որոնք ֆիզիկական տկարության պատճառով մեծ դժվարությամբ են մասնակցում ծառայությանը։ Եթե կան այնպիսիները, որոնք ծերանոցներում կամ այլ հաստատություններում են ապրում կամ տնից չեն կարողանում դուրս գալ, հասկանալի է, որ քարոզելու նրանց հնարավորությունները սահմանափակ են։ Սակայն նման վիճակում նրանք կարող են այնպես անել, որ իրենց լույսը փայլի այն մարդկանց առջև, ովքեր տեսնում են նրանց բարի գործերը, ինչն էլ գուցե այդ մարդկանց մեջ հետաքրքրություն առաջացնի ճշմարտության հանդեպ (Մատթ. 5։16)։ Գրքի ուսումնասիրության վերակացուները պետք է հավաստիանան, որ այդպիսի քարոզիչները տեղյակ են, որ քարոզչության հաշվետվություններ կարող են հանձնել, նույնիսկ եթե դրանք կազմում են 15 րոպե կամ ավելի։ Այդ քարոզիչներին ոգևորում, ինչպես նաև ուրախություն ու բավարարվածության զգացում է պատճառում այն, որ հնարավորություն ունեն հաշվետվության մեջ գրանցել այն ժամանակը, որ անցկացրել են ծառայության մեջ։ Դա նաև վստահություն է ներշնչում մեզ, որ Աստծո ժողովրդի գործունեության համաշխարհային հաշվետվությունը ճշգրտորեն է կազմվել։

¹⁵ Երիտասարդներ, որ զբաղված են բարին գործելով։ Որքա՜ն հաճելի է տեսնել, որ երիտասարդ քրիստոնյաները իրենց ուժն ու կորովը ներդնում են Եհովային ծառայելու մեջ (Առակ. 20։29)։ Եթե դու էլ երիտասարդ ես, ինչպե՞ս կարող ես ցույց տալ Եհովայի հանդեպ քո նախանձախնդրությունը այս յուրահատուկ ամիսներին կազմակերպված միջոցառումների ժամանակ։

¹⁶ Եթե դեռ չմկրտված քարոզիչ չես, կարո՞ղ ես ձգտել այդ առանձնաշնորհմանը։ Ինքդ քեզ հետևյալ հարցերը տուր. «Աստվածաշնչի ճշմարտության մասին հիմնական գիտելիքներն ունե՞մ։ Ցանկանո՞ւմ եմ մասնակցել Թագավորության քարոզչությանը։ Օրինակելի՞ է վարքս։ Կարո՞ղ եմ հավատս արտահայտել՝ մարդկանց բարի լուրը հաղորդելով։ Սրտա՞նց եմ ուզում անել դա»։ Եթե այս հարցերին կարողանաս դրական պատասխաններ տալ, այդ դեպքում կարող ես զրուցել ծնողներիդ հետ և հայտնել քարոզիչ դառնալու քո ցանկության մասին։ Ծնողներդ այդ հարցով կդիմեն ձեր ժողովի Ծառայողական կոմիտեի երեցներից որևէ մեկին։

¹⁷ Իսկ եթե արդեն քարոզիչ ես, կարո՞ղ ես օգտագործել դպրոցական արձակուրդներդ, որպեսզի ընդարձակես ծառայությունդ։ Լավ պլանավորելու և ծնողների ու մյուսների օգնության շնորհիվ երիտասարդ, մկրտված շատ քարոզիչներ կարողացել են ծառայել որպես ենթառահվիրա։ Իսկ եթե այդպիսի հնարավորություն չունես, վճռական եղիր քարոզչական ծառայությանը ավելի շատ մասնակցելու։ Նպատակներ դիր քո առջև։ Նպատակ դիր ոչ միայն ծառայությանը որոշակի քանակությամբ ժամ հատկացնելու կապակցությամբ, այլև ծառայությանդ որակը բարձրացնելու։ Կարող ես ձգտել տնից տուն ծառայության ժամանակ յուրաքանչյուր անհատի հետ զրուցելիս սուրբգրային ինչ–​որ համար կարդալ, բարելավել վերայցելություններիդ որակը, Աստվածաշնչի ուսումնասիրություն սկսել կամ էլ ընդարձակել ծառայությունդ՝ հեռախոսով վկայություն տալով կամ ծառայության մեկ այլ ձևի մասնակցելով։ Իսկ կարո՞ղ ես նպատակ դնել այս տարի հարևաններիցդ, համադասարանցիներիցդ կամ բարեկամներիցդ մեկի հետ գնալ Հիշատակի երեկոյին։ Աստվածապետական միջոցառումներին լիարժեքորեն մասնակցելով՝ վարձատրություններ կստանաս, իսկ ժողովի մյուս անդամներն, անշուշտ, դրանից քաջալերություն կստանան (Ա Թեսաղ. 5։11)։

¹⁸ Օգնիր նորերին առաջադիմելու։ Նախորդ ծառայողական տարի Հայաստանում ամեն ամիս միջին հաշվով 6 707 Աստվածաշնչի տնային ուսումնասիրություն է անցկացվել։ Ժամանակի ընթացքում այս անհատները կառաջադիմեն և կհասնեն նվիրման ու մկրտության։ Սակայն մինչ այդ, մեզանից ակնկալվում է, որ օգնենք նրանց համապատասխանել բարի լուրի քարոզիչ լինելու պահանջներին։ Սա շատ կարևոր է նորերին ուսուցանելու գործում, որպեսզի նրանք Հիսուս Քրիստոսի հետևորդները դառնան (Մատթ. 9։9; Ղուկ. 6։40)։ Ուսումնասիրո՞ւմ ես որևէ մեկի հետ Աստվածաշունչը, ով պատրաստ է այդ քայլին։

¹⁹ Եթե համոզված չես, որ քո ուսումնասիրողը պատրաստ է քարոզիչ դառնալու, դիմիր ձեր Գրքի ուսումնասիրության վերակացուի կամ ծառայողական վերակացուի օգնությանը։ Կարող ես հրավիրել նրան մասնակցելու ձեր ուսումնասիրությանը։ Այս եղբայրները հրաշալի փորձ ունեն որոշելու համար, թե որքանով է ուսումնասիրողը հոգևորապես առաջադիմել։ Նրանք կարող են խորհուրդներ տալ, որոնք կօգնեն ուսումնասիրողին շարունակել հոգևորապես առաջադիմել։

²⁰ Եթե ուսումնասիրողը ցանկություն է հայտնում չմկրտված քարոզիչ դառնալու, և դու կարծում ես, որ նա համապատասխանում է անհրաժեշտ պահանջներին, այդ կապակցությամբ զրուցիր նախագահող վերակացուի հետ։ Նա միջոցներ կձեռնարկի, որպեսզի երկու երեց հանդիպեն ուսումնասիրողի և քեզ հետ, որպեսզի, հիմնվելով «Մեր ծառայությունը» գրքի (ռուս.) 98–րդ, 99–րդ էջերում տրված տեղեկության վրա, պարզեն՝ արդյոք նա համապատասխանում է չմկրտված քարոզիչ դառնալու պահանջներին (տե՛ս «Դիտարանի» 1989 թ. մայիսի 1–ի համարը, էջ 26, արևմտ. կամ 1989 թ. սեպտեմբերի 15–ի համարը, էջ 13, 14, ռուս.)։ Եթե երեցները հավանություն տան, որ ուսումնասիրողը քարոզիչ դառնա, դու պետք է անմիջապես սկսես նրան քարոզել սովորեցնել։ Առաջին անգամ հաշվետվություն հանձնելուց հետո ժողովում կհայտարարվի, որ նա չմկրտված քարոզիչ է։ Մենք հույս ունենք, որ հազարավոր նոր քարոզիչներ՝ երիտասարդ թե տարեց, այս հատուկ ամիսների ընթացքում կկարողանան հասնել հոգևոր առաջադիմության այդ կարևոր կետին։

²¹ Պլանավորելն օգնում է լավագույնն անելու։ Հիշատակի երեկոյին նախորդող և հաջորդող շրջանում նախապես պլանավորելը կարևոր դեր ունի աստվածապետական գործունեություններին մասնակցելու մեջ հաջողությունների հասնելու համար (Առակ. 21։5)։ Շատ հարցերի պետք է ուշադրություն դարձնեն երեցները։

²² Որպեսզի ժողովը կարողանա իր լավագույնն անել քարոզչական ծառայության մեջ, երեցները պետք է գործնական միջոցներ ձեռնարկեն, որպեսզի քարոզչական ծառայության հանդիպումներ անցկացվեն շաբաթվա ընթացքում և հանգստյան օրերին։ Այս հարցում առաջնորդությունն իր ձեռքն է վերցնում ծառայողական վերակացուն։ Հնարավո՞ր է լրացուցիչ հանդիպումներ նշանակել վաղ առավոտյան ժամերին, կեսօրից հետո և երեկոյան։ Հարկավոր է այդ միջոցառումների մասին տեղեկացնել ժողովին։ Գուցե օգտակար լինի հանդիպումների ծրագիրը փակցնել հայտարարությունների տախտակին։

²³ Երեցները պետք է հետևեն, որ Հիշատակի երեկոյի հետ կապված համապատասխան միջոցները ձեռնարկված լինեն ապրիլի 16–ից շատ առաջ։ Դրանց մեջ մտնում են՝ համաձայնեցումը մյուս ժողովների հետ, որոնք նույնպես օգտվելու են Թագավորության սրահից, Թագավորության սրահը մաքրելը, սպասարկուներ ու խորհրդանիշները մատուցող եղբայրներ նշանակելը, ինչպես նաև խորհրդանիշները ձեռք բերելը։ Ժողովում պետք է հայտարարել Երեկոյի անցկացման ժամի ու վայրի, ինչպես նաև տվյալ շաբաթ ժողովի հանդիպումների հետ կապված ցանկացած փոփոխության մասին։ Այս ամենի մասին ինչպես հարկն է հոգալով՝ Երեկոն կնշենք «պարկեշտութեամբ եւ կարգով» (Ա Կորնթ. 14։40)։

²⁴ Եթե ընտանիքի գլուխ ես, գուցե որոշես ձեր ընտանեկան ուսումնասիրության ընթացքում որոշ ժամանակ հատկացնել քննարկելու համար, թե ինչպես կարող է ձեր ընտանիքը մասնակցել Հիշատակի երեկոյին նախորդող և հաջորդող շրջանին ծրագրված գործունեություններին։ Կարո՞ղ եք ամբողջ ընտանիքով ծառայել որպես ենթառահվիրա։ Կամ գուցե ողջ ընտանի՞քը աջակցություն ցույց տա, որ անդամներից մեկը կամ մի քանիսը կարողանան ենթառահվիրա ծառայել։ Եթե դա հնարավոր չէ, որպես ընտանիք՝ նպատակ դրեք ձեր առջև ծառայությանը ավելի շատ ժամանակ տրամադրելու։ Ձեր ընտանիքում երեխաներ կա՞ն, որոնց փոքր–​ինչ ոգևորելու և աջակցելու դեպքում գուցե համապատասխանեն չմկրտված քարոզիչ դառնալու պահանջներին։ Քանի՞ հոգու կարող է ձեր ընտանիքը հրավիրել Հիշատակի երեկոյին այս տարի։ Լավ պլանավորումը մեծ օրհնություններ կբերի և ուրախություն կպատճառի ձեր ընտանիքին։

²⁵ Լիարժեք կերպով օգտվիր եղած ժամանակից։ Առաջին դարի քրիստոնյաներին ուղղված նամակում Պետրոս առաքյալը հիշեցրեց ժամանակի հրատապության մասին, քանի որ հրեական իրերի համակարգի վերջը մոտ էր (Ա Պետ. 4։7)։ Այսօր էլ բոլոր ապացույցները ցույց են տալիս, որ իրերի ներկա համաշխարհային համակարգի վախճանը մոտ է։ Մեր ապրելակերպն ամեն օր պետք է ցույց տա, որ այդպիսի վստահություն ունենք։ Որպես Եհովայի նախանձախնդիր ծառաներ՝ մենք պետք է մեր ուշադրությունը կենտրոնացնենք բարի լուրը հռչակելու հրատապ գործի վրա (Տիտոս 2։13, 14)։

²⁶ Այժմ գործելու և նախանձախնդրություն դրսևորելու ժամանակ է։ Մտածիր, թե ինչեր է Եհովան արել քեզ համար, քո ընտանիքի և ժողովի համար։ Թեպետ մենք երբեք չենք կարող վարձահատույց լինել նրան այն բոլոր օրհնությունների համար, որ նա տվել է մեզ, սակայն կարո՛ղ ենք ամբողջ սրտով երկրպագել նրան (Սաղ. 116։12–14)։ Եհովան մեզ վարձահատույց կլինի մեր եռանդուն ջանքերի համար (Առակ. 10։22)։ Եկեք բոլորս ծառայության այս յուրահատուկ ժամանակահատվածում «նախանձախնդիր լինե[ն]ք բարին գործելու» մեջ, որպեսզի «ամեն բանի մէջ Աստուած փառաւորուի Յիսուս Քրիստոսի ձեռովը» (Ա Պետ. 3։13 ԱՆԹ; 4։11)։

[Շրջանակ 4–րդ էջի վրա]

Ո՞ւմ ես հրավիրելու Հիշատակի երեկոյին

✔ Ընտանիքիդ անդամներին ու բարեկամներիդ

✔ Հարևաններիդ ու ծանոթներիդ

✔ Աշխատակիցներիդ կամ համադասարանցիներիդ

✔ Նրանց, ում այցելում ես և որոնց հետ Աստվածաշունչ ես ուսումնասիրում

[Շրջանակ 5–րդ էջի վրա]

Օգնիր նրանց, ովքեր ներկա կգտնվեն Երեկոյին

✔ Ջերմ ընդունելություն ցույց տուր

✔ Այցելիր նրանց Երեկոյից հետո

✔ Աստվածաշնչի ուսումնասիրություն առաջարկիր

✔ Հրավիրիր նրանց հատուկ ելույթին

Ի՞նչ նպատակներ ունես այս տարվա Հիշատակի երեկոյին նախարդող և հաջորդող շրջանի համար

✔ Ձգտել, որ հրավիրած անհատներից որևէ մեկը ներկա լինի Երեկոյին

✔ Համապատասխանել բարի լուրի քարոզիչ դառնալու պահանջներին

✔ Որոշակի ժամեր հատկացնել ծառայությանը

✔ Կատարելագործվել ծառայության ինչ–​որ ձևի մեջ

✔ Ծառայել որպես ենթառահվիրա