«Սիրեցէք Տիրոջը, ով նորա ամեն սուրբեր» Հիսուսի մահը պետք է նշվի ապրիլի չորսին
1 Տարիներ առաջ, երբ Ուկրաինան դեռ գտնվում էր կոմունիստական ղեկավարության տակ, իշխանությունները խստորեն հետևում էին եղբայրներին։ Դա նրանք անում էին հատկապես այն ժամանակ, երբ մոտենում էր Տերունական ընթրիքը՝ հուսալով իմանալ Վկաների հավաքույթների վայրը։ Այս իրողությունը միշտ խնդիրներ էր հարուցում, որովհետև իշխանությունները գիտեին Հիշատակի երեկոյի մոտավոր ժամանակը։ Ի՞նչ պետք է անեին եղբայրները։ Քույրերից մեկի տան նկուղը ջուր էր լցվել։ Եվ քանի որ իշխանությունները չէին ակնկալում, որ մարդիկ կարող են այնտեղ հավաքվել, եղբայրները մինչև ծնկները հասնող ջրի մակերևույթից մի քիչ բարձր, փոքրիկ հարթակ պատրաստեցին։ Թեև հարկ եղավ ցածր առաստաղի տակ հարթակի վրա կռացած նստել, սակայն ոչ ոք չխանգարեց, որ ժողովը ուրախությամբ նշի Հիշատակի երեկոն։
2 Ուկրաինայի եղբայրների վճռականությունը Հիսուսի մահը նշելու պատվերին հնազանդվելու հարցում հիանալի կերպով ցույց է տալիս Աստծո հանդեպ ունեցած նրանց սերը (Ղուկ. 22։19; Ա Յովհ. 5։3)։ Եթե մեր կյանքում ունենք դժվարություններ, ուրեմն, եկեք նման օրինակներից քաջալերություն ստանանք և վճռենք ապրիլի չորսին ներկա լինել Տերունական ընթրիքին։ Այդպես վարվելով՝ մենք ցույց կտանք, որ ունենք այն նույն զգացումները, որ ուներ սաղմոսերգուն, երբ երգեց. «Սիրեցէք Տիրոջը, ով նորա ամեն սուրբեր» (Սաղ. 31։23)։
3 Օգնենք ուրիշներին ավելի շատ սիրել Աստծուն։ Աստծո հանդեպ ունեցած սերը մղում է մեզ հրավիրել նաև ուրիշներին, որպեսզի մեզ հետ նշեն Հիսուսի մահվան հիշատակը։ Փետրվար ամսվա «Մեր թագավորական ծառայությունը» թերթիկի ներդիրում հորդոր էր տրվում մեզանից յուրաքանչյուրին կազմել այն անհատների ցուցակը, որոնց ցանկանում ենք հրավիրել Հիշատակի երեկոյին։ Ջանքեր գործադրո՞ւմ ես՝ հրավիրելու քո ցուցակում գտնվողներից յուրաքանչյուրին։ Ժամանակ հատկացրու՝ նրանց բացատրելու, թե ինչ նշանակություն ունի Հիշատակի երեկոն։ Նրբանկատորեն հիշեցրու Երեկոյի օրն ու ժամը։ Եթե հարմար է, առաջարկիր ընկերակցել նրանց. նման վարվելակերպով գուցե խրախուսես նրանց ներկա գտնվել։
4 Հավաքույթի վայրում հատուկ ջանքեր գործադրիր՝ ողջունելու բոլոր նրանց, ովքեր ընդունել են մեր հրավերը։ Փորձիր այնպես անել, որ իրենք իրենց օտար չզգան։ Ինչպես կարո՞ղ ես օգնել նրանց ավելի շատ սիրել Եհովային։ Պատրաստ եղիր պատասխանելու նրանց հարցերին, ինչպես նաև, եթե հարմար է, Աստվածաշնչի ուսումնասիրություն առաջարկիր։ Հրավիրիր ներկա գտնվել ամեն շաբաթ անցկացվող մեր ժողովի հանդիպումներին։ Հատկապես երեցները պետք է ուշադիր լինեն իրադարձությանը ներկա եղող ոչ ակտիվ քարոզիչների նկատմամբ։ Նրանք կարող են միջոցներ ձեռնարկել այցելելու ոչ ակտիվ քարոզիչներին և քաջալերել նրանց, որպեսզի վերականգնեն իրենց ծառայությունը։ Երեցները կարող են դա անել՝ թերևս ավելի մանրամասն քննարկելով այն մտքերը, որոնց մասին խոսվել է Հիշատակի երեկոյի ելույթի ժամանակ (Հռովմ. 5։6–8)։
5 Խորացնենք մե՛ր սերը Եհովայի հանդեպ։ Լրջորեն մտածելով փրկանքի պարգևի մասին՝ մենք կարող ենք խորացնել մե՛ր սերը, որ ունենք Եհովա Աստծո և նրա Որդու հանդեպ (Բ Կորնթ. 5։14, 15)։ Երկար տարիներ Հիշատակի երեկոյին այցելած մի անհատ հետևյալն ասաց. «Այժմ մենք սպասո՛ւմ ենք Հիշատակի երեկոյին։ Ամեն տարի այն ավելի առանձնահատուկ է դառնում մեզ համար։ Ես հիշում եմ, երբ քսան տարի առաջ՝ սիրելի հայրիկիս թաղման ժամանակ, գերեզմանատանը կանգնած՝ նայում էի նրա անկենդան մարմնին, իսկական, անկեղծ գնահատանքով լցվեցի փրկանքի հանդեպ։ Մինչ այդ այն լոկ թեորիա էր ինձ համար։ Չէ՛, ես գիտեի փրկանքին վերաբերող բոլոր համարները, գիտեի նաև՝ ինչպես բացատրել դրանք, սակայն, երբ բախվեցի մահվան դառը իրականությանը ու մտածեցի, թե որքան շատ բան է իրականանալու թանկագին փրկանքի շնորհիվ, միայն այն ժամանակ սիրտս ուրախությունից թրթռաց» (Յովհ. 5։28, 29)։
6 Մինչ մոտենում է հիշարժան օրը, ժամանակ հատկացրեք պատրաստելու ձեր սիրտը այդ իրադարձության համար (Բ Մնաց. 19։3)։ Խոկացեք Տերունական ընթրիքի համար նախատեսված Աստվածաշնչի ընթերցանության նյութի շուրջ, որը գտնվում է 2004 թ. «Գրությունները քննենք ամեն օր» գրքույկում կամ նույն տարվա «Օրացույցի» մեջ։ Ոմանց համար հաճելի է եղել նաև ընտանեկան ուսումնասիրության ժամանակ կրկին աչքի անցկացնել «Մեծագոյն Մարդը» գրքի 112–116-րդ գլուխները (արևմտ.)։ Ուրիշներ էլ հավելյալ փնտրտուքներ են կատարել՝ օգտագործելով հավատարիմ և իմաստուն ծառա դասակարգի կողմից պատրաստված ուսումնասիրության այլ միջոցներ (Մատթ. 24։45–47)։ Բոլորս էլ կարող ենք փրկանքի պարգևը մեր սրտաբուխ աղոթքի առարկան դարձնել (Սաղ. 50։14, 23)։ Այո՛, թող որ Տերունական ընթրիքին նախորդող և հաջորդող ժամանակաշրջանում շարունակաբար խորհենք Եհովայի՝ մեր հանդեպ ունեցած սիրո մասին՝ կերպեր փնտրելով ցուցաբերելու նրա հանդեպ ունեցած մեր սերը (Մարկ. 12։30; Ա Յովհ. 4։10)։