Կիրառո՞ւմ եք այն, ինչ սովորեցիք «Աստծո Խոսքն ուսուցանողները» մարզային համաժողովի ժամանակ

¹ Յուրաքանչյուր ոք, ով ներկա է գտնվել այս տարի անցկացվող մարզային համաժողովին, կարող էր նկատել, որ Եհովայի ժողովուրդը լի է վճռականությամբ՝ կատարելու իր առաջադրանքը՝ ուսուցանել Աստծո Խոսքը (Մատթ. 28։19, 20)։ Համաժողովից տուն վերադառնալով՝ հատկապես ո՞ր խորհուրդները ձգտեցիք կիրառել ձեր կյանքում և ծառայության մեջ։

² Ներշնչված գրություններն օգտակար են ուսուցման համար։ Առաջին օրվա թեման հիմնված էր Բ Տիմոթէոս 3։16–ի վրա։ Գլխավոր թեմայում, որի խորագիրն էր «Ամբողջովին պատրաստված ենք՝ որպես Աստծո Խոսքն ուսուցանողներ», ընդգծվեց, որ մենք պետք է բարձր գնահատենք Աստծո Խոսքը, այն վեր դասենք մարդկային գաղափարներից ու ավանդություններից և այն միշտ կիրառենք մեր կյանքում։ Հարկավոր է նաև ամեն օր աղոթել՝ խնդրելով սուրբ ոգին, որը կօգնի մեզ քարոզել և զարգացնել ոգու ամենակարևոր հատկությունը՝ սերը։ Ինչպես նաև անհրաժեշտ է հաճախել ժողովի բոլոր հանդիպումներին, որպեսզի կրթվենք Եհովայի երկրային կազմակերպության միջոցով։

³ Հուրախություն մեզ, առավոտյան ծրագրի ավարտին ստացանք «Քրիստոնեական հունարեն գրությունների Նոր աշխարհ թարգմանությունը» ռուսերեն լեզվով։ Այժմ այս հրատարակությունը հաճույքով օգտագործում ենք ծառայության մեջ, ժողովի հանդիպումների և անձնական ուսումնասիրության ժամանակ։ Որքա՜ն հաճելի է յուրաքանչյուր օր կիրառել Աստծո խոսքի այս ժամանակակից և ճշգրիտ թարգմանությունը։

⁴ «Ուսուցանելով մարդկանց՝ սովորում ենք....» թեմաների շարքում խոսվեց այն մասին, թե որքան կարևոր է օրինակելի լինել հետևյալում՝ 1) հիշելով քրիստոնեական բարձր վարքի մասին՝ ամեն հարցում առաջնորդվել Աստծո օրենքներով, 2) կանոնավորաբար ու ջանադրաբար ուսումնասիրել Աստվածաշունչը և 3) արմատախիլ անել այնպիսի հակումներն ու մտայնությունը, որոնք Բանսարկուն կարող է օգտագործել իր նպատակների համար։ Այնուհետև լսեցինք օգտակար խորհուրդներ այն մասին, թե ինչպես պահպանենք մեր ընտանիքի անդամներին այնպիսի «ժանտախտից», ինչպիսին պոռնկագրությունն է։ Ծնողներին խրախուսեցին օրինակ հանդիսանալ և խուսափել նույնիսկ մի ակնթարթ անգամ սեռային դրվագներին նայելուց, ինչպես նաև հետևել, թե երեխաներն ինչպես են օգտվում Ինտերնետից և ինչ են դիտում հեռուստատեսությամբ։ Ուրբաթ օրվա ծրագրում ընդգրկված թեմաների ո՞ր խորհուրդներն եք արդեն կիրառում։

⁵ Ուրբաթ օրվա վերջին թեման մեզ վճռականություն հաղորդեց գնահատելու Եհովայի տված լույսը՝ սերտորեն համագործակցելով Աստծո հավատարիմ օծյալների հետ և նպաստել Աստծո ժողովրդի մեջ տիրող խաղաղությանը։ Արդեն կարդացե՞լ եք «Եսայիայի մարգարեությունը. լույս ողջ մարդկության համար» նոր գրքի երկրորդ հատորը։

⁶ Որակելի ենք մյուսներին սովորեցնելու համար։ Երկրորդ օրվա թեման հիմնված էր Բ Տիմոթէոս 2։2–ի վրա։ Առավոտյան ծրագրում լսելով թեմաների շարքը՝ ուշադրություն դարձրի՞ք, թե ինչպես 1) փնտրել արժանիներին, 2) զարգացնել նրանց հետաքրքրությունը և 3) սովորեցնել նրանց պահել այն, ինչ որ պատվիրեց Քրիստոսը։ Կիրառո՞ւմ եք այն խորհուրդը, որ ծառայության ժամանակ Աստվածաշնչից առնվազն մեկ համար ընթերցեք ունկնդրին և հիմք ստեղծեք վերայցելությունների համար։

⁷ Հետճաշյա ծրագրում նշվեց, թե որքան կարևոր է ընդօրինակել Մեծագույն ուսուցչին՝ Հիսուս Քրիստոսին։ Հատկապես ինչո՞ւմ եք ձգտում ընդօրինակել նրան։ Իսկ ի՞նչ սովորեցիք այդ օրվա՝ «Թող աստվածապետական կրթությունը ձեզ է՛լ ավելի մեծ օգուտներ բերի» խորագիրը կրող թեմաների երկրորդ շարքից։ Ինչպիսի՞ խորհուրդներ եք կիրառել, որպեսզի ավելի լավ կենտրոնանաք անձնական ուսումնասիրության և ժողովի հանդիպումների ժամանակ։

⁸ Անտարակույս, թողարկման պատրաստվող «Սովորում ենք Աստվածապետական ծառայության դպրոցում» գիրքը կօգնի մեզ զարգացնել մեր հռետորական հմտությունները և դառնալ Աստծո Խոսքի լավագույն ուսուցիչներ։ Գրքում մեծ ուշադրություն է դարձվում աստվածաշնչյան ժամանակներում ապրած Աստծո հավատարիմ ծառաների հռետորական հատկությունների վրա, որոնցով նրանք աչքի էին ընկնում։ Նոր ձեռնարկի բոլոր դասերում շրջանակներ կան, որոնցում համառոտակի բացատրվում է, թե ինչ է հարկավոր անել, ինչպես անել և ինչու է դա կարևոր։ Կան նաև վարժություններ։ Քույրերին՝ առաջադրանքներ պատրաստելու համար ներկայացված է 29 պայմանական իրադրություն։ Ժամանակի ընթացքում Դպրոցն անցկացնելու կարգի մեջ փոփոխություններ կմտցվեն, որոնց մասին խոսվեց համաժողովի ժամանակ։ Ունե՞ք արդյոք ուսումնասիրության և ժողովներին նախապատրաստվելու լավ օրակարգ, որի շնորհիվ մեծ օգուտներ եք քաղում ամեն շաբաթ անցկացվող Աստվածապետական ծառայության դպրոցից։

⁹ Ժամանակին նայելով՝ պիտի ուսուցիչներ լինենք։ Եբրայեցիս 5։12 համարը զարկ տվեց համաժողովի երրորդ՝ կիրակի օրվան։ Առավոտվա թեմաների շարքը, որ կրում էր «Մաղաքիայի մարգարեությունը մեզ պատրաստում է Եհովայի օրվան» խորագիրը, մեզ խրախուսեց Աստծուն տալ լավագույնը և ատել հավատուրացության ցանկացած ձև. չէ՞ որ միայն այդ դեպքում կկարողանանք վերապրել Եհովայի մեծ ու ահեղ օրը։ «Հարգիր Եհովայի իշխանությունը» դրաման համոզիչ կերպով ցույց տվեց, թե ինչպես հնում գոռոզությունը, փառասիրությունը, նախանձն ու կեղծ հավատարմությունը Կորխին ու նրա համախոհներին բերեցին դեպի բաց ըմբոստություն Աստծո դեմ։ Դրամային հաջորդած թեման մեր ուշադրությունը կենտրոնացրեց ընտանիքում և ժողովում Աստծո կողմից կարգադրված իշխանությանը այսօր ենթարկվելու կարևորության վրա։ «Ո՞վ է բոլոր ազգերին սովորեցնում ճշմարտությունը» հանրային ելույթը փաստեր ներկայացրեց այն մասին, որ աստվածաշնչյան ճշմարտությունը սովորեցնում են Եհովայի վկաները, և ոչ՝ քրիստոնեական աշխարհը, որը միայն պնդում է, թե սովորեցնում է։

¹⁰ Ակնհայտ է, որ Եհովան մեզ կրթում է, որպեսզի կարողանանք մյուսներին ավելի լավ ուսուցանել նրա Խոսքը։ Եկեք, ուրեմն, կիրառենք նրա բոլոր խորհուրդները՝ ուշադիր լինելով թե՛ մեր և թե՛ այն բանի նկատմամբ, թե ինչպես ենք սովորեցնում, որպեսզի փրկենք և՛ մեզ, և՛ նրանց, որ լսում են մեզ (Ա Տիմոթ. 4։16, ՆԿ–ի ՆԱԹ)։