Մաս 5—Աստվածաշնչի արդյունավետ ուսումնասիրություններ անցկացնենք
Որոշենք, թե ինչ ծավալի նյութ ենք ուսումնասիրելու
1 Իր աշակերտներին սովորեցնելիս Հիսուսը հաշվի էր առնում նրանց հնարավորությունները ու խոսում էր նրանց հետ այնչափ, «որչափ որ կրնային մտիկ ընել» (Մարկ. 4։33, ԱԱ; Յովհ. 16։12)։ Նույնպես էլ Աստծու Խոսքն ուսուցանողները պետք է որոշեն, թե Աստվածաշնչի ուսումնասիրության ժամանակ որքան նյութ կարող են անցնել։ Նյութի ծավալը կախված է թե՛ ուսուցանողի և թե՛ ուսումնասիրողի ընդունակություններից ու հանգամանքներից։
2 Օգնիր ամուր հավատ կերտել։ Որոշ ուսումնասիրողների հետ միևնույն նյութն անցնելու համար գուցե պահանջվի ընդամենը մեկ հանդիպում, այնինչ մյուսների հետ թերևս հարկ լինի անցկացնել երկու կամ երեք հանդիպում։ Ավելի կարևոր է այն, որ օգնենք ուսումնասիրողին պարզ հասկանալ քննարկվող նյութը և ոչ թե կարճ ժամանակում մեծ ծավալի նյութ անցնենք նրա հետ։ Յուրաքանչյուր ուսումնասիրող կարիք ունի, որ Աստծու Խոսքի հանդեպ իր նորաստեղծ հավատը ամուր հիմք ունենա (Առակ. 4։7; Հռովմ. 12։2)։
3 Շաբաթական ուսումնասիրությանը հատկացրու այնքան ժամանակ, որքան որ հարկավոր է ուսումնասիրողին՝ հասկանալու և սրտանց ընդունելու Աստծու Խոսքից սովորած ճշմարտությունները։ Խուսափիր ուսումնասիրությունը հապճեպորեն անցկացնելուց, քանի որ այդպես ուսումնասիրողը չի կարողանա լիարժեք օգուտներ քաղել քննարկվող նյութից։ Բավարար ժամանակ հատկացրու գլխավոր մտքերն ընդգծելուն, ինչպես նաև այն սուրբգրային համարները քննարկելուն, որոնք ուսմունքների հիմքն են (Բ Տիմոթ. 3։16, 17)։
4 Աշխատիր նյութից չշեղվել։ Մենք ցանկանում ենք խուսափել ոչ միայն հապճեպորեն ուսումնասիրելուց, այլև նյութից շեղվելուց։ Եթե ուսումնասիրողի մեջ անձնական թեմաներով ծավալուն զրույցներ անելու հակում ենք նկատում, կարող ենք առաջարկել ուսումնասիրությունից հետո զրուցել (Ժող. 3։1)։
5 Մյուս կողմից, ճշմարտության հանդեպ մեծ խանդավառություն ունենալով, գուցե մենք ուսումնասիրության ժամանակ չափազանց շատ խոսենք (Սաղ. 145։6, 7)։ Ճիշտ է, որևէ դեպք կամ օրինակ պատմելը կարող է հարստացնել ուսումնասիրությունը, սակայն ցանկալի չէ, որ դրանք այնքան շատ կամ այնքան երկար լինեն, որ խանգարեն ուսումնասիրողին ճշգրիտ գիտություն ստանալ աստվածաշնչյան հիմնական ուսմունքների մասին։
6 Յուրաքանչյուր ուսումնասիրության ժամանակ ուսումնասիրողի կարողություններին համապատասխան ծավալի նյութ անցնելով՝ կօգնենք նրան, որ ‘գնա Տիրոջ լույսով’ (Ես. 2։5)։