Ուրախություն ստանալ՝ ծառայելով լիաժամ

¹ Լինելով երիտասարդ՝ անշուշտ մտածում ես քո ապագայի մասին։ Առակաց 21։5–ը ասում է, որ «աշխատասէր մարդուն ծրագիրները իրաւամբ առատութիւն կը բերեն» (Արևմտ. Աստ.)։ Դա քեզ միայն օգուտ կբերի, եթե լրջորեն մտածես, թե ինչ նպատակներ ես ուզում դնել կյանքում։ Ապագայի համար ծրագրեր կազմելիս մտածիր լիաժամ ծառայություն սկսելու մասին։ Ինչո՞ւ։

² Եթե մեծահասակ քույր–​եղբայրներին, ովքեր երիտասարդ տարիներին ռահվիրա են ծառայել, խնդրես պատմել իրենց ծառայությունից, անշուշտ նմանատիպ արձագանք կլսես. «Դրանք իմ կյանքի լավագույն տարիներն են եղել»։ Տարիքն առած մի եղբայր, որը դեռ երիտասարդ տարիներից էր ճաշակել լիաժամ ծառայության ուրախությունը, ասաց. «Երբ ետ ես նայում երիտասարդությանդ տարիներին, բավականության մեծ զգացում ես ապրում, քանի որ կարող ես ասել, որ ականջ ես դրել իմաստուն խորհրդին. «Յիշիր քո ստեղծողին քո երիտասարդութեան օրերումը»» (Ժող. 12։1)։ Այժմ հարկավոր է, որ ծնողներիդ հետ միասին ուշադրությամբ պլանավորես, որոշես, թե ինչ կարելի է անել, որպեսզի երիտասարդության տարիները քեզ համար էլ ուրախության աղբյուր դառնան։

³ Ծնողնե՛ր, ձեր երեխաներին խրախուսեք լիաժամ ծառայության։ Եհովան, լինելով հոգատար Հայր, ցույց է տալիս, թե որ ճանապարհով պետք է ընթանաք (Ես. 30։21)։ Նման սիրալիր առաջնորդություն ցույց տալով՝ նա հիանալի օրինակ է ձեզ՝ քրիստոնյա ծնողներիդ համար։ Ընտրությունը ձեր երեխաներին թողնելու փոխարեն, թե որն է իրենց համար լավագույն ճանապարհը՝ իմաստնորեն սովորեցրեք նրանց քայլել այն ճանապարհով, որտեղ կունենան Եհովայի օրհնությունները։ Այնուհետև, երբ նրանք չափահաս դառնան, ձեր տված կրթությունը կօգնի նրանց «լաւը եւ վատը որոշելու» (Եբր. 5։14)։ Մեծահասակները իրենց փորձից գիտեն, որ սխալ է վստահել սեփական դատողությանը. հարկավոր է ապավինել Եհովային, որ նա ուղղի իրենց ճանապարհները (Առակ. 3։5, 6)։ Սա առավել կարևոր է երիտասարդների համար, քանի որ նրանք քիչ փորձառու են։

⁴ Ծնողնե՛ր, մինչ ձեր երեխաները մոտենում են պատանեկության տարիքին, խոսեք հետագայում մասնագիտություն ձեռք բերելու իրենց նպատակների մասին։ Հնարավոր է՝ ուսուցիչներն ու համադասարանցիները փորձեն ազդեցություն բանեցնել նրանց վրա՝ աշխարհիկ, նյութապաշտական ընթացք բռնելու։ Օգնեք ձեր զավակներին որևէ մասնագիտական դասընթաց ընտրելու, որը գործնական ուսուցում կտա և կպատրաստի նրանց հոգալու իրենց նյութական կարիքները՝ առանց զոհաբերելու Թագավորության շահերը (Ա Տիմոթ. 6։6–11)։ Շատ դեպքերում միջնակարգ կրթությունը մասնագիտական կրթության (կամ արհեստ սովորելու) հետ միասին կարող է բավական լինել առօրյա կարիքները հոգալու և որպես կանոնավոր ռահվիրա ծառայելու համար։

⁵ Քաջալերեք երիտասարդներին գնահատել իրենց ամուրիության առավելությունը։ Երբ հետագայում նրանք որոշեն ամուսնանալ, ավելի պատրաստ կլինեն կատարելու ամուսնական դժվար պարտականությունները (տե՛ս «Մեր թագավորական ծառայությունը» թերթիկի 2001 թ. հունիսի համարի ներդիրում «Կարո՞ղ եք ներկայացնել ձեր թեկնածությունը» հոդվածի 19–րդ պարբերությունը)։ Դրականորեն խոսելով ծառայության այնպիսի տեսակների մասին, ինչպիսիք են՝ ռահվիրայական ծառայությունը, ծառայությունն այնտեղ, որտեղ ավելի շատ պահանջ կա, ինչպես նաև Բեթելի և միսիոներական ծառայությունները՝ երիտասարդների մեջ դեռ վաղ հասակից ցանկություն արթնացրեք իրենց կյանքի տարիներն այնպես օգտագործելու, որ հաճեցնեն Եհովային, օգտակար լինեն ուրիշներին և ուրախություն պարգևեն հենց իրենց։

⁶ Երիտասարդնե՛ր, առաջնությունը տվեք լիաժամ ծառայությանը։ Երիտասարդնե՛ր, կարիք չկա ռահվիրայական ծառայություն վերցնելու մասին չափից շատ մտահոգվելու։ Դուք կարող եք փորձել այն՝ ծառայելով որպես ենթառահվիրա, երբ հնարավոր լինի՝ ուսումնական տարվա ընթացքում կամ էլ արձակուրդներին։ Այդ ժամանակ կհասկանաք, թե իրականում ինչ մեծ բավականություն է պատճառում այդ տեսակ ծառայությունը։ Կարո՞ղ եք պլանավորել և, հիմիկվանից սկսելով, մինչև ամառվա վերջը ծառայել որպես ենթառահվիրա։

⁷ Եթե երիտասարդ եղբայր ես, լրջորեն մտածիր նաև ծառայողական օգնական դառնալու մասին և ձգտիր դրա համար անհրաժեշտ հատկություններ մշակել (Ա Տիմոթ. 3։8–10, 12)։ Բացի այդ, մտածիր այն մասին, որ երբ տարիքդ լրանա, կցանկանայի՞ր արդյոք ծառայել Բեթելում կամ սովորել Ծառայության կատարելագործման դպրոցում։ Ռահվիրայական ծառայության մեջ ձեռք բերված փորձը արժեքավոր դաս կլինի քեզ համար. դու կսովորես օրվա գրաֆիկ կազմել և ապրել դրա համաձայն, ավելի կազմակերպված դառնալ, լավ հարաբերություններ պահպանել ուրիշների հետ և պատասխանատվության զգացում զարգացնել։ Այս ամենը անելով՝ դու պատրաստ կլինես հետագայում ծառայության մեջ ավելի մեծ առանձնաշնորհումներ ստանձնելու։

⁸ Լիաժամ ծառայության մեջ հաջողության հասնելու համար կարևոր գործոն է աշխատասիրությունը։ Պողոս առաքյալը քաջալերեց ջանասեր լինել և նշեց դրա արդյունքում սպասվող օրհնությունների մասին. «Ինչ որ անէք, արէք սրտա՛նց, որպէս թէ Տիրոջ համար էք անում.... Իմացէ՛ք, որ Տիրոջից պիտի ստանաք ձեր.... հատուցումը» (Կող. 3։23, 24)։ Թող որ Եհովան օրհնի ձեզ լիաժամ ծառայության մեջ՝ ամեն ժամանակ ձեր սրտերը լցնելով ուրախության զգացումով։