Աստվածաշնչի ուսումնասիրություններ անցկացնենք դռան առջև և հեռախոսով
1. Ո՞րն է Աստվածաշնչի ուսումնասիրություններ անցկացնելու մեր նպատակը։
1 Ի՜նչ ուրախություն է Աստվածաշնչի ուսումնասիրություն սկսելը։ Սակայն երբ հանդիպում ենք մեկին, ով ցանկանում է Աստվածաշունչ ուսումնասիրել, դա միայն սկիզբն է։ Ուսումնասիրության նպատակն է օգնել անհատին դառնալու Քրիստոսի աշակերտը (Մատթ. 28։19, 20)։ Ինչպե՞ս կարող ենք հասնել այդ նպատակին։
2. Ինչպե՞ս է անցկացվում Աստվածաշնչի ուսումնասիրությունը դռան առջև և հեռախոսով, և ինչո՞վ են ուսումնասիրության այդ մեթոդները արդյունավետ։
2 Զբաղված մարդիկ։ Այսօր մարդիկ գնալով ավելի զբաղված են դառնում։ Որոշ վայրերում միայն քչերն են պատրաստ հենց սկզբից մի ամբողջ ժամ տրամադրել Աստվածաշնչի ուսումնասիրությանը։ Զբաղված մարդկանց օգնելու համար մեզ հորդոր է տրվում Աստվածաշնչի ուսումնասիրություն սկսել և անցկացնել դռան առջև կամ հեռախոսով։ Սկզբնական շրջանում այդ ուսումնասիրությունները կարող են համեմատաբար կարճ տևել։ Կարելի է մեկ կամ երկու պարբերությունների օգնությամբ քննարկել ընդամենը մի քանի աստվածաշնչյան համարներ՝ օգտվելով որևէ հրատարակությունից, օրինակ՝ «Աստվածաշունչը սովորեցնում է» գրքից։ Գովելի է, որ շատ քարոզիչներ Աստվածաշնչի ուսումնասիրություններ են անցկացնում դռան առջև և հեռախոսով։
3. Ինչո՞ւ պետք է ջանքեր գործադրենք, որպեսզի դռան առջև անցկացվող ուսումնասիրությունը ավելի երկար տևի։
3 Սակայն արդյո՞ք պետք է Աստվածաշնչի ուսումնասիրությունը միշտ անցկացնենք միայն դռան առջև։ Ո՛չ։ Թեև ճիշտ կլինի, որ ուսումնասիրությունը սկսելուց հետո սկզբնական շրջանում չափազանց երկար չզրուցենք անհատի հետ, սակայն «Մեր թագավորական ծառայությունը» թերթիկի 1990 թ. մայիսի համարում (էջ 8, անգլ.) կարդում ենք. «Երբ Աստվածաշնչի ուսումնասիրություն է սկսվում և տանտիրոջ հետաքրքրությունը զարգանում է, ապա ուսումնասիրությանը կարելի է ավելի երկար ժամանակ հատկացնել»։ Սա շատ կարևոր է։ Պարզաբանենք օրինակով. սովահար երեխային սկզբում պետք է փոքր քանակությամբ կերակուր տալ, մինչև որ նրա ախորժակը վերականգնվի, սակայն չենք կարող ակնկալել, որ նա կվերականգնի իր ուժերը և նորմալ կաճի, եթե ամիսներ շարունակ քիչ քանակությամբ սնունդ ստանա։ Նմանապես Աստվածաշունչ ուսումնասիրողը ավելի հաստատուն ու կանոնավոր ուսումնասիրության կարիք ունի Աստծու հասուն ծառա դառնալու համար (Եբր. 5։13, 14)։
4. Ինչո՞վ է օգտավետ Աստվածաշնչի ուսումնասիրությունը տանը անցկացնելը։
4 Աստվածաշնչի ուսումնասիրություններ անցկացնենք տանը։ Ցանկալի է ուսումնասիրությունը անցկացնել առանձին տեղում՝ տանը կամ այլ հարմար վայրում։ Այդպես ավելի հեշտ կլինի սովորելը, և ուսումնասիրողը կկարողանա ավելի լավ հասկանալ Աստծու Խոսքը (Մատթ. 13։23)։ Այդպես ուսուցանողի համար նույնպես հեշտ կլինի ուսումնասիրության նյութը անհատի կարիքներին հարմարեցնելը։ Բացի այդ, ավելի երկարատև ուսումնասիրությունը հնարավորություն կտա ավելի մանրակրկիտ ու հավատն ամրացնող զրույց ունենալու Աստծու Խոսքի շուրջ (Հռովմ. 10։17)։
5. Ի՞նչ կարող ենք անել, որպեսզի դռան առջև անցկացվող ուսումնասիրությունը անցկացվի տանը։
5 Ի՞նչ կարող ես անել, որ դռան առջև անցկացվող ուսումնասիրությունը սկսի անցկացվել տանը։ Մի քանի կարճատև ուսումնասիրություններից հետո կարող ես անհատին առաջարկել մի քիչ ավելի երկար ուսումնասիրել։ Կամ կարող ես անուղղակի մոտեցում կիրառել՝ հարցնելով նրան. «Այսօր ժամանակ կունենա՞ք, որ նստենք ու միասին քննարկենք այս հարցը»։ Կամ կարող ես ասել. «Որքա՞ն ժամանակ կցանկանայիք այսօր տրամադրել այս հարցը քննարկելուն»։ Եթե քո գործադրած ջանքերը արդյունքներ չտան, շարունակիր կարճատև քննարկումներ անցկացնել դռան առաջ։ Որևէ հարմար պահի դարձյալ փորձիր առաջարկել ուսումնասիրությունը տանը անցկացնել։
6. Ծառայության մեջ ի՞նչ նպատակ պետք է ունենանք, և ինչպե՞ս կարող են այս հոդվածում տրված խորհուրդները օգնել մեզ հասնելու այդ նպատակին։
6 Մինչ շարունակում ենք փնտրել արժանի անհատների, եկեք չմոռանանք մեր նպատակի մասին, որն է՝ Աստվածաշնչի ուսումնասիրություններ սկսել և անցկացնել։ Մեր նպատակն է օգնել անկեղծ սրտով անհատներին դառնալ Եհովայի նվիրված և մկրտված ծառաները։ Թող որ նա օրհնի մեր ջանքերը, որ գործադրում ենք ծառայության մեջ այս ուղղությամբ (Բ Տիմոթ. 4։5)։