Մաս 11—Աստվածաշնչի արդյունավետ ուսումնասիրություններ անցկացնենք

Օգնենք ուսումնասիրողներին վերայցելություններ կատարել

¹ Երբ ուսումնասիրողը սկսի մասնակցել քարոզչական գործին, նա կհանդիպի մարդկանց, ովքեր հետաքրքրություն ցույց կտան բարի լուրի հանդեպ։ Ինչպե՞ս կարող ենք օգնել այս նոր քարոզչին, որ արդյունավետորեն կրկնակի այցելություններ կատարի և զարգացնի մարդկանց ցույց տված հետաքրքրությունը։

² Կրկնակի այցելությանը նախապատրաստվելը սկսվում է առաջին այցելության ժամանակ։ Խրախուսիր ուսումնասիրողին, որ անկեղծ հետաքրքրություն ցույց տա այն մարդկանց հանդեպ, որոնց հետ նա զրուցում է (Փիլիպ. 2։4)։ Քայլ առ քայլ սովորեցրու ուսումնասիրողին, թե ինչպես նա կարող է հարցնել տանտիրոջ կարծիքը, լսել նրա պատասխանը և փորձել հասկանալ, թե ինչ հարցեր են նրան մտահոգում։ Երբ ինչ–​որ մեկը հետաքրքրություն է ցույց տալիս, նոր քարոզիչը թող գրի առնի այդ այցելության վերաբերյալ անհրաժեշտ տեղեկությունները։ Այդ տեղեկությունների միջոցով օգնիր նրան նախապատրաստվել հետագա քննարկումներին։

³ Նախապատրաստվել վերայցելությանը։ Միասին վերհիշեք առաջին զրույցը, և ցույց տուր ուսումնասիրողին, թե ինչպես կարելի է ընտրել Թագավորության լուրի հետ կապված մի միտք, որը կհետաքրքրի տանտիրոջը (Ա Կորնթ. 9։19–23)։ Պատրաստեք մի կարճ մատուցում, որի մեջ ընդգրկված են մի սուրբգրային համար և ուսումնասիրության ինչ–​որ ձեռնարկից մի պարբերություն։ Բացի այդ, պատրաստեք մի հարց, որը կարելի է բարձրացնել քննարկման վերջում՝ հաջորդ այցելության համար հիմք նախապատրաստելու նպատակով։ Ցույց տուր նոր քարոզչին, թե ինչպես կարելի է յուրաքանչյուր հաջորդ այցելության ժամանակ ավելացնել տանտիրոջ գիտելիքները Աստծու Խոսքի վերաբերյալ։

⁴ Նաև օգտակար կլինի ուսումնասիրողին սովորեցնել զրույցի մի պարզ նախաբան։ Տանտիրոջը ողջունելուց հետո նա կարող է ասել. «Ինձ դուր եկավ մեր նախորդ զրույցը, և ես նորից եկել եմ, որպեսզի Աստվածաշնչից ավելի շատ տեղեկություն հայտնեմ [հիշատակիր թեման] մասին»։ Գուցե նաև կարիք լինի ցույց տալ նոր քարոզչին, թե ինչ կարելի է ասել, եթե դուռը մեկ ուրիշ անհատ բաց անի։

⁵ Ժրաջան եղիր վերայցելություններ կատարելու մեջ։ Խրախուսիր ուսումնասիրողին, որ լավ օրինակ լինի հետաքրքրություն ցույց տված բոլոր անհատներին առանց հետաձգելու վերայցելելու մեջ։ Երբ տնետուն ծառայելիս հանդիպում ենք մարդկանց, գուցե հետևողականություն պահանջվի նրանց վերայցելելու համար։ Սովորեցրու ուսումնասիրողին, թե ինչպես կարող է պայմանավորվել հաջորդ այցելության համար, և օգնիր նրան հասկանալ, թե ինչու է անհրաժեշտ վերայցելել անհատին, ինչպես և խոստացել էր (Մատթ. 5։37)։ Սովորեցրու նոր քարոզչին լինել բարյացակամ, նրբանկատ և հարգալից, երբ նա ծառայության ժամանակ փնտրում է անկեղծ սրտով անհատների և զարգացնում է նրանց ցույց տված հետաքրքրությունը (Տիտոս 3։2)։