Շարունակիր պատմել Եհովայի հրաշալի գործերի մասին

¹ Ոչ ոք չի կարող համեմատվել մեր վեհ Աստծո՝ Եհովայի հետ։ Դավիթը գրեց. «Շատ են քո հրաշքները՝ որ դու արիր, ով Տէր Աստուածս. եւ քո խորհուրդները մեզ վերայ են. ոչ ով քեզ հաւասար չէ» (Սաղ. 40։5)։ Եհովայի հրաշքների՝ հրաշալի գործերի մեջ մտնում են տիեզերքի արարումը, Մեսիական Թագավորության հաստատումը, իր ժողովրդի հանդեպ ցույց տրված ողորմությունը և աշխարհածավալ քարոզչական գործը (Սաղ. 17։7, 8; 139։14; Դան. 2։44; Մատթ. 24։14)։ Եհովայի հանդեպ սերը և նրա կատարած բոլոր բաների համար մեր երախտագիտությունը մղում է մեզ նրա մասին պատմել մարդկանց (Սաղ. 145։5–7)։ Մարտ, ապրիլ և մայիս ամիսների ընթացքում մենք դա անելու ավելի լայն հնարավորություններ կունենանք։

² Ենթառահվիրայական ծառայություն։ Կարո՞ղ ես այնպես ծրագրել գործերդ, որպեսզի այս հատուկ գործունեության մեկ կամ ավելի ամիսներին ծառայության մեջ անցկացնես 50 ժամ։ Այդ գործի համար արժե՛ անել ցանկացած փոփոխություն (Եփես. 5։16)։ Շատերը նկատել են, որ ենթառահվիրայությունը օգնում է բարձրացնել իրենց ծառայության որակը։ Նրանք տնետուն ծառայելիս իրենց ավելի հանգիստ են զգում և ավելի շատ հնարավորություններ են ունենում Աստվածաշունչը գործածելու։ Ծառայությանը ավելի շատ ժամանակ տրամադրելով՝ նրանց համար ավելի հեշտ է լինում զարգացնել մարդկանց հետաքրքրությունը, և ոմանք, որ մինչ այդ Աստվածաշնչի տնային ուսումնասիրություն չեն անցկացրել, ենթառահվիրայական ծառայության ժամանակ ուսումնասիրություն են սկսել ինչ–​որ մեկի հետ։ Քանի որ ենթառահվիրայության մեջ մտնում է մարդկանց օգնելու նպատակով ջանքեր գործադրելը, ուստի այն ուրախալի գործ է (Գործք 20։35)։

³ Մի շտապիր եզրակացնել, որ քո հանգամանքները քեզ թույլ չեն տալիս ենթառահվիրայական ծառայություն սկսելու։ Մի երեց, որը անցած տարի ծառայեց որպես ենթառահվիրա, ունի երկու երեխա և աշխատում է լրիվ դրույքով։ Ինչպե՞ս այդ բազմազբաղ եղբորը հաջողվեց կատարել իր ծառայությունը։ Քանի որ եղբայրը շաբաթվա ընթացքում աշխատում է, նա երկար ժամանակով ծառայություն էր ծրագրում հանգստյան օրերի համար և շաբաթ օրերին ծառայությունը սկսում փողոցի վկայությամբ՝ առավոտյան ժամը 7։00–ից։ Նրա ժողովից մի քանի քարոզիչներ ևս, որ նույնանման հանգամանքներում էին գտնվում, ծառայեցին որպես ենթառահվիրա, և նրանք բոլորը աջակցում ու քաջալերում էին միմյանց։ Մեկ ուրիշ ժողովում 99–ամյա մի քույր որոշեց մայիս ամսին ծառայել որպես ենթառահվիրա այն բանից հետո, երբ նրա դուստրը առաջարկեց քրոջը միանալ իրեն։ Ժողովի մյուս անդամները այս ծեր քրոջը օգնում էին նրանով, որ տնետուն ծառայության և Աստվածաշնչի ուսումնասիրությունների գնալիս հրելով տանում էին նրա հաշմանդամի սայլակը։ Քույրը նաև հեռախոսով էր վկայություն տալիս, փողոցում էր քարոզում և նամակներ էր գրում։ Նա համոզված է, որ այդ ամենն արվել է ոչ թե իր ուժերով, այլ միայն Եհովայի օգնությամբ (Ես. 40։29–31)։

⁴ Փորձիր այնպիսի գրաֆիկ կազմել, որը լավագույնն է քո հանգամանքների համար։ Դրանում քեզ կօգնեն թերթիկի այս համարում տեղ գտած գրաֆիկների օրինակները։ Լրիվ դրույքո՞վ ես աշխատում կամ դպրոցո՞ւմ ես սովորում։ Քեզ համար գուցե ամենագործնականը հանգստյան օրերին ծառայելու գրաֆիկը լինի։ Եթե առողջական խնդիրներ ունես և ֆիզիկապես ի վիճակի չես օրվա ընթացքում երկար ժամանակ ծառայության մեջ գտնվել, գուցե լավագույնը լինի ամեն օր քիչ ժամանակով ծառայելու գրաֆիկը։ Հայտնիր մյուսներին ենթառահվիրա ծառայելու քո ցանկության մասին։ Գուցե նրանք էլ նպատակ դնեն նույնը անելու։

⁵ Ինչ կերպերով կարող են պատանիները ծառայել։ Եհովային հաճույք է պատճառում այն, որ պատանիները պատմում են մարդկանց իր հրաշալի գործերի մասին (Սաղ. 71։17; Մատթ. 21։16)։ Եթե պատանի ես և մկրտված, գուցե կարողանաս ծառայել որպես ենթառահվիրա այդ ամիսներից որևէ մեկի ընթացքում, երբ դպրոցական արձակուրդներ են լինում։ Եթե չես կարող ծառայել որպես ենթառահվիրա, ապա կարող ես հատուկ նպատակներ դնել քո առջև՝ այդ ամիսներին ավելի շատ ծառայելու և ծառայությանդ որակը բարձրացնելու համար։ Եթե քարոզչական գործին մասնակցում ես ծնողներիդ հետ միասին, բայց դեռ քարոզիչ չես, թերևս այժմ պատեհ ժամանակն է փորձելու քարոզիչ դառնալ։ Մի կարծիր, թե դու պետք է Աստվածաշնչի վերաբերյալ հարցերին պատասխանելու մասնագետ լինես կամ թե պետք է այնքան գիտելիքներ ունենաս, որքան մեծահասակները, որոնք մկրտված են։ Հասկանո՞ւմ ես Աստվածաշնչի հիմնական ուսուցումները։ Բարոյականության վերաբերյալ՝ Աստվածաշնչի սկզբունքների համաձայն ապրո՞ւմ ես։ Ցանկանո՞ւմ ես, որ մարդիկ քեզ ճանաչեն ինչպես Եհովայի վկայի։ Ուրեմն այդ մասին զրուցիր ծնողներիդ հետ։ Նրանք կարող են քեզ հետ միասին դիմել երեցներին՝ տեսնելու, թե արդյոք համապատասխանում ես քարոզիչ դառնալու պահանջներին (տե՛ս «Մեր ծառայությունը» գիրքը, էջ 98, 99, ռուս.)։

⁶ Օգնենք ուրիշներին, որ քարոզեն։ Աստվածաշունչն ուսումնասիրող այն անձինք, ովքեր հոգևոր առաջադիմություններ են կատարում, հատուկ գործունեության այդ ամիսներին միգուցե մեզ միանան՝ որպես բարի լուրի քարոզիչներ։ Եթե դու ուսումնասիրում ես ինչ–​որ մեկի հետ, ում մոտ հոգևոր լավ առաջադիմություն է նկատվում, ապա օգնության համար դիմիր Գրքի ուսումնասիրության վերակացուին կամ ծառայողական վերակացուին։ Նրանցից մեկը կարող է քեզ հետ ներկա գտնվել ուսումնասիրությանը՝ գնահատելու համար ուսումնասիրողի առաջադիմությունը։ Եթե անհատը համապատասխանում է անհրաժեշտ պահանջներին և ցանկանում է քարոզիչ դառնալ, ապա նախագահող վերակացուն կարող է միջոցներ ձեռնարկել, որ երկու երեց հանդիպեն քեզ և ուսումնասիրողի հետ (տե՛ս «Դիտարանի» 1989–ի սեպտեմբերի 15–ի համարը, էջ 14, ռուս.)։ Երբ ուսումնասիրողը քարոզիչ դառնալու հավանություն ստանա, անմիջապես սկսիր նրան քարոզել սովորեցնել։

⁷ Գրքի ուսումնասիրության վերակացուները պետք է հատուկ ուշադրություն դարձնեն իրենց խմբի ոչ ակտիվ կամ ոչ կանոնավոր քարոզիչներին։ Հրավիրիր նրանց անձամբ քեզ հետ քարոզչական ծառայության գնալ։ Եթե նրանք վաղուց են ոչ ակտիվ, խորհուրդ է տրվում, որ երկու երեց զրուցեն նրանց հետ՝ տեսնելու համար, թե արդյոք համապատասխանում են քարոզչի պահանջներին (տե՛ս «Մեր թագավորական ծառայությունը», 2000 թ., նոյեմբեր, «Հարցերի արկղ»)։ Հատուկ գործունեության այս ամիսներին ժողովի ցուցաբերած եռանդը գուցե խրախուսի նրանց կանոնավորաբար քարոզչական ծառայությանը մասնակցելը կրկին իրենց կյանքի անբաժան մասը դարձնել։

⁸ Արդեն հիմա պատրաստվենք ընդարձակել ծառայությունը։ Երեցնե՛ր, արդեն հիմա սկսեք խանդավառություն առաջացնել ժողովի անդամների մեջ ենթառահվիրայական ծառայության հանդեպ։ Դուք շատ բան կարող եք անել ձեր ոգևորիչ խոսքերով և լավ օրինակով (Ա Պետ. 5։3)։ Ժողովում գրանցված ենթառահվիրաների վերջին մեծագույն թիվը ո՞րն է եղել։ Հնարավո՞ր է այս տարի գերազանցել այդ թիվը։ Գրքի ուսումնասիրության վերակացուները և նրանց օգնականները պետք է միջոցներ փնտրեն խրախուսելու համար իրենց խմբի բոլոր անդամներին, որպեսզի նրանք ընդարձակեն ծառայությունը։ Ծառայողական վերակացուները կարող են քարոզչական ծառայության լրացուցիչ հանդիպումներ կազմակերպել։ Նախապես տեղյակ պահեք ժողովին ծրագրված միջոցառումների մասին։ Հետևեք, որ այդ հանդիպումների անցկացման համար հմուտ քարոզիչներ նշանակվեն, և որ դրանք ժամանակին սկսվեն ու ավարտվեն (տե՛ս «Մեր թագավորական ծառայությունը», 2001 թ., սեպտեմբեր, «Հարցերի արկղ»)։ Ծառայողական վերակացուն պետք է նաև հոգ տանի, որպեսզի քարոզչական ծառայության հանդիպումներին բավականաչափ տարածքներ, պարբերագրեր և գրականություն լինեն։

⁹ Անցած տարի մի ժողովում երեցները խանդավառորեն և բավականին վաղ սկսեցին խրախուսել քարոզիչներին ծառայելու որպես ենթառահվիրաներ, և նրանցից մի քանիսը ենթառահվիրայության դիմում լրացրեցին։ Նրանք քարոզչական ծառայության լրացուցիչ հանդիպումներ կազմակերպեցին. առաջինը՝ առավոտյան ժամը 5։30–ին՝ փողոցի վկայության համար, երկրորդը՝ կեսօրից հետո՝ ժամը 15։00–ին, որպեսզի դպրոցից վերադարձող քարոզիչներն էլ կարողանան մասնակցել, և երրորդը՝ ժամը 18։00–ին աշխատանքից վերադարձողների համար։ Բացի այդ, շաբաթ օրերի համար քարոզչական ծառայության երեք հանդիպումներ կազմակերպվեցին։ Այս ամենին ժողովը պատասխանեց նրանով, որ 66 քարոզիչներ ապրիլ ամսին ծառայեցին որպես ենթառահվիրա։

¹⁰ Ինչո՞ւ ձեր հաջորդ ընտանեկան ուսումնասիրությանը ժամանակ չհատկացնեք՝ խոսելու այն մասին, թե ինչ հասանելի նպատակներ կարող եք դնել ձեր առջև գալիք ամիսների համար։ Լավ համագործակցության և պլանավորման շնորհիվ ընտանիքի անդամներից մի քանիսը կամ թերևս բոլորը կարողանան ծառայել որպես ենթառահվիրա։ Եթե դա հնարավոր չէ, ապա նպատակ դրեք ավելի երկար ծառայել այն օրերին, երբ սովորաբար դուք գնում եք ծառայության, կամ էլ այլ առիթներով ևս ծառայել։ Աղոթեք այս մասին ընտանիքով։ Վստահ եղեք, որ Եհովան կօրհնի ձեր ջանքերը (Ա Յովհ. 3։22)։

¹¹ Աստծո արած ամենահրաշալի գործը։ Եհովայի սիրո ամենամեծ արտահայտումը մեզ համար իր Որդուն որպես փրկանք տալու պարգևն է (Ա Յովհ. 4։9, 10)։ Քավիչ զոհաբերությունը օրինական հիմք է տալիս մարդկությանը մեղքից ու մահից ազատելու համար (Հռովմ. 3։23, 24)։ Հիսուսի թափած արյամբ ուժի մեջ մտավ նոր ուխտը և հնարավորություն բացեց անկատար մարդկանց համար Աստծո որդիներ կոչվելու՝ երկնային Թագավորության կառավարիչները լինելու հեռանկարով (Երեմ. 31։31–34; Մարկ. 14։24)։ Իսկ ամենակարևորն այն է, որ Հիսուսի ցույց տված կատարյալ հնազանդությամբ սրբացվեց Եհովայի անունը (Բ Օրին. 32։4; Առակ. 27։11)։ Ամբողջ աշխարհում ապրիլի 4–ին՝ կիրակի օրը՝ արևամուտից հետո, կնշվի Քրիստոսի մահվան հիշատակը։

¹² Տերունական ընթրիքը նշելով՝ մենք մեծարում ենք Եհովայի հրաշալի գործերը։ Երեկոյին ներկայացվող ելույթը գնահատանք է առաջացնում մեր մեջ այն բանի համար, ինչ որ արել է Եհովան՝ փրկանքը տալով։ Ներկա եղող հետաքրքրվող անհատները ականատես կլինեն Աստծո հրաշալի այլ գործերի ևս։ Նրանք կտեսնեն այն միությունն ու ջերմ սերը, որ Եհովան սովորեցրել է իր ծառաներին, որպեսզի նրանք ցուցաբերեն (Եփես. 4։16, 22–24; Յակ. 3։17, 18)։ Այս կարևոր իրադարձությանը ներկա գտնվելը կարող է մեծ ազդեցություն գործել մարդկանց մտածելակերպի վրա, ուստի մենք ցանկանում ենք, որ հնարավորին չափ շատ մարդիկ ներկա լինեն (Բ Կորնթ. 5։14, 15)։

¹³ Հրավիրենք ուրիշներին, որպեսզի ներկա գտնվեն։ Արդեն հիմա սկսիր կազմել այն անձանց անունների ցանկը, որոնց հրավիրելու ես Երեկոյին։ Ցանկումդ պետք է ընդգրկվեն քո ընտանիքի ոչ Վկա անդամները, հարևաններդ, աշխատակիցներդ և համադասարանցիներդ, նրանք, որ մի ժամանակ ուսումնասիրել են Աստվածաշունչը կամ շարունակում են ուսումնասիրել, ինչպես նաև բոլոր նրանք, որոնց վերայցելում ես։ Գրքի ուսումնասիրության վերակացուներն իրենց ցանկում պետք է ընդգրկեն ոչ ակտիվ քարոզիչներին։

¹⁴ Օգտագործիր Հիշատակի երեկոյի հրավիրատոմսերը։ Հստակ գրիր կամ տպիր հրավիրատոմսերի վրա ձեր տեղանքում անցկացվելիք Երեկոյի ժամն ու վայրը։ Կամ գուցե ցանկանաս օգտագործել «Դիտարանի» 2004 թ. մարտի 15–ի համարի վերջին էջում տպագրված հրավերը։ Մինչ ապրիլի 4–ը մոտենում է, ցանկում ընդգրկվածներին հիշեցրու Հիշատակի երեկոյի մասին՝ անձամբ նրանց այցելելով կամ զանգահարելով։

¹⁵ Հիշատակի երեկոյի ընթացքում։ Աշխատիր Հիշատակի երեկոյի օրը վաղօրոք գալ սրահ։ Հյուրընկալ եղիր՝ ջերմորեն ողջունելով նորերին (Հռովմ. 12։13)։ Դու հատուկ պատասխանատվություն ես կրում նրանց համար, ում ինքդ ես հրավիրել։ Ուրախությամբ ողջունիր նրանց և ծանոթացրու ժողովի մյուս անդամների հետ։ Գուցե օգնես նրանց քո կողքին տեղ զբաղեցնել։ Իսկ եթե նրանցից որևէ մեկը Աստվածաշունչ կամ երգարան չունի, գուցե առաջարկես քեզ հետ կամ մեկ ուրիշի հետ միասին հետևել։ Ծրագրից հետո պատրաստ եղիր պատասխանել նրանց հետաքրքրող բոլոր հարցերին։ Եթե ոմանք առաջին անգամ են ներկա այս միջոցառմանը, տեղեկացիր, թե արդյոք չե՞ն ցանկանա ավելի շատ բան սովորել Աստծո Խոսքի ու նրա նպատակների մասին։ Աստվածաշնչի տնային ուսումնասիրություն առաջարկիր նրանց։

¹⁶ Հետագա օգնություն ցույց տուր նրանց, ովքեր ներկա են եղել Հիշատակի երեկոյին։ Հիշատակի երեկոյին հաջորդող շաբաթներին այս միջոցառմանը ներկա եղածները գուցե հետագա օգնության կարիք ունենան։ Դա կարող են լինել նրանք, ովքեր մի ժամանակ կանոնավորաբար հաճախել են ժողովի հանդիպումներին, բայց այժմ ավելի քիչ են համագործակցում ժողովի հետ։ Երեցները պետք է ուշադիր լինեն, որ այդ անհատները անուշադրության չմատնվեն, և փորձեն իմանալ, թե որն է պատճառը, որ նրանք հոգևորապես չեն առաջադիմում։ Օգնիր նրանց հասկանալ, որ օրհասական ժամանակներում ենք ապրում (Ա Պետ. 4։7)։ Բացատրիր նրանց, թե ինչ օգուտներ ենք ստանում՝ Աստվածաշնչի նախազգուշացմանը ենթարկվելով, այն է՝ կանոնավորապես հավաքվել Աստծո ժողովրդի հետ (Եբր. 10։24, 25)։

¹⁷ Եհովայի գործերն այնչափ հրաշալի են, որ դրանք ամբողջությամբ ըմբռնելու համար նույնիսկ հավիտենական կյանքը բավական չէ (Յոբ 42։2, 3; Ժող. 3։11)։ Հետևաբար միշտ էլ կլինեն բաներ, որոնց համար կփառաբանենք նրան։ Այս տարի Հիշատակի երեկոյին նախորդող և հաջորդող շրջանում մեր երախտագիտությունը ցույց կտանք Եհովայի հրաշալի գործերի համար՝ մեր ծառայությունն ընդարձակելու նպատակով հատուկ ջանքեր գործադրելով։

[Հարցեր ուսումնասիրության համար]

1. Որո՞նք են Եհովայի հրաշալի գործերից մի քանիսը, որոնք հատկապես գնահատելի են քեզ համար։

2. Ի՞նչ օգուտներ ենք քաղում անձամբ մենք, երբ ծառայում ենք որպես ենթառահվիրա։

3. Ինչպե՞ս է ոմանց հաջողվել ծառայել որպես ենթառահվիրա նույնիսկ դժվարին հանգամանքներում։

4. Ի՞նչ հանգամանքներ պետք է հաշվի առնենք ենթառահվիրայական ծառայության գրաֆիկ կազմելիս։

5. Ի՞նչ նպատակներ կարող են դնել իրենց առջև պատանիները մարտ, ապրիլ և մայիս ամիսներին։

6. Ինչպե՞ս կարող ենք օգնել Աստվածաշունչն ուսումնասիրող անհատներին բարի լուրի քարոզիչ դառնալ։

7. Ինչպե՞ս կարելի է օգնել ոչ կանոնավոր և ոչ ակտիվ քարոզիչներին։

8, 9. Ի՞նչ կարող են անել երեցները, որպեսզի խանդավառություն առաջացնեն ժողովի անդամների մեջ այս հատուկ գործունեության հանդեպ։

10. Ինչպե՞ս կարող են ընտանիքները պատրաստվել ծառայությունն ընդարձակելու։

11. ա) Ի՞նչ հրաշալի բաներ ի կատար ածվեցին Քրիստոսի զոհաբերության շնորհիվ։ բ) Ե՞րբ և որտե՞ղ է անցկացվելու ձեր տեղանքում Հիշատակի երեկոն։

12. Տերունական ընթրիքին ներկա գտնվելով՝ ի՞նչ օգուտներ կարող են քաղել հետաքրքրվող անհատները։

13, 14. Ո՞ւմ պետք է հրավիրենք Հիշատակի երեկոյին և ինչպե՞ս։

15. Ինչպե՞ս կարող ենք հյուրընկալություն ցույց տալ Հիշատակի երեկոյի ընթացքում։

16. Ինչպե՞ս կարելի է օգնել Հիշատակի երեկոյին ներկա գտնվածներին հոգևորապես առաջադիմել։

17. Ինչո՞ւ պետք է շարունակենք պատմել Եհովայի հրաշալի գործերի մասին։