Մաս 9—Աստվածաշնչի արդյունավետ ուսումնասիրություններ անցկացնենք

Օգնենք ուսումնասիրողներին սովորել ոչ պաշտոնական վկայություն տալ

¹ Երբ Անդրեասն ու Փիլիպպոսը հասկացան, որ Հիսուսը խոստացված Մեսիան էր, ոչինչ ետ չպահեց նրանց այդ ոգևորիչ լուրը ուրիշներին հայտնելուց (Յովհ. 1։40–45)։ Նմանապես այսօր, երբ Աստվածաշունչ ուսումնասիրողները սկսում են հավատալ իրենց սովորած բաներին, նրանց մեջ այդ մասին պատմելու ցանկություն է առաջանում (Բ Կորնթ. 4։13)։ Ինչպե՞ս կարող ենք խրախուսել նրանց ոչ պաշտոնական վկայություն տալ և օգնել նրանց արդյունավետորեն դա անել։

² Դու կարող ես պարզապես հարցնել ուսումնասիրողին, թե արդյոք նա Աստվածաշնչից իր սովորած բաների մասին պատմում է ուրիշներին։ Թերևս նա կարող է հրավիրել իր ընկերներից կամ ընտանիքի անդամներից ոմանց ներկա լինելու ուսումնասիրությանը։ Հարցրու, թե նրա աշխատակիցներից, համադասարանցիներից կամ ծանոթներից որևէ մեկը հետաքրքրություն ցույց տվել է։ Այսպես նա կարող է սկսել վկայություն տալ։ Օգնիր նրան հասկանալ, որ Եհովա Աստծու և նրա նպատակների մասին ուրիշների հետ զրուցելիս հարկավոր է լինել խորաթափանց, հարգալից և բարյացակամ։

³ Պատմել հավատալիքների մասին։ Շատ կարևոր է Աստվածաշունչ ուսումնասիրողներին սովորեցնել, որ իրենց հավատալիքների մասին պատմելիս գործածեն Աստծու Խոսքը։ Ուսումնասիրության ժամանակ որոշ մտքեր քննարկելիս հարցրու ուսումնասիրողին. «Ինչպե՞ս կգործածեիր Աստվածաշունչը՝ այս ճշմարտությունը քո ընտանիքի անդամներին բացատրելու համար»։ Կամ հարցրու նրան. «Աստվածաշնչյան ո՞ր համարը կգործածեիր՝ ընկերոջդ համոզիչ կերպով ներկայացնելու այս ճշմարտությունը»։ Ուշադրություն դարձրու, թե ինչպես է նա արձագանքում, և ցույց տուր, թե ինչպես կարող է ուսուցանելիս հիմնվել Աստվածաշնչի վրա (Բ Տիմոթ. 2։15)։ Այդպես վարվելով՝ կօգնես ուսումնասիրողին ոչ պաշտոնական վկայություն տալ և հետագայում ժողովի հետ միասին մասնակցել քարոզչությանը, երբ նա համապատասխանի քարոզիչ լինելու պահանջներին։

⁴ Մեր կողմից իմաստուն քայլ կլինի օգնել ուսումնասիրողներին պատրաստ լինել դիմագրավելու հակառակությունները (Մատթ. 10։36; Ղուկ. 8։13; Բ Տիմոթ. 3։12)։ Երբ մարդիկ Եհովայի վկաների մասին ինչ–​որ բաներ ասեն կամ հարցեր տան, ուսումնասիրողները կարող են այդ առիթն օգտագործել վկայություն տալու համար։ «Եհովայի վկաներ. ովքե՞ր են, ինչի՞ն են հավատում» գրքույկը կարող է օգնել նրանց պատրաստ լինել «պատասխան տալու» (Ա Պետ. 3։15)։ Գրքույկը ճշգրիտ ինֆորմացիա է պարունակում, որի միջոցով ուսումնասիրողները կարող են օգնել իրենց ընկերներին և ընտանիքի անդամներին հասկանալու Աստվածաշնչի վրա հիմնված մեր հավատալիքները և գործունեության բնույթը։